Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 11:1-36

11  Aporandu upéicharõ: ¿Omboyke piko Ñandejára ipuévlope? ¡Ni mbaʼevéicharõ! Chéngo isrraelíta avei, Abrahán ñemoñare ha Benjamín trivugua.  Ñandejára nomboykéi ipuévlope, chupekuéra raẽve ningo oiporavo vaʼekue. ¿Peẽ piko ndapeikuaái mbaʼépa heʼi Ñandejára Ñeʼẽ Elías rehe, haʼe ojeplageárõ guare Ñandejára renondépe Israel kóntrape?  “Jehová*, haʼekuéra ojuka nde profetakuérape*, oitypa nde altarkuéra*, ha koʼág̃a chéntema apyta ha chejukase* avei hikuái.”  Péro, ¿mbaʼépa ombohovái chupe Ñandejára? “Areko gueteri siete mil kuimbaʼe noñesũiva Baal renondépe.”  Upéicha avei ko tiémpope, oĩ mbovymi isrraelíta ojeporavo vaʼekue Ñandejára imbaʼeporãiterei* rupi.  Upéicharõ, upéva heʼise haʼekuéra ojeporavo hague ndahaʼéi umi mbaʼe ojapo vaʼekuére, síno Haʼe imbaʼeporã rupi. Ikatúrire ombaʼapo hikuái ojeporavo hag̃ua chupekuéra, ndahaʼevéima haʼe imbaʼeporã rupi.  ¿Mbaʼépa jaʼéta upéicharõ? Israel ndohupytýi umi mbaʼe añetehápe oipota vaʼekue, péro umi Ñandejára oiporavo vaʼekue ohupyty, umi hembýva katu nohenduséi.  Ojehaiháicha: “Ñandejára ombou hiʼarikuéra peteĩ espíritu ombohopehyietereíva chupekuéra. Haʼekuéra hesa péro ndaikatúi ohecha, ha ijapysa péro nohendúi. Koʼag̃aite peve oĩ hikuái upéicha”.  David heʼi avei: “Ikaru guasukuéragui* toiko láso, ñuhã, ita oñepysanga hag̃ua ha tojekastiga chupekuéra. 10  Hesakuéra taiñypytũ, ani hag̃ua ohecha, ha akóinte taikarapã hikuái”. 11  Upévare aporandu: ¿Oñepysanga piko hikuái ha hoʼa? ¡Ni mbaʼevéicharõ! Péro opeka rupi hikuái umi tetã ambuegua ojesalva, ha upéva ombopochy* chupekuéra. 12  Umi tetã ambueguápe ningo ojehovasa* umi hudío opeka ha saʼive rupi, upéicharõ ¡koʼýte oñekompletávo hikuái ojehupytýta heta mbaʼe porã! 13  Koʼág̃a añeʼẽ, peẽ tetã ambueguápe. Che añetehápe hína apóstol* añemondóva umi tetã ambueguápe, ha amombaʼeterei che servísio, 14  jahecha upéichapa ndaipochýi* penderehe che retãyguakuéra, ha asalva mbovymi jepe ijapyteguikuéra. 15  Ñandejára omboyke chupekuéra ha oavri pe tape ikatu hag̃uáicha oiko porã jey hendive opa umi ótra hénte oĩva ko yvy ape ári. ¿Mbaʼépa oikóta Ñandejára orresivi vove chupekuéra? Haʼetéta oñemoingove jeýva chupekuéra omanóva apytégui. 16  Avei pe párte tenondegua oñekuaveʼẽva imarangatúramo, imarangatu avei pe mása kompletoite, ha pe hapo imarangatúramo umi hakã imarangatu avei. 17  Ñandejára ohakãʼo michĩmi pe olívo, ha nde haʼéramo jepe olívo kaʼaguy rakã, reñeinherta hese. Ha péicha rehupyty avei umi mbaʼe porã oúva pe olívo rapógui. 18  Ani reapoʼi upéicharõ umi hakã Ñandejára oikytĩ vaʼekuépe, nde ningo ndahaʼéi pe remoingovéva pe yvyramáta rapópe, síno pe hapo guei la nemoingovéva. 19  Nde katu eréta: “Umi hakã ningo oñekytĩ che añeinherta hag̃ua”. 20  ¡Añete upéva! Haʼekuéra oñekytĩ ndojeroviái rupi, péro nde rejerovia rupi, repyta pe yvyramátare. Upéicharõ ani reñemombaʼeguasu, ekyhyje guei. 21  Ñandejára noperdonáiramo umi hakã teépe, ndéve avei naneperdonamoʼãi. 22  Pehechami mbaʼéichapa Ñandejára imbaʼeporã ha oporokastiga avei. Umi hoʼa vaʼekuépe okastiga, péro nde rejapo meméramo iporãva, Ñandejára imbaʼeporãta nendive, ndaupéichairamo katu reñekytĩta avei. 23  Haʼekuéra ojerovia jeýramo, oñeinherta jeýta, Ñandejára ikatúgui oinherta jey chupekuéra. 24  Nde reñekytĩ vaʼekue olívo kaʼaguýgui, ha ojejapoʼỹháicha jepi, reñeinherta peteĩ olívo oñeñotỹpyrévare. ¡Koʼýte upéicharõ umi hakã tee oñeinherta jey vaʼerã imáta tee rehe! 25  Che ermanokuéra, aipota peikuaa ko sekréto marangatu*, ani hag̃ua pepensa pendevaletereiha: oĩ heta isrraelíta nohenduséiva, ha osegíta upéicha oñekompleta peve umi tetã ambuegua Ñandejára oiporavo vaʼekue. 26  Péicha Israel kompletoite ojesalváta. Ojehaiháicha Ñandejára Ñeʼẽme: “Sióngui osẽta pe oporosalvátava, ha haʼe oipeʼáta Jacóbgui umi hembiapo vaikue. 27  Ko kompromíso* ajapóta hendivekuéra, aipeʼávo chuguikuéra ipekádo”. 28  Añetehápe haʼekuéra Ñandejára enemígo omboykégui umi marandu porã*, ha upéva ideprovécho peẽme. Péro Ñandejára ojapo rupi pe promésa ituvakuéra ypykuépe, haʼe oiporavo mbovymi ijapyteguikuéra oiko hag̃ua iñamígoramo. 29  Ñandejára ndoipeʼái umi rregálo omeʼẽva ha ndohejareíri umi ohenói vaʼekuépe. 30  Yma peẽ napeneñeʼẽrendúi vaʼekue Ñandejárape, péro koʼág̃a haʼe pendeporiahuvereko umi hudío naiñeʼẽrendúi rupi. 31  Upéicharõ, Ñandejára pendeporiahuvereko umi hudío naiñeʼẽrendúi haguére, péro upéicha rupi, haʼe ikatu avei oiporiahuvereko umi hudíope. 32  Ñandejára ohecha chupekuéra oĩramoguáicha préso, naiñeʼẽrendúi rupi hikuái; ikatu hag̃uáicha oiporiahuvereko chupekuéra. 33  ¡Ajépa ipypukuete Ñandejára mbaʼeta, arandu ha mbaʼekuaa! Avave ndaikatúi omyesakã umi mbaʼe haʼe ojapóva ni oikuaa umi hape. 34  Ñandejára Ñeʼẽme ojehai voi: “¿Máva piko oikuaa Jehová opensáva, térã ikatu oñemoñeʼẽ chupe?”. 35  Térã, “¿máva piko omeʼẽ raẽve Ñandejárape, haʼe opaga jey hag̃ua chupe?”. 36  Opa mbaʼe ou Ñandejáragui, oĩ haʼe rupi ha chupe g̃uarã. Toñembotuicha chupe opa ára g̃uarã. Taupéicha*.

Nóta

Ehecha Informasión Oĩvéva 1.
Ehecha “Profesía”, diksionário oĩva ko Bíbliape.
Ehecha “Altár”, diksionário oĩva ko Bíbliape.
Griégope heʼi: “ojukase che álma”. Ehecha “Álma”, Informasión Oĩvéva 7A-pe.
Térã: “ohechauka rupi mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Griégope heʼi: “Imeságui”.
Térã: “omboselóso”.
Térã: “oñevendesi”. Ehecha “Vendisión”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Térã: “ndaiselósoi”.
Ehecha “Sekréto Marangatu”, diksionário oĩva ko Bíbliape.
Térã: “pákto ỹrõ kontráto”.
Ehecha “Marandu Porã”, diksionário oĩva ko Bíbliape.
Térã: “Amén”.