Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 3:1-17

3  Upe rire ou Juan el Bautista pe desiértore oĩva Judéape ha opredika,  heʼívo: “Peñarrepentíke*, cháke pe Rréino yvagapegua hiʼag̃uimbaitéma”.  Proféta* Isaías oñeʼẽ vaʼekue Juan rehe heʼírõ guare: “¡Pehendúke!, oĩ osapukáiva pe desiértore: ‘Pepreparáke Jehová* rape, pembojoja asy pe tape oĩva henonderã’”.  Juan ningo omonde ao ojejapo vaʼekue kaméllo raguekuégui ha isínto katu kuérogui. Haʼe hoʼu tuku ha eirete ñu.  Upévo umi hénte oĩva Jerusalénpe, ha enterove umi oikóva Judéape ha pe Jordán jerére oho hendápe.  Ha Juan ovautisa* chupekuéra rrío Jordánpe, ha omombeʼupaite hikuái ipekádo.  Upéi Juan ohechávo ouha avei heta fariséo* ha saduséo* haʼe oporovautisahápe, heʼi chupekuéra: “Peẽ mbói ñemoñare, ¿máva piko heʼi peẽme ikatutaha pekañy Ñandejára ára pochýgui?  Peheja pene rembiapo vai ha pehechauka peñarrepentiha.  Ha animoʼãke peje pendejupe: ‘Ore ru ningo Abrahán’. Che haʼe peẽme Ñandejára ikatuha koʼã itágui jepe omopuʼã Abrahánpe ifamiliarã. 10  Pe hácha oĩma hína oikytĩ hag̃uáicha umi yvyramáta hapo guive. Upévare, entéro yvyramáta ndahiʼaporãiva ojeitýta ha ojepoíta tatápe. 11  Che povautisa ýpe peñarrepenti rupi. Che rire oútava katu imbareteve hína chehegui ha namereséi ni isandália aipeʼa chupe. Haʼe pendevautisáta espíritu sánto* ha tatápe. 12  Ipópe oreko pe trígo omboveveha, omopotĩmbaitéta pe lugár ikóga ojykyiha ha oñongatúta itrígo galpónpe*. Ha pe hakãngue katu ohapýta tata ikatuʼỹvape oñembogue”. 13  Upéi Jesús ou Galiléagui rrío Jordánpe Juan ovautisa hag̃ua chupe. 14  Juan katu ojokose chupe heʼívo: “Che ningo la aikotevẽva nde chevautisa, ¿ha piko nde reju che rendápe?”. 15  Jesús ombohovái chupe: “Anína chejokosétei, péichamante ikatúta jajapopa porã Ñandejára oipotáva”. Upémarõ haʼe ndojokovéima chupe. 16  Ha Jesús ojevautisa rire, upepete osẽ pe ýgui, ha ¡péina!, pe yvága ojavri, ha Juan ohecha mbaʼéichapa Ñandejára espíritu oguejy hiʼári peteĩ palómaicha. 17  Ha ¡péina!, oñehendu avei peteĩ oñeʼẽva yvágagui ha heʼíva: “Kóva hína che Raʼy ahayhuetéva ha aguerohorýva”.

Nóta

Ehecha “Arrepentimiénto”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha Informasión Oĩvéva 1.
Ehecha “Vautísmo”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Saduséo”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “sílope”.