Ehecha oĩva pype

Ehecha oĩva pype

Romanos 4:1-25

4  Upéicharõ, ¿mbaʼépa jaʼéta ñande ru ypykue Abrahán rehe?  Por ehémplo, Abrahán rehe ojeʼérire hekojojaha* hembiapokuére, haʼe ikatu vaʼerãmoʼã oñemombaʼeguasu, péro ndahaʼéi Ñandejára renondépe.  Upéicharõ, ¿mbaʼépa heʼi Ñandejára Ñeʼẽ? “Abrahán ojerovia Jehováre* ha upévare ojeʼe hese hekojojaha.”  Upe ombaʼapóvape ojepaga vaʼerã voínte hembiapokuére, upéva ndahaʼéi peteĩ rregálo, síno peteĩ mbaʼe ojedevéva chupe.  Péro Ñandejárape g̃uarã pe kuimbaʼe hekojoja hag̃ua nodependéi ojapóvare, síno ijeroviáre. Ojeroviáramo Ñandejárare, haʼe hekojoja opekáramo jepe.  David oñeʼẽ vaʼekue avei pe kuimbaʼe ovyʼávare Ñandejára heʼi haguére hese hekojojaha, ndojapóiramo jepe pe Léi* heʼihaichaite:  “Ovyʼa umi ojeheja reívape hembiapo vai ha oñeperdonáva ipekádo.  Ovyʼa pe kuimbaʼe Jehová operdonáva chupe ipekádo”.  ¿Upéicharõ piko umi oñesirkunsidávante ovyʼa, térã umi noñesirkunsidáiva avei? Jaʼéma haguéicha: “Abrahán rehe ojeʼe vaʼekue hekojojaha ojerovia rupi”. 10  ¿Arakaʼe piko ojeʼe hese upéva? ¿Oñesirkunsida rire térã oñesirkunsida mboyve? Haʼe oñesirkunsida mboyve gueteri. 11  Ñandejára heʼi Abrahánpe oñesirkunsida hag̃ua, péva peteĩ séllo ohechaukáva haʼe hekojojáma hague ojerovia rupi oñesirkunsida mboyve. Upévare, Abrahán hína opavave umi ojeroviáva túva, ikatu hag̃uáicha ojeʼe hesekuéra hekojojaha, haʼekuéra noñesirkunsidáiramo jepe. 12  Abrahán haʼe avei umi oñesirkunsidáva túva, haʼekuéra ningo ojerovia Ñandejárare. Ha péicha oguata hekoitépe Abrahán pyporére, haʼe ojerovia vaʼekue oñesirkunsida mboyve. 13  Abrahán ha ifamiliarépe oñepromete vaʼekue oñemeʼẽtaha peteĩ múndo* imbaʼerã, péro ndahaʼéi okumpli haguére pe Léi, síno hekojoja haguére ojerovia rupi. 14  Ko promésa oñemeʼẽramo umi okumplívape pe Léi añónte, pe jerovia ndovaléi mbaʼeverã ha pe promésa opyta rei. 15  Añetehápe pe Léi ogueru Ñandejára kastígo, péro ndaiporihápe Léi ndaipóri mbaʼeveichagua tembiapo vai. 16  Abrahánpe oñemeʼẽ pe promésa ojerovia rupi ha péicha ojehechauka avei Ñandejára mbaʼeporã ijojahaʼỹva*. Upéicha entéro ifamiliare ohupytýta avei upe promésa, ndahaʼéi umi oĩva Léi poguýpente, síno avei umi ojeroviáva Abrahán ojerovia haguéicha. Haʼe hína opavave túva. 17  (Ojehaiháicha Ñandejára Ñeʼẽme: “Che ajapo ndehegui heta tetã ru”.) Péva oiko Ñandejára renondépe, upe haʼe ojeroviaha, Haʼe hína pe omoingovéva umi omanóvape ha oñeʼẽva umi mbaʼe oñekumpliʼỹvare, ku oñekumpliramoguáicha. 18  Ndaiporivéiramo jepe esperánsa, Abrahán ohaʼarõ ha ojerovia, upévare oiko chugui heta tetã ru, ojeʼe haguéicha chupe: “Péichata ne familiare”. 19  Péro ijerovia naikangýiramo jepe, haʼe opensa ndaikatumoʼãveimaha ifamília orekómagui cien áñorupi, ha avei oikuaa Sara ndaikatuveimaha imemby ig̃uaig̃ui rupi. 20  Péro Abrahán ni michĩmi ndaipyʼamokõiri ojeroviágui Ñandejára promésare, oñemombarete guei ijerovia rupive ha ombotuicha Ñandejárape. 21  Haʼe oikuaa porã Ñandejára okumplitaha avei oprometéva. 22  Ha “upéicha rupi ojeʼe hese hekojojaha”. 23  Upéicharamo jepe, pe ñeʼẽ: “upéicha rupi ojeʼe hese hekojojaha”, noĩri Ñandejára Ñeʼẽme hesehápente. 24  Oĩ avei ñanderehehápe, Ñandejára ñandeporavo rupi ñanderekojoja hag̃ua, jajeroviágui upe omopuʼã vaʼekuére ñande Ruvicha Jesúspe omanóva apytégui. 25  Ñandejára oheja umi kuimbaʼépe ojuka Jesúspe ñande pekádo rehe, ha oñemopuʼã chupe ikatu hag̃uáicha Ñandejára heʼi ñanderehe ñanderekojojaha.

Nóta

Ehecha “Hekojojáva Ñandejára Renondépe”, diksionário oĩva ko Bíbliape.
Ehecha Informasión Oĩvéva 1.
Ehecha “Léi”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha “Mbaʼeporã Ijojahaʼỹva”, diksionário oĩva ko Bíbliape.