Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 15:1-33

15  Ñande, ñandejerovia mbaretéva, ñaipytyvõ vaʼerã umi ikangývape, ikatu hag̃uáicha ogueropuʼaka umi mbaʼe ijetuʼúva chupekuéra ha ani jajapo umi mbaʼe ñandévente ou porãva.  Káda uno jajapo vaʼerã umi mbaʼe ideprovéchotava ñande rapichápe ha iporãtava omombarete hag̃ua chupe.  Cristo* jepe nomeʼẽi ijupe gústo, síno ojehaiháicha Ñandejára Ñeʼẽme: “Umi mbaʼe vai heʼíva umi okopíva nderehe oupa che ári”.  Opa mbaʼe ojehai vaʼekue yma Ñandejára Ñeʼẽme, ojehai ñanerekomboʼe hag̃ua. Koʼãva omeʼẽ ñandéve esperánsa, ñanepytyvõgui ñaaguanta hag̃ua ha ñanekonsola avei.  Ñandejára ningo ñanemombarete ñaaguanta hag̃ua ha ñanekonsola. Upévare ajerure chupe tapenepytyvõ pepensa hag̃ua Cristo Jesús opensaháicha.  Péicha oñondivepa ha peteĩ ñeʼẽme, peẽ ikatúta pembotuicha Ñandejárape, haʼéva ñande Ruvicha Jesucristo Ru.  Upévare pejorresivi porãkena Cristo ñanderresivi porã haguéicha, oñembotuicha hag̃ua Ñandejárape.  Aipota peikuaa Cristo oservi hague umi oñesirkunsidávape. Ojapo upéva ohechauka hag̃ua Ñandejára arakaʼeve ndaijapuiha, ha ohechauka hag̃ua añeteha umi promésa Haʼe ojapo vaʼekue ituvakuéra ypykuépe.  Ha ojapo avei upéva umi tetã ambuegua ombotuicha hag̃ua Ñandejárape oporoporiahuvereko haguére. Ojehaiháicha Ñandejára Ñeʼẽme: “Upévare rombotuicháta tetãnguéra apytépe ha aropurahéita nde réra”. 10  Ha heʼi jey: “Pevyʼákena tetãnguéra ipuévlo ndive”. 11  Ha heʼi jey: “Pembotuicha Jehovápe*, opa tetãnguéra, pembotuicha chupe entéro puévlo”. 12  Ha heʼi jey Isaías: “Oúta peteĩ Jesé ñemoñare, opuʼãtava ogoverna hag̃ua tetãnguérape, ha umi tetã orekóta hese esperánsa”. 13  Ñandejára omeʼẽva esperánsa tapenemyenyhẽ pyʼaguapy ha vyʼágui pejerovia rupi hese, ha espíritu sánto* puʼaka rupive taimbareteve pene esperánsa. 14  Che ermanokuéra, koʼág̃a che aguerovia peẽ peikuaa porã rupi Ñandejára Ñeʼẽ penerenyhẽha mbaʼeporãgui, ha ikatuha avei pemeʼẽ ojupe konsého. 15  Upéicharõ jepe, kyhyjeʼỹre ahai peẽme heta mbaʼére, pomomanduʼa jey hag̃ua. Ajapo upéva Ñandejára imbaʼeporãiterei* rupi chendive. 16  Haʼe chemoĩ aservi hag̃ua Cristo Jesúspe aikuaaukávo Ñandejára marandu porã* umi ndahaʼéivape hudío. Che ajapo upe tembiapo imarangatúva Ñandejára oguerohory hag̃ua umi ndahaʼéivape hudío. Haʼekuéra ojogua peteĩ sakrifísiope, oñemomarangatúva espíritu sánto rupive. 17  Añetehápe, avyʼa che haʼégui Cristo Jesús disípulo* ha ajapo rupi pe tembiapo Ñandejára omeʼẽva chéve. 18  Che nañeʼẽmoʼãi peẽme chejehegui reínte, síno amombeʼútante Cristo ojevaleha cherehe, haʼéva ha ajapóva rupive aipytyvõ hag̃ua umi tetã ambueguápe iñeʼẽrendu hag̃ua. 19  Jerusalén guive Ilírico peve, apredika hekoitépe umi marandu porã oñeʼẽva Cristo rehe, ha ajapo techapyrã ha milágro espíritu sánto puʼaka rupive. 20  Che adesidi ndapredikamoʼãiha umi marandu porã umi lugár Cristo réra ojekuaáma haguépe, ani hag̃ua amopuʼã ótro omoĩ haguépe simiénto. 21  Síno ojehaiháicha: “Umi ndoikuaái vaʼekue chugui mbaʼeve, ohecháta chupe, ha umi nohendúi vaʼekue ontendéta”. 22  Upéicha rupi heta vése oĩ chejokóva ha ndaikatúi aha pene rendápe. 23  Péro koʼág̃a ndarekovéima koʼárupi território apredika hag̃ua, ha heta áñorema ahaseterei pene rendápe. 24  Upévare aviaha vove Espáñape, hiʼãite chéve pohecha ha aime penendive vyʼápe, sapyʼaitéramo jepe, ha upéi aipota peho chendive tapekuʼa peve. 25  Péro koʼág̃a aháta Jerusalénpe aservi hag̃ua ermanokuérape. 26  Umi ermáno oĩva Macedonia ha Acáyape vyʼápe okomparti umi mbaʼe orekóva oipytyvõ hag̃ua umi ermáno imboriahúvape oĩva Jerusalénpe. 27  Ha vyʼápe ojapo hikuái upéva, péro añetehápe haʼekuéra ojapónte vaʼerã voi ko mbaʼe. Umi hudío ombojaʼo kuri umi tetã ambueguándi umi mbaʼe porã oúva Ñandejáragui, ha koʼág̃a umi tetã ambuegua oipytyvõ vaʼerã chupekuéra ohupyty hag̃ua hemikotevẽ. 28  Ajapopáta koʼã mbaʼe, araháta chupekuéra pe kontrivusión ha upéi ahasáta pene rendápe ahakuévo Espáñape. 29  Avei che aikuaa ág̃a aha vove pene rendápe, arahataha peẽme heta mbaʼe porã oúva Crístogui. 30  Koʼág̃a che ermanokuéra, ñande Ruvicha Jesucrístore ha pe mborayhu espíritu omeʼẽvare ñandéve, ajerure peẽme peñemboʼe meme hag̃ua cherehe Ñandejárape, 31  chesalva hag̃ua umi ojeroviaʼỹvagui oĩva Judéape, ha umi ermáno Jerusalengua orresivi porã hag̃ua umi kontrivusión agueraháva chupekuéra. 32  Upéicharõ, Ñandejára oipotáramo aháta pene rendápe vyʼápe ha enterovete ñanekyreʼỹta. 33  Ñandejára omeʼẽva pyʼaguapy toĩ penendive. Taupéicha*.

Nóta

Ehecha “Cristo”, diksionário oĩva ko Bíbliape.
Ehecha Informasión Oĩvéva 1.
Ehecha “Espíritu Sánto”, diksionário oĩva ko Bíbliape.
Térã: “ohechauka rupi chéve mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “Amén”.