Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 6:1-34

6  ”Peñatendéke ani pejapo iporãva opavave renondépe pejechauka hag̃uánte, upéicha pejapóramo pende Ru oĩva yvágape nomyengoviamoʼãi peẽme mbaʼeve.  Upévare reipytyvõ jave oikotevẽvape ani reiko remombeʼu opárupi* ojapoháicha umi hovamokõiva. Haʼekuéra ningo ojapo upéicha umi kállere ha sinagogahárupi*, oipotágui oñembotuicha chupekuéra. Añetehápe haʼe peẽme, umívape ombotuicha hapichakuéra, péro upévante la oñemeʼẽtava chupekuéra*.  Nde katu reipytyvõ jave oikotevẽvape, ejapónte avave oikuaaʼỹ rehe.  Péicha nde Ru ohecháva* opa mbaʼe rejapóva ñemiháme, omyengoviáta ndéve.  ”Avei peñemboʼe jave ndapejapói vaʼerã ojapoháicha umi hovamokõiva, haʼekuéra oñemboʼy oñemboʼe hag̃ua sinagogahárupi ha osẽ oñemboʼe umi tape guasu eskínare, opavave ohecha hag̃uáicha chupekuéra. Añetehápe haʼe peẽme, haʼekuéra ovyʼa ojechauka haguére, péro upévante la oñemeʼẽtava chupekuéra.  Nde katu reñemboʼéta jave, eike nde kotýpe ha remboty rire ne rokẽ, eñemboʼe nde Ru yvagapeguápe*. Upéicha nde Ru ohecháva opa mbaʼe, omyengoviáta ndéve.  Reñemboʼe jave ani ere jey jey peteĩ mbaʼénte, ojapoháicha umi tetã ambuegua. Haʼekuéra oimoʼã oñemboʼe puku haguére Ñandejára ohendutaha chupekuéra.  Aníkena pejapo haʼekuéraicha avei, pende Ru Ñandejára ningo oikuaáma voi mbaʼépa peikotevẽ pejerure mboyve jepe chupe.  ”Peẽ katu peñemboʼe vaʼerã kóicha: ”‘Ore Ru reiméva yvágape, toñemomarangatu nde réra. 10  Tou ne Rréino, tojejapo ne rembipota yvy ape ári yvagapeguáicha. 11  Emeʼẽna oréve ore rembiʼurãmi* ko árape g̃uarã. 12  Eperdona oréve upe rodevéva, ore roperdonaháicha avei umi odevévape oréve. 13  Ani reheja roʼa mbaʼe vaípe, orepeʼa guei aña poguýgui’. 14  ”Peperdonáramo pende rapichápe hembiapo vaikue, pende Ru yvagapegua operdonáta avei peẽme pene rembiapo vaikue. 15  Péro napeperdonáiramo pende rapichápe hembiapo vaikue, pende Ru yvagapegua noperdonamoʼãi avei peẽme pene rembiapo vaikue. 16  ”Peajuna jave, ani peiko penderova ñembyasy ojapoháicha umi hovamokõiva. Haʼekuéra ningo ojapo upéicha umi hénte ohecha hag̃ua oajunaha hikuái. Añetehápe haʼe peẽme, umíva ovyʼa ojechauka haguére, péro upévante la oñemeʼẽtava chupekuéra. 17  Nde katu reajuna jave emona aséite ne akãre* ha ejovahéi. 18  Péicha nde rapichakuéra ndohechakuaamoʼãi reajunaha, ha nde Ru yvagapegua ohecháta. Ha nde Ru ohecháva opa mbaʼe, omyengoviáta ndéve. 19  ”Anive pembyaty mbaʼerepy ko yvy ape ári, ikatutahápe havẽmba ha vícho hoʼupa pendehegui, térã mondaha ou oike mbaretépe ha oguerahapa pendehegui. 20  Upéva rangue, pembyaty mbaʼerepy yvágape. Upépe nahavẽmoʼãi, ndoʼumoʼãi vícho ha umi mondaha ndoikemoʼãi mbaretépe ogueraha pendehegui. 21  Cháke ne mbaʼerepy oĩháme, upépe avei oĩta ne korasõ. 22  ”Nde resa ningo peteĩ lámpara ohesapéva nde rete. Upévare, nde resa ojesarekóramo peteĩ mbaʼérente, nde rete kompletoite avei omimbipáta. 23  Nde resa iñañáramo katu, nde rete kompletoite avei oĩta pytũmbýpe. Añetehápe, nde resa omoypytũramo ohesape rangue, ¡upépe nde rete kompletoite oikótama pytũmbyetépe! 24  ”Avave ndaikatúi ombaʼapo tembiguáiramo mokõi patrónpe g̃uarã. Peteĩme ohayhúta ha pe ótrore ndaijaʼemoʼãi, peteĩre ojepokuaavéta ha pe ótrope omboykéta. Upéicha avei, peẽ ndaikatúi peiko Ñandejára rembiguáirõ ha avei peiko pláta rapykuéri. 25  ”Upévare che haʼe peẽme: Anive pejepyʼapyeterei pendejehe*, peikuaaségui mbaʼépa pekarúta ha pemboyʼúta, térã mbaʼépa pemondéta. ¿Ndovalevéingaʼu piko pende rekove* pe tembiʼúgui ha pende rete umi aógui? 26  Pemaña porãmína umi guyra yvagapeguáre, haʼekuéra noñemitỹi, nomonoʼõi ha nombyatýi galpónpe* hembiʼurã, péro Itúva yvagapegua omongaru chupekuéra. ¿Ndapevalevéingaʼu piko peẽ chuguikuéra? 27  ¿Máva piko pende apytépe ojepyʼapyetereíramo ikatúta ombopukumie hekove? 28  Avei, ¿mbaʼére piko peikóta pejepyʼapy pemonde vaʼerãre? Pemañamíntena umi lírio oĩva ñúre, mbaʼéichapa okakuaa, haʼekuéra nombaʼapói ni ndojapói ijaorã; 29  péro che haʼe peẽme, ni Salomón haʼéramo guare pe mburuvicha iplatavéva, noñemondéi vaʼekue haʼekuéraicha. 30  Ñandejára péicha omondéramo umi ñana okakuaáva ñúre, koestedía oĩva koʼápe ha koʼẽrõ ojepoíva tatakuápe, ¿mbaʼéicha piko pejeroviaʼiete ha ndapehechakuaái koʼytevéntema haʼe omeʼẽtaha peẽme pende aorã? 31  Upévare, aníke arakaʼeve pejepyʼapyeterei ha peje: ‘¿Mbaʼe piko roʼumíta?’, térã ‘¿mbaʼépa romboyʼúta?’, térã ‘¿mbaʼéiko romondéta?’. 32  Koʼã mbaʼe rapykuéri ningo oiko tarovaite umi hénte oĩva ko múndope*. Pende Ru yvagapegua oikuaa voi peẽ peikotevẽha opa koʼã mbaʼe. 33  ”Pemotenonde meméke Ñandejára Rréino ha ihustísia, ha opa koʼã mbaʼe oñemeʼẽta avei peẽme. 34  Upévare, ani pejepyʼapyeterei koʼẽrõ g̃uarãre, koʼẽrõko oĩta voi hína ambue jepyʼapy. Káda día ñambohovái vaʼerã voi heta mbaʼe vai.

Nóta

Griégope heʼi: “ani rembopu trompéta”.
Ehecha “Sinagóga”, diksionário oĩva ko Bíbliape.
Griégope heʼi: “chupekuéra oñemyengoviapaitéma”.
Griégope heʼi: “omañáva ñemiháme”.
Térã: “nde Ru avave ikatuʼỹvape ohecha”.
Griégope heʼi: “pan”.
Umi hudío omoĩ vaʼekue aséite iñakãre oñemoporã hag̃ua.
Griégope heʼi: “pene álma rehe”. Ehecha “Álma”, Informasión Oĩvéva 7A-pe.
Griégope heʼi: “pene álma”.
Térã: “sílope”.
Ehecha “Múndo”, diksionário oĩva ko Bíbliape.