Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 5:1-48

5  Jesús ohechávo umi henteita, ojupi pe sérrope ha oguapy rire ou hendápe idisipulokuéra*.  Upémarõ haʼe oñepyrũ omboʼe chupekuéra heʼívo:  “Ovyʼa umi ohechakuaáva oikotevẽha Ñandejárare, imbaʼekuéra hína pe Rréino yvagapegua.  ”Ovyʼa umi oñembyasýva, upéi oñekonsoláta chupekuéra.  ”Ovyʼa umi ndaipochyreíriva, Ñandejára omeʼẽta chupekuéra ko yvy.  ”Ovyʼa umi oipotaitereíva* oĩ hustísia, umívape oñemeʼẽta ojeruréva.  ”Ovyʼa umi oiporiahuverekóva hapichápe, chupekuéra ojeporiahuverekóta avei.  ”Ovyʼa umi ipyʼapy potĩva, haʼekuéra ohecháta Ñandejárape.  ”Ovyʼa umi ipyʼaguapýva, chupekuéra oñehenóita Ñandejára raʼy. 10  ”Ovyʼa umi ojepersegíva ojapo haguére iporãva, imbaʼekuéra hína pe Rréino yvagapegua. 11  ”Pevyʼa oĩramo otakýva penderehe, pendepersegíva, ha oikóva heʼi rei penderehe opaichagua mbaʼe vai che káusare. 12  Pendepyʼarory ha pevyʼaitereíkena péicha jave, ha penemanduʼa yvágape oĩha peteĩ rregálo tuichaitereíva peẽme g̃uarã. Penemanduʼa avei yma upéicha ojepersegi hague umi profétape*. 13  ”Peẽ ningo jukýicha ko yvy ape ári. Péro pe juky naheʼẽvéiramo, ¿mbaʼéicha piko ñamoheʼẽ jeýta? Ndovalevéima mbaʼeverã, ha oñemombótamante okápe oñepyrũmba hag̃ua hese. 14  ”Peẽngo mbaʼerendýicha hína ko múndope*. Peteĩ siuda oĩva sérro ári katuete ojehecháta. 15  Ñamyendy rire peteĩ lámpara nañamoingéi kanásto guýpe, jahupi guei yvate ohesape hag̃ua umi ogayguápe. 16  Upéicha avei peẽ pehesape vaʼerã umi hénte renondépe, haʼekuéra ohecha hag̃ua umi mbaʼe porã pejapóva ha ombotuicha pende Ru oĩva yvágape. 17  ”Ani peimoʼã aju hague ahundi pe Léi* térã umi Proféta ohai vaʼekue. Che aju akumpli hag̃ua, ndahaʼéi ahundi hag̃ua. 18  Añetehápe haʼe peẽme, yvága ha yvy ikatu ohasa, péro ni mbaʼevéicharõ ndopytareimoʼãi ni peteĩ letraʼi ni pe párte michĩvéva oĩva pe Léipe, oikopa peve opa koʼã mbaʼe. 19  Upévare, oimeraẽ omboykéva peteĩ mandamiénto michĩvéva jepe ha omboʼéva hapichakuérape omboyke hag̃ua avei, ojerekóta michĩvévaramo pe Rréino yvagapeguápe. Ha upe okumplíva ha omboʼéva katu, ojerekóta tuichavévaramo pe Rréino yvagapeguápe. 20  Upévare haʼe peẽme, ndapehechaukáiramo penderekojojaveha umi mboʼehára leipegua* ha fariseokuéragui*, ni mbaʼevéicharõ ndapeikemoʼãi pe Rréino yvagapeguápe. 21  ”Peẽ pehendu ojeʼe hague umi yma guarépe: ‘Ndovaléi reporojuka, cháke oimeraẽ oporojukáva ojegueraháta trivunálpe ojehusga hag̃ua’. 22  Che katu haʼe peẽme: Entéro osegíva ipochy vai iñermánondi, ojegueraháta trivunálpe ojehusga hag̃ua. Ha oimeraẽva iñeʼẽ arhél ha oapoʼíva iñermánope ojegueraháta pe Trivunál Tuichavéva renondépe. Ha oimeraẽ heʼíva: ‘¡Nde tekove rovatavy, nderevaléi mbaʼeverã!’, upéva ikatu oho tatarendýpe Gehénape*. 23  ”Upévare, regueraha jave nde jopói pe altárpe* nemanduʼáramo ne ermáno ipochyha nderehe, 24  eheja nde jopói pe altár renondépe, ha tereho eñemoĩ porã raẽ ne ermánondi, upéi ae eju emeʼẽ nde jopói. 25  ”Oĩrõ nedemandáva ha ndegueraha hína trivunálpe, eñehaʼã pyaʼe eiko porã jey hendive tapére. Ani ág̃a pe nedemandáva nemeʼẽ huéspe, ha pe hués nemeʼẽ pe guárdiape, ha rejegueraha kárselpe. 26  Añetehápe haʼe ndéve upégui katu neresẽichéne, repagapa peve pe pláta* redevéva. 27  ”Peẽ pehendu ojeʼe hague: ‘Ndovaléi reporomoakãratĩ’. 28  Che katu haʼe peẽme: Entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩma hína. 29  Upévare, peteĩ nde resa nemoñepysangáramo, eipeʼa ha emombo. Iporãve ningo oñehundi peteĩ párte nde retégui, oñehundi rangue nde rete kompletoite Gehénape. 30  Avei nde po derécha nemoñepysangáramo, eikytĩ ha emombo. Iporãve ningo oñehundi peteĩ párte nde retégui, oñehundi rangue nde rete kompletoite Gehénape. 31  ”Avei ojeʼe vaʼekue: ‘Oimeraẽ ojedivorsiáva hembirekógui omeʼẽ vaʼerã chupe peteĩ dokuménto heʼíva ojedivorsiaha’. 32  Che katu haʼe peẽme: Entéro ojedivorsiáva hembirekógui ndahaʼéiramo hekovai* haguére, omyaña hína hembirekópe omoakãratĩ hag̃ua chupe. Ha oimeraẽ omendáva peteĩ ojedivorsia vaʼekuére oporomoakãratĩ hína. 33  ”Peẽ peikuaa avei ojeʼe hague umi yma guarépe: ‘Ani rehura ha upéi repyrũ ne ñeʼẽre, upe repromete vaʼekue Jehovápe* katuete rekumpli vaʼerã’. 34  Che katu haʼe peẽme: Ni mbaʼevéicharõ ani pehura, ni yvágare, cháke upéva hína Ñandejára tróno. 35  Ani pehura yvýre, upéva hína Ñandejára pyrenda; ani pehura Jerusalénre, upéva hína Mburuvicha guasu siuda. 36  Ni ne akãre ani rehura, cháke nde ndaikatúi ni peteĩ ne akãrague remomorotĩ térã remohũ. 37  Pejéramo pejapotaha peteĩ mbaʼe, pejapo vaʼerã, ha pejéramo ndapejapomoʼãiha, anítei pejapo, cháke oimeraẽ mbaʼe pemoĩvéva upévape, oúma pe añágui. 38  ”Peẽ peikuaa ojeʼe hague: ‘Oimeraẽ ohesamombúva hapichápe, toñehesamombu avei chupe. Térã oitýva hapichágui hãi, tojeity avei chugui’. 39  Che katu haʼe peẽme: Ani peñemoĩ iñañávare, upéva rangue, oĩramo nderovapetéva un ládo, emoĩ avei chupe pe ótro ládo. 40  Ha oĩramo ndeguerahaséva trivunálpe oipeʼa hag̃ua ndehegui peteĩ nde ao, eheja togueraha avei nde ao joʼaha. 41  Ha peteĩ mburuvicha oguerahaukaséramo ndéve ikárga un kilómetro, tereho hendive dos kilómetro. 42  Oĩramo ombaʼejeruréva ndéve, emeʼẽ chupe, ha oĩramo oiporuséva ndehegui pláta, ani remboty chugui ne rokẽ. 43  ”Peẽ peikuaa ojeʼe hague: ‘Rehayhu vaʼerã nde rapichápe, ha nderechaʼéi vaʼerã ne enemígore’. 44  Che katu haʼe peẽme: Akóintekena pehayhu pene enemigokuérape ha peñemboʼe umi pendepersegívare. 45  Péicha pehechaukáta peẽ haʼeha pende Ru yvagapegua raʼy, haʼe ningo oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã. 46  Pehayhúramo umi penderayhúvapente, ¿mbaʼére guaʼu oñemyengoviáta peẽme? ¿Ndojapóingaʼu piko upéicha avei umi impuésto kovraha? 47  Ha pesaludáramo pene ermanokuérapente, ¿peimoʼã piko upéva tuichaiterei mbaʼeha? ¿Umi tetã ambuegua piko ndojapói avei upéicha? 48  Pende Ru yvagapegua ningo perfékto, ha peẽ perfékto vaʼerã avei.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “iñembyahýi ha ijyʼuhéi”.
Ehecha “Profesía”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Gehena”, Informasión Oĩvéva 9-pe.
Ehecha “Altár”, diksionário oĩva ko Bíbliape.
Griégope heʼi: “peteĩ kuadránte”. Péva haʼe vaʼekue peteĩ monéda saʼieterei ovaléva.
Ehecha “Tekovai”, Informasión Oĩvéva 4-pe.
Ehecha Informasión Oĩvéva 1.