Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 1:1-32

1  Che, Pablo, Jesucristo rembiguái, haʼe cheporavo vaʼekue aservi hag̃ua apóstolramo* ha chemoĩ amombeʼu hag̃ua Ñandejára marandu porã*,  haʼe opromete vaʼekue yma Iñeʼẽme iprofetakuéra* rupive.  Umi marandu porã oñeʼẽ Itaʼýra rehe, onase vaʼekue yvypóraicha David ñemoñarégui.  Ha espíritu sánto* podér rupive ojekuaauka haʼeha Ñandejára Raʼy, upéva oiko oñemoingove jeýrõ guare Jesucrístope omanóva apytégui.  Haʼe rupive oñemeʼẽ ñandéve mbaʼeporã ijojahaʼỹva* ha chemoĩ aservi hag̃ua apóstolramo, ikatu hag̃uáicha umi hénte oĩva opa tetãrupi ojerovia ha iñeʼẽrendu, ha péicha oñembotuicha Jesucristo réra.  Ñandejára penerenói avei umi tetã apytégui oiko hag̃ua pendehegui Jesucristo segidór.  Che ahai enterove peẽ peiméva Rómape, peikóva Ñandejára mborayhúpe ha pejeporavóva penemarangatu hag̃ua: Aipotaite, ñande Ru Ñandejára, ha ñande Ruvicha Jesucristo, taimbaʼeporã penendive ha tomeʼẽ peẽme pyʼaguapy.  Tenonderã, Jesucristo rupive aagradese Ñandejárape penderehe, oñeñeʼẽ rupi pende jeroviáre ko múndo* tuichakuére.  Che aservi Ñandejárape che pyʼaite guive* aikuaaukávo umi marandu porã oñeʼẽva Itaʼýra rehe. Ñandejára oikuaa che katuete chemanduʼaha penderehe che ñemboʼépe, 10  ha ajerure asy, ikatúramo koʼág̃a hasypeve ag̃uahẽ porã hag̃ua pene rendápe Ñandejára oipotáramo. 11  Hiʼãite chéve pohechami, ameʼẽ hag̃ua peẽme peteĩ rregálo oúva Ñandejáragui, penemombaretétava, 12  térã káda uno ñañomokyreʼỹ hag̃ua ñande jerovia rupive, peẽ ha che avei. 13  Aipota peikuaa che ermanokuéra, heta vése ahase hague pene rendápe amboʼe hag̃ua upépe umi héntepe, oiko hag̃ua chuguikuéra disípulo*, ajapo haguéicha ambue tetãnguérarupi. Péro katuete oĩ jepi chejokóva. 14  Tahaʼe umi griégo térã umi tetã ambueguápe, iñarandúva ha ijeskuelaʼívape adeve. 15  Upévare hiʼãiterei chéve amombeʼu avei umi marandu porã peẽme, peiméva Rómape. 16  Chéngo natĩri amombeʼu hag̃ua umi marandu porã, añetehápe Ñandejára ojevale umi marandu porãre ohechauka hag̃ua ipodér, ikatu hag̃uáicha ojesalva enterove ojeroviáva, umi hudío raẽ ha avei umi griégo. 17  Umi ojeroviáva ohecha umi marandu porã rupive Ñandejára ohechaukaha tekojoja, ha upéva omombareteve chupekuéra ijerovia, heʼiháicha Ñandejára Ñeʼẽme: “Pe hekojojáva katu..., oikovéta ijerovia rupive”. 18  Yvága guive Ñandejára ohechauka ipochyha umi naiñeʼẽrendúiva ha hekojojaʼỹva ndive. Haʼekuéra ojapo ivaíva omokañy hag̃ua pe añetegua umi héntegui. 19  Opa mbaʼe ikatúva jaikuaa Ñandejáragui, haʼekuéra oikuaa porã, Ñandejára voi ohechaukágui chupekuéra. 20  Añetehápe ndaikatúiramo jepe ojehecha Ñandejárape, ko múndo ojejapo ypy guive, hembiapokuére umi hénte ikatu ohecha mbaʼeichaguápa haʼe, ohecha ipodér opaʼỹva ha haʼeha Ñandejára, upévare haʼekuéra ndaikatúi onega Haʼe oĩha. 21  Ha oikuaáramo jepe hikuái Ñandejárape, nombotuichái ni ndoagradeséi chupe, upéva rangue opensa vyroreírente ha ikorasõnguéra ñembotavy iñypytũ chuguikuéra. 22  Heʼíramo jepe ijehe iñaranduha, itavyeterei hikuái, 23  ha ombotuicha rangue Ñandejárape, oikovéva opa árare, ombotuicha hikuái yvypóra* raʼanga ha avei guyrakuéra, umi mymba cuatro ipýva ha umi yvýre otyryrýva raʼanga. 24  Haʼekuéra oikose rupi iñakãre, Ñandejára oheja chupekuéra oñemeʼẽ tekokyʼápe*, ha péicha omotĩ ha oapoʼi hikuái hete. 25  Haʼekuéra okambia pe añetegua oúva Ñandejáragui oguerovia hag̃ua umi japu, omombaʼeguasu ha oservi Ñandejára rembiapokuépe, omombaʼeguasu rangue opa mbaʼe Apoharépe. Chupe oñembotuicha vaʼerã opa ára g̃uarã. Taupéicha*. 26  Upévare Ñandejára oheja chupekuéra oiko mbaʼepota vai ñanembojeguarúva poguýpe, umi kuña oiko rangue kuimbaʼe ndive oiko kuñándi, jepe Ñandejára ndojapói chupekuéra upearã. 27  Upéicha avei umi kuimbaʼe ndoikovéima umi kuñándi, upéva rangue iñakãraku vaipa ojuehe, kuimbaʼe kuimbaʼéndi ojapo mbaʼe tieʼỹ, ha ojekastiga chupekuéra hembiapo vai haguére. 28  Haʼekuéra oimoʼã ndaideprovechoiha oikuaa porã Ñandejárape, upévare Haʼe oheja chupekuéra opensa umi mbaʼe vaíre, ha upévare ojapo hikuái umi mbaʼe ojejapoʼỹ vaʼerã. 29  Koʼãva ndahekojojái, hembiapo vai, itaryrýi, iñaña, iñenvidióso, oporojuka, oiko vai hapichándi, oporombotavy, oporotrata vai, ichismóso, 30  otaky* hapicháre, ndaijaʼéi Ñandejárare, notĩri voi, ijejapo, oñembotuicha, okalkula mbaʼe vai, naiñeʼẽrendúi ituvakuérape, 31  nontendéi mbaʼeve, opyrũ iñeʼẽre, ndohayhúi ihéntepe, ha ndoiporiahuverekói avavépe. 32  Haʼekuéra oikuaa porã Ñandejára Léi* heʼiha umi osegíva ojapo koʼã mbaʼe omano vaʼerãha, upéicharamo jepe, ojapo meme hikuái ha hiʼarive oguerohory umi ojapóvape.

Nóta

Ehecha “Apóstol”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Griégope heʼi: “che espíritu reheve”.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “yvypóra omanóva”.
Ehecha “Tekokyʼa”, diksionário oĩva ko Bíbliape.
Térã: “Amén”.
Ehecha “Blasfemia”, diksionário oĩva ko Bíbliape.
Ehecha “Léi”, diksionário oĩva ko Bíbliape.