Ehecha oĩva pype

Ehecha oĩva pype

Mateo 4:1-25

4  Upéi, Ñandejára espíritu ogueraha Jesúspe desiértore ha pe Aña* ou omoñuhã hag̃ua chupe.  Jesús ndoʼúi mbaʼevete cuarenta día aja, ha iñembyahyieterei.  Upémaramo pe Aña oñehaʼãmbaite oity chupe ñuhãme heʼívo: “Ndéramo añete Ñandejára raʼy, ejapo koʼã itágui pan”.  Ha haʼe ombohovái chupe: “Ñandejára Ñeʼẽme ojehai: ‘Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová* heʼívare’”.  Upémaramo pe Aña ogueraha Jesúspe Jerusalénpe* ha ohupi chupe pe témplo murálla ári,  ha heʼi chupe: “Oiméramo nde Ñandejára raʼy, ejepoi koʼágui. Ñandejára Ñeʼẽme ojehai: ‘Haʼe omandáta hiʼanhelkuérape nderupi hag̃ua ipópe, ani hag̃ua arakaʼeve reñepysanga itáre’”.  Jesús ombohovái chupe: “Ñandejára Ñeʼẽme ojehai avei: ‘Ndovaléi rejapo mbaʼeve redesafia hag̃ua nde Jára Jehovápe’”.  Upéi pe Aña ogueraha Jesúspe peteĩ sérro ijyvatetereívape, ha ohechaukapaite chupe umi goviérno oĩva ko yvy ape ári ha umi mbaʼe porãita orekóva,  ha heʼi chupe: “Koʼã mbaʼe ameʼẽmbaitéta ndéve reñesũramo che renondépe ha una vemi jepe chemombaʼeguasu”. 10  Upévo Jesús osẽ heʼi chupe: “¡Tereho koʼágui Satanás*! Ñandejára Ñeʼẽme ojehai rupi: ‘Ñandejára Jehovápe readora vaʼerã ha chupe añoite reservi vaʼerã’”. 11  Upémaramo pe Aña oheja chupe, ha ¡péina!, ou umi ánhel oñatende hag̃ua hese. 12  Upéi Jesús oikuaávo ojegueraha hague préso Juánpe, oho Galiléape. 13  Ha osẽ rire Nazarétgui, oho oiko Capernáumpe pe mar kóstare, oĩháme Zabulón ha Neftalí yvy, 14  oñekumpli hag̃ua Ñandejára heʼi vaʼekue proféta* Isaías rupive: 15  “¡Peẽ peikóva Zabulón ha Neftalí yvýpe, peiméva pe tape mar gotyo ohóvape, Jordán jahasávo, Galilea oikohápe umi tetã ambuegua! 16  Umi hénte oĩva pytũmbýpe ohecha peteĩ mbaʼerendy tuicháva, ha umi hénte oguapýva pe ñemano ojahoʼihápe chupekuéra ohecha pe mbaʼerendy ohesapeha hesekuéra”. 17  Upe ára guive Jesús oñepyrũ opredika ha heʼi: “Peñarrepentíke*. Cháke pe Rréino yvagapegua hiʼag̃uimbaitéma”. 18  Upéi, oguatávo ohóvo pe mar de Galilea rembeʼýre, Jesús ohecha mokõi kuimbaʼe oñoermánova: Simón oñehenóiva avei Pedro, ha Andrés. Haʼekuéra ningo peskadór ha oity hína irréd márpe. 19  Ha haʼe heʼi chupekuéra: “Peju chemoirũ ha pomboʼéta pejagarra hag̃ua hénte, pejagarraháicha pira”. 20  Upepete oheja hikuái irréd ha oho hendive. 21  Ohomiévo upégui ohecha Santiago ha Juánpe, haʼéva oñoermáno; haʼekuéra ningo Zebedeo raʼy ha oĩ pe kanóape itúvandi, orremenda hína umi rred. Chupekuéra Jesús ohenói avei. 22  Upepete haʼekuéra oheja pe kanóa ha itúvape, ha oho Jesús ndive. 23  Ha okorre Galilea tuichakuére, omboʼe umi sinagogahárupi* ha omombeʼu umi marandu porã* oñeʼẽva Ñandejára Rréinore. Avei omonguera opaichagua mbaʼasy orekóva umi hénte. 24  Ha umi mbaʼe haʼe ojapóva ojekuaa Siria peve. Ha ojegueru hendápe entéro oĩ vaíva, orekóva opaichagua mbaʼasy ha umi ohasa asyetereíva, endemoniádo, epiléptiko ha paralítiko; ha haʼe omonguera chupekuéra. 25  Upévare oho hendive hetaiterei hénte oúva Galilea, Decápolis*, Jerusalén, Judea ha rrío Jordán pe ótro ládogui.

Nóta

Térã: “Diablo”, ehecha diksionário oĩva ko Bíbliape.
Ehecha Informasión Oĩvéva 1.
Griégope heʼi: “siuda marangatúpe”.
Ehecha “Satanás”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Decápolis”, diksionário oĩva ko Bíbliape.