Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 2:1-29

2  Nde reikóramo rehusga nde rapichápe, ndaikatúi ere mbaʼeve reñedefende hag̃ua. Cháke nde reporohusga jave reñekondena hína, nde voi reikógui rejapo avei umi mbaʼe haʼekuéra ojapóva.  Péro ñande jaikuaa Ñandejára oporohusgaha hekoitépe, ha okastigataha umi ojapóvape koʼã mbaʼe.  ¿Nde piko reimoʼã rekañytaha Ñandejáragui ág̃a ndehusga vove, reikóramo rehusga umi ojapóvape koʼã mbaʼe, ha nde voi rejapóramo avei upéicha?  ¿Térãpa neremombaʼéi mbaʼeichaitépa Ñandejára imbaʼeporã, ojejokokuaa ha ipasiensiaiterei? ¿Ndereikuaái piko Ñandejára imbaʼeporã rupi oipotaha reñarrepenti*?  Péro nde reñemohatã ha nereñarrepentiséi rupi Ñandejára ipochyeterei nendive. Haʼe ohechaukáta upéva ohusgaha árape yvyporakuérape, ha ojapóta upéva tekojojápe.  Haʼe opagáta káda únope hembiapokuére:  omeʼẽta jeikove opaʼỹva umi ohekávape tekomimbipa, ñemombaʼe ha tekove ikatuʼỹva oñehundi, ojepytaso mbarete rupi hikuái ojapo hag̃ua iporãva.  Péro umi oiko vaiséva, naiñeʼẽrendúiva pe añeteguápe, ha oikóva mbaʼe vai rapykuéri, umívandi Ñandejára ipochýta ha okastigáta chupekuéra.  Jehasa asy ha jepyʼapy ojahoʼíta umi kuimbaʼe* ojapóvape mbaʼe vai, hudíope raẽ ha avei griégope. 10  Péro enterove ojapóvape mbaʼe porã katu oñemeʼẽta tekomimbipa, ñemombaʼe ha pyʼaguapy, hudíope raẽ ha avei griégope. 11  Ñandejárape g̃uarã opavave peteĩchapánte. 12  Enterove noĩriva pe Léi poguýpe ha opekáva omanóta avei, noĩriramo jepe pe Léi poguýpe. Péro umi opekáva oĩramo jepe pe Léi poguýpe, ojehusgáta pe Léi heʼiháicha. 13  Umi ohendúva pe Léi ndahekojojái Ñandejára renondépe, síno umi oikóva pe Léi heʼiháicha, umívare Ñandejára heʼíta hekojojaha*. 14  Umi tetã ambuegua orekoʼỹva Ñandejára Léi, sapyʼánte ijeheguiete ojapo pe Léi heʼíva, ha ndorekóiramo jepe hikuái pe Léi, upéva ohechauka orekoha peteĩ Léi ipyʼapypekuéra. 15  Haʼekuéra ohechauka pe Léi oĩha ipyʼapypekuéra, ha ikonsiénsia* heʼi chupekuéra oĩ porãpa térãpa oĩ vai upe ojapóva. 16  Koʼã mbaʼe oikóta Ñandejára ohusgaha ára Cristo* Jesús rupive, umi mbaʼe yvyporakuéra ojapóva ñemiháme. Péicha heʼi umi marandu porã* che aikuaaukáva. 17  Ha nde ere ndejehe hudioha, ha rejerovia pe Léi rehe, ha rejejapo reime haguére Ñandejára puévlope, 18  avei reikuaa hembipota, ha rehechakuaa umi mbaʼe iñimportantevéva, oĩgui nemboʼe vaʼekue pe Léi heʼíva, 19  ha nde añetehápe reimoʼã reisãmbyhyha umi ohechaʼỹvape, rehesapeha umi pytũmbýpe oĩvape, 20  remboʼeha umi oñembotavývape, ha ere avei nde haʼeha mboʼehára mitãnguérape g̃uarã, hiʼarive reikuaáma heta mbaʼe omopyendáva pe añetegua ha oĩva pe Léipe... 21  Nde reikóva remboʼe ótrope, ¿mbaʼére piko nereñehekomboʼéi ndejupe? Nde reikóva repredika: “Aníke remonda”, ¿remonda piko? 22  Nde eréva: “Aníke reporomoakãratĩ”, ¿reporomoakãratĩ piko? Nde eréva nembojeguaruha umi ñandejára guaʼu* raʼanga, ¿remonda piko umi tupao? 23  Nde rejejapóva reguereko haguére pe Léi, ¿remotĩ piko Ñandejárape nerekumplíri haguére pe Léi? 24  Ñandejára Ñeʼẽme ojehai voi: “Pende káusare umi tetã ambuépe ojetaky* Ñandejára rérare”. 25  Añetehápe, reñesirkunsidáramo, upéva ideprovécho ndéve rejapóramo pe Léi heʼíva añoite; péro nerekumplíriramo pe Léi, reñesirkunsidáramo jepe, upéva ndaideprovéchoi ndéve. 26  Péro pe noñesirkunsidáiva okumplíramo pe Léi, Ñandejára orekóta chupe oñesirkunsidaramoguáicha, ¿ajépa? 27  Ha pe noñesirkunsidáiva, okumplívo pe Léi ndehusgáta, nerekumplíri haguére upe Léi, jepe reñesirkunsida ha reime pe Léi poguýpe. 28  Peteĩ hudío ndahaʼéi ohechaukáva upéva hetére, ha pe sirkunsisión ndahaʼéi pe jajapóva ñande retére. 29  Upéva rangue pe hudío teete haʼe hína pe oservíva Ñandejárape ipyʼaite guive, haʼe oñesirkunsida ipyʼapýpe espíritu rupive, ndahaʼéi pe Léi rupive. Ha ndahaʼéi yvyporakuéra la ombotuicháva chupe, síno Ñandejára.

Nóta

Ehecha “Arrepentimiénto”, diksionário oĩva ko Bíbliape.
Griégope heʼi: “álma”, ehecha Informasión Oĩvéva 7A.
Ehecha “Hekojojáva Ñandejára Renondépe”, diksionário oĩva ko Bíbliape.
Ehecha “Konsiénsia”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Griégope heʼi: “taʼangakuéra”. Ehecha “Idolatría”, diksionário oĩva ko Bíbliape.
Ehecha “Blasfemia”, diksionário oĩva ko Bíbliape.