Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 3:1-31

3  ¿Mbaʼépepa upéicharõ pe hudío iñimportanteve ótrogui, térã mbaʼépepa ideprovécho pe sirkunsisión?  Heta mbaʼépe ideprovécho. Ñepyrũrã, chupekuéra oñemeʼẽ rupi Ñandejára marandukuéra.  Ha oĩramo hudío ndojeroviáiva, ¿heʼisépa upéva kuimbaʼekuéra ndaikatuveimaha ojerovia Ñandejárare?  ¡Ni mbaʼevéicharõ! Ñandejára heʼi pe añetegua, jepe entéro kuimbaʼe ijapu. Heʼiháicha Ñandejára Ñeʼẽ: “Ne ñeʼẽre rehechaukáta nderekojojaha, ha oĩ jave ndeakusáva rehechaukáta ojavyha”.  Péro umi hénte ohechakuaáramo Ñandejára hekojojaha, ñande jajapo haguére ivaíva, ¿heʼisépa upéva Ñandejára ndahekojojaiha ñandekastiga jave? (Péicha opensa heta hénte.)  ¡Ni mbaʼevéicharõ! ¿Mbaʼéicha piko upéicharõ Ñandejára ohusgáta ko múndope*?  Péro che chejapúramo ha upévare ojehechauka porãvérõ Ñandejára ndaijapuiha, ha upéicha oñembotuicha chupe, ¿mbaʼére piko upéicharõ ajehusga gueteri apekaramoguáicha?  ¿Ha mbaʼére piko ndajaʼéi: “Jajapo ivaíva ou hag̃ua iporãva”? Péicha voi oñemboja ñanderehe jaʼeha. Umi heʼíva upéicha omerese ojehusga chupekuéra.  ¿Mbaʼe upéicharõ? ¿Ñande hudío piko ñaime porãve umi ótrogui? ¡Ni mbaʼevéicharõ! Jaʼéma haguéicha, umi hudío ha griégo enterovete oĩ pekádo poguýpe. 10  Ñandejára Ñeʼẽme heʼiháicha: “Ndaipóri kuimbaʼe hekojojáva, ni peteĩ jepe, 11  ndaipóri ohechakuaáva iporãva ha ivaíva, ndaipóri ohekáva Ñandejárape. 12  Enterove oho diferénte tapérupi, enterove haʼekuéra ndovaléi mbaʼeverã, ndaipóri imbaʼeporãva, ndaipóri ni peteĩ jepe”. 13  “Ijuru haʼete panteón ojavríva, oiporu ijuru oporombotavy hag̃ua.” “Ijuru henyhẽ mbói ponsóñagui.” 14  “Ijuru henyhẽ maldisión ha pyʼarógui.” 15  “Haʼekuéra ipyaʼe oñohẽ hag̃ua tuguy.” 16  “Haʼekuéra tuicha operhudika ha ombohasa asy umi héntepe, 17  ha ndoikuaái mbaʼéichapa oikóta pyʼaguapýpe ótrondi.” 18  “Haʼekuéra ndokyhyjéi Ñandejáragui.” 19  Koʼág̃a ñande jaikuaa opa mbaʼe heʼíva pe Léipe* ojehai hague umi oĩva Léi poguýpe g̃uarã, ikatu hag̃uáicha omokirirĩ enterovépe ha ko múndope ojekastiga hag̃ua Ñandejára renondépe. 20  Upéicharõ avavére ndaikatúi ojeʼe hekojojaha* Ñandejára renondépe okumpli haguére pe Léi heʼíva. Pe Léi ñanepytyvõ jaikuaa hag̃ua mbaʼépa hína pe pekádo. 21  Péro koʼág̃a ojehecha ikatuha ñanderekojoja Ñandejára renondépe ñakumpliʼỹre pe Léi, upéva ojekuaauka pe Léi ha umi Proféta* rupive. 22  Añetehápe, entéro ojeroviáva ikatu hekojoja Ñandejára renondépe ojerovia rupi Jesucristo rehe. Ñandejárape g̃uarã enterove peteĩchante. 23  Opavave opekágui ha ndohupytýi Ñandejára rekomimbipa. 24  Péro Ñandejára heʼi hesekuéra hekojojaha Cristo* Jesús opaga* haguére osalva hag̃ua chupekuéra. Péva peteĩ rregálo Ñandejára omeʼẽva imbaʼeporãiterei* rupi. 25  Ñandejára omeʼẽ chupe sakrifísioramo ñañemoĩ porã jey hag̃ua hendive, jajerovia rupi huguýre. Haʼe ojapo upéva ikatu hag̃uáicha ohechauka hekojojaha. Ñandejára ipasiénsia rupi operdonáma kuri umi pekádo ojejapo vaʼekue yma. 26  Péicha haʼe ikatu ohechauka hekojojaha ko tiémpope, heʼívo hekojojaha pe kuimbaʼe ojeroviáva Jesús rehe. 27  Upéicharõ, ¿ikatu piko peteĩ tapicha ijejapo? ¡Ni mbaʼevéicharõ! ¿Mbaʼe Léi piko ojoko chupe ani hag̃ua ijejapo? ¿Pe Léi heʼíva umi mbaʼe ojapóva iñimportanteha piko? Nahániri, pe Léi heʼíva ojerovia vaʼerãha. 28  Ñandéve g̃uarã peteĩ kuimbaʼe hekojoja ojerovia rupi, ha ndahaʼéi okumpli haguére pe Léi. 29  ¿Ñandejára piko ojapo umi hudíopente? ¿Ndojapói piko avei umi tetã ambueguápe? Si, ojapo avei umi tetã ambueguápe. 30  Añetehápe Ñandejára peteĩnte, ha heʼi hekojojaha umi oñesirkunsidáva ha umi noñesirkunsidáiva ojerovia rupi hikuái. 31  ¿Upéicharõ piko ñande ñamboyke pe Léi jajerovia rupi? ¡Ni mbaʼevéicharõ! Jahechauka guei pe Léi oĩ porãha.

Nóta

Ehecha “Múndo”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Hekojojáva Ñandejára Renondépe”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Térã: “orreskata haguére”. Ehecha “Rreskáte”, diksionário oĩva ko Bíbliape.
Térã: “ohechauka rupi mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.