Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 10:1-21

10  Che ermanokuéra, añetehápe che pyʼaite guive aipota ha ajerure asy Ñandejárape hesekuéra, ojesalva hag̃ua hikuái.  Che ikatu amombeʼu haʼekuéra añetehápe oĩ porãseha Ñandejára ndive, péro ndoikuaaporãi chupe.  Haʼekuéra ndoikuaái Ñandejára hustísia, ha ijeheguínte odesidise mbaʼépa iporã ha ivai, ha noñemoĩséi hikuái Ñandejára hustísia poguýpe.  Cristo* rupive ningo opa pe Léi*, ikatu hag̃uáicha entéro ojeroviáva hekojoja Ñandejára renondépe.  Moisés heʼi vaʼekue pe kuimbaʼe okumplíva hekoitépe pe Léi, oikovetaha pe hustísia rupive.  Péro pe hustísia oúva jerovia rupive heʼi kóicha: “Ani ere nde pyʼapýpe: ‘¿Mávapa ojupíta yvágape?’, upéva hína omboguejy hag̃ua Crístope.  Térã: ‘¿Mávapa oguejýta pe yvykua pypukúpe*?’, upéva hína ohupi hag̃ua Crístope omanóva apytégui”.  ¿Mbaʼépa heʼi Ñandejára Ñeʼẽ? “Ag̃ui oĩ ndehegui pe marandu, nde juru ha ne korasõme”, upéva hína pe “marandu” japredikáva ha ojegueroviáva jerovia rupive.  Remombeʼúramo opavave renondépe ‘pe marandu oĩva nde jurúpe’; upéva hína Jesús haʼeha ñande Ruvicha, ha nde pyʼapýpe rejeroviáramo Ñandejára omopuʼã hague chupe omanóva apytégui, upéicharõ rejesalváta. 10  Ñanderekojoja hag̃ua jajerovia vaʼerã ñande pyʼapýpe, ha jajesalva hag̃ua jaiporu vaʼerã ñande juru ñamombeʼu hag̃ua pe marandu. 11  Ñandejára Ñeʼẽ heʼi voi: “Ni peteĩ ojeroviáva hese nombyasymoʼãi ojapo haguére upéva”; 12  ndaipóri rupi diferénsia umi hudío ha griégo apytépe, peteĩnte Ijarakuéra omeʼẽva heta mbaʼe porã umi ohenóivape chupe. 13  “Opavave ohenóiva Jehová* réra ojesalváta.” 14  Péro ¿mbaʼéichapa ohenóita hikuái Ñandejárape ndojeroviáiramo hese? ¿Mbaʼéicha piko ojeroviáta hikuái nohendúiramo oñeñeʼẽha hese? ¿Ha mbaʼéicha piko ohendúta hikuái avave ndopredikáiramo? 15  ¿Mbaʼéicha piko opredikáta hikuái noĩriramo omondóva chupekuéra? Ojehaiháicha Ñandejára Ñeʼẽme: “¡Iporãitépa umi* opredikáva marandu porã*!”. 16  Upéicharõ jepe, naentéroi iñeʼẽrendu pe marandu porãme. Isaías heʼi voi: “Jehová, ¿máva piko ojerovia ore roʼévare*?”. 17  Upéicharõ, jajerovia ñahendu rire pe marandu, ha ñahendu pe marandu oĩramo oñeʼẽva Cristo rehe. 18  ¿Heʼise piko upéva haʼekuéra nohendúi hague pe marandu? ¡Ni mbaʼevéicharõ! Añetehápe, umi hénte “oparupiete ko yvy ape ári ohendu upe marandu, ha umi oikóva mombyryvehápe jepe ohendu pe marandu”. 19  ¿Heʼise piko upéva Israel ndoikuaaiha? ¡Ni mbaʼevéicharõ! Haʼekuéra oikuaa porã. Ñepyrũrã Moisés heʼi: “Pombopochýta* umi tetã ambuegua rupive, pomorrenegáta peteĩ tetã rovatavy rupive”. 20  Péro Isaías pyʼaguasúpe heʼi: “Umi ndacherekái vaʼekue chejuhu, ha ajekuaauka umi noporandúi vaʼekuépe cherehe”. 21  Israel rehe katu heʼi: “Káda día ajerure jey jey ou hag̃ua che rendápe peteĩ puévlo naiñeʼẽrendúi ha ijuruʼatãva”.

Nóta

Ehecha “Cristo”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Yvykua Pypuku”, diksionário oĩva ko Bíbliape.
Ehecha Informasión Oĩvéva 1.
Griégope heʼi: “iporãite ipykuéra”.
Ehecha “Marandu Porã”, diksionário oĩva ko Bíbliape.
Griégope heʼi: “upe ohendu vaʼekuére orehegui”.
Térã: “Pomboselósota”.