Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 5:1-21

5  Upéicharõ, ojeʼémarõ ñanderehe ñanderekojojaha* jajerovia rupi, jaikókena pyʼaguapýpe Ñandejára ndive, ñande Ruvicha Jesucristo rupive.  Jajerovia rupi Jesús rehe ojavri pe tape Ñandejára ohechauka hag̃ua ñandéve mbaʼeporã ijojahaʼỹva, jahupytýmava voi koʼág̃a. Ha javyʼákena jarekógui esperánsa Ñandejára omeʼẽtaha ñandéve hekomimbipa.  Ha ndahaʼéi upéva añónte, síno javyʼákena jahasa asy jave, jaikuaágui pe jehasa asy ñanepytyvõha ñaaguanta hag̃ua,  pe aguánte katu ñanepytyvõ ñaime porã hag̃ua Ñandejárandi, ha upéva omeʼẽ ñandéve esperánsa,  ha añetehápe ikatu jajerovia pe esperánsa jarekóvare, Ñandejára omeʼẽgui ñandéve ijespíritu sánto* ohechauka hag̃ua ñanderayhuha.  Añetehápe, og̃uahẽrõ guare pe tiémpo Ñandejára omoĩ vaʼekue, Cristo* omano iñañáva rehehápe. Haʼe ojapo upéva ñande pekadór aja gueteri.  Hasy hína oĩ hag̃ua omanóva peteĩ hekojojáva rehehápe, péro añetehápe ikatu oĩ omanoséva peteĩ ivuénova rehehápe.  Ñandejára katu ohechauka ñanderayhuha, Cristo omanóvo ñanderehehápe ñande pekadór aja gueteri.  Koʼág̃a huguy rupive ojeʼe ñanderehe ñanderekojojaha, koʼýte upéicharõ ikatu jaguerovia jajesalvataha Ñandejára kastígogui. 10  Ñande haʼe aja gueteri Ñandejára enemígo, Itaʼýra omano rupi, jaiko porã jey hendive. Koʼýte koʼág̃a jaiko porã jeýmarõ hendive ikatu jaguerovia jajesalvataha haʼe oikove rupi. 11  Ha ndahaʼéi upéva añónte, síno javyʼa avei Ñandejárandi, ñande Ruvicha Jesucristo rupive. Haʼe rupive ningo koʼág̃a ñaime porã jey Ñandejárandi. 12  Upéicharõ, peteĩ kuimbaʼe rupive pe pekádo oike ko múndope*, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi... 13  Ko múndope oĩ vaʼekue pekádo, pe Léi* oĩ mboyve jepe. Péro avavépe ndaikatúi oñekondena opeka haguére ndaipóriramo pe Léi. 14  Upéicharamo jepe, Adán guive Moisés peve, pe ñemano ogoverna enterovépe, ndopekáiramo jepe hikuái Adán ojapo haguéicha. Adán ningo ojogua upe oñepromete vaʼekuépe outaha. 15  Pe ojehupytýva Ñandejára rregálo rupive ndojoguaiete pe ojehupytývape pekádo rupive. Heta hénte omano peteĩ kuimbaʼe opeka haguére. Péro heta héntepe tuichaitereive ideprovécho pe rregálo Ñandejára omeʼẽva imbaʼeporã rupi ha Jesucristo imbaʼeporã rupi. 16  Ha avei umi mbaʼe porã yvyporakuéra ohupytýva pe rregálo rupive ndojoguái pe ojehupytývape upe kuimbaʼe opeka rupi. Peteĩ pekádo rupive ningo yvyporakuérape oñekondena, péro upéi Ñandejára omeʼẽ pe rregálo hetaiterei hénte opeka rire, ha upéicha rupi Ñandejára heʼi yvyporakuéra hekojojaha. 17  Peteĩ kuimbaʼe káusare ningo pe ñemano ogoverna. Upéicharõ katuete jaguerovia umi hénte oikovéta ha ogovernataha peteĩ kuimbaʼe rupive: Jesucristo. Upéva haʼekuéra ohupyty Ñandejára imbaʼeporãiterei rupi hendivekuéra ha ojeʼégui hesekuéra hekojojaha pe rregálo rupive. 18  Upéicharõ, peteĩ pekádo rupivénte opaichagua yvypórape oñekondena, upéicha avei peteĩ tembiapo porã rupive opaichagua yvypórare ojeʼe hekojojaha oikove hag̃ua. 19  Peteĩ kuimbaʼe naiñeʼẽrendúi rupi heta héntegui oiko pekadór, upéicha avei peteĩ kuimbaʼe iñeʼẽrendúgui heta héntere ojeʼéta hekojojaha. 20  Ñandejára omeʼẽ pe Léi umi hénte ohechakuaa hag̃ua ojapoha heta tembiapo vai. Péro umi hénte heta opeka rire, Ñandejára ohechauka chupekuéra mbaʼeporã ijojahaʼỹva. 21  ¿Maʼerãpa upéva? Pe pekádo ha ñemano ogoverna haguéicha, upéicha avei ogoverna hag̃ua Ñandejára mbaʼeporã ijojahaʼỹva, ikatu hag̃uáicha haʼe heʼi umi héntere hekojojaha ha ohupyty hag̃ua hikuái jeikove opaveʼỹva ñande Ruvicha Jesucristo rupive.

Nóta

Ehecha “Hekojojáva Ñandejára Renondépe”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha “Léi”, diksionário oĩva ko Bíbliape.