Ehecha oĩva pype

Ehecha oĩva pype

Mateo 7:1-29

7  ”Anive pehusga pende rapichápe, ha Ñandejára napendehusgamoʼãi avei.  Cháke peẽ peporohusgaháicha pejehusgáta avei, ha pe medída peiporúva pende rapicháre ojeporúta avei penderehe.  Upéicharõ, ¿maʼerãpa repena pe kapiʼi oĩvare ne ermáno resápe, péro nderehechái pe víga oĩva nde resápe?  ¿Mbaʼéicha piko eréta ne ermánope: ‘Anohẽmíta ndéve pe kapiʼi oĩva nde resápe’, ha ¡péina!, nde voi nderehechái pe víga oĩva nde resápe?  ¡Tekove rovamokõi! Enohẽ raẽna pe víga nde reságui, ha upépe ae rehecha porãta mbaʼéichapa renohẽta pe kapiʼi ne ermáno reságui.  ”Ani pemeʼẽ jaguápe umi mbaʼe oñemboykéva Ñandejárape g̃uarã, ha ani peity pende pérla umi kurépe, ani hag̃ua opyrũmba hese ha upéi ojere penelastima vaipa.  ”Pesegi pejerure, ha oñemeʼẽta peẽme; peheka meme, ha petopáta; pesegi pembota pe okẽ, ha ojavríta peẽme.  Opaite ojerurévape ningo oñemeʼẽ; opavave ohekáva katu ojuhu; ha entéro ombotávape pe okẽ ojavri.  ¿Máva piko oĩ pende apytépe itaʼýra ojeruréramo chupe pan, omeʼẽtava chupe ita? 10  Térã ojeruréramo peteĩ pira, nomeʼẽmoʼãingo chupe peteĩ mbói, ¿ajépa? 11  Peẽ peneñañáramo jepe, pemeʼẽ rregálo iporãva pende raʼykuérape, ¡koʼytevéntema upéicharõ pende Ru oĩva yvágape omeʼẽta mbaʼe porã umi ojerurévape chupe! 12  ”Opa mbaʼe peẽ peipotáva ojapo penderehe pende rapichakuéra, peẽ pejapo vaʼerã avei hesekuéra. Añetehápe upéva hína la omboʼéva pe Léi* ha umi Profetakuéra*. 13  ”Peikékena pe okẽ ipoʼívarupi; cháke tuicha hína pe tape oporogueraháva ñehundípe, ha heta umi upérupi ohóva. 14  Péro michĩ pe okẽ ha ipoʼi pe tape oporogueraháva jeikove opaveʼỹvape, ha saʼi umi ojuhúva upe tape. 15  ”Peñangarekóke pendejehe, cháke oĩta proféta japu oúva pene rendápe ovecharamoguáicha, péro añetehápe haʼekuéra hína lóvo ñembyahýi. 16  Hembiapokuére pepilláta chupekuéra. Ndaikatúi ñamonoʼõ parrál ñanágui térã ígo ñuatĩgui, ¿ajépa? 17  Upéicha avei, opa yvyramáta iporãva hiʼa porãiterei, ha opa yvyramáta hasýva hiʼa vai. 18  Ndaikatúingo peteĩ yvyramáta iporãva hiʼa vai, térã peteĩ yvyramáta hasýva hiʼa porã. 19  Opa yvyramáta ndahiʼaporãiva ojeity ha ojepoi tatápe. 20  Añetehápe, hembiapokuére peikuaáta umi kuimbaʼépe. 21  ”Naentéroi heʼíva chéve: ‘Che Ruvicha, che Ruvicha’, oikéta pe Rréino yvagapeguápe. Oikéta guei, upe ojapóva che Ru yvagapegua rembipota. 22  Upe díape oĩta heta heʼíva chéve: ‘Che Ruvicha, che Ruvicha, ore ningo roñeʼẽ nde rérape ha nde rérape romosẽ umi demóniope* ha nde rérape rojapo heta milágro’. 23  Upéicharamo jepe, upévo haʼéta chupekuéra: ¡Che ndapoikuaái! ¡Tapeho koʼágui peẽ mbaʼe vai apoha! 24  ”Mayma cherendúva ha ojapóva che haʼéva ojogua peteĩ kuimbaʼe iñarandúvape, ojogapóva ita ári. 25  Ha upéi ou peteĩ ama guasu, pe y tuicha ojupi, oipeju peteĩ yvytu hatãitereíva ha ojejapete pe ógare, péro noñehundíri oñemopyenda rupi ita ári. 26  Mayma ohendúva che ñeʼẽ ha ndojapóiva katu ojogua peteĩ kuimbaʼe oñembotavývape, ojogapóva yvykuʼi ári. 27  Ha upéi ou peteĩ ama guasu, pe y tuicha ojupi, oipeju peteĩ yvytu hatãitereíva, ojejapete pe ógare, oitypa ha oñehundiete”. 28  Jesús heʼipa rire koʼã mbaʼe, umi hénte ijurujaipa opytávo ohendúgui mbaʼeichaitépa oporomboʼe; 29  upe haʼe omboʼéva ou rupi Ñandejáragui*, ndahaʼeiete umi mboʼehára leipegua* ojapoháicha.

Nóta

Ehecha “Léi”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Griégope heʼi: “ojapoháicha peteĩ orekóva autorida”.
Ehecha “Mboʼehára Leipegua”, diksionário oĩva ko Bíbliape.