Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 28:1-20

28  Ohasa rire pe sábado, koʼẽtĩ jave pe semána oñepyrũha díape, María Magdalena ha pe ótra María ou ohecha pe sepultúra.  Ha ¡péina!, oiko raʼe peteĩ yvyryrýi tuicháva. Jehová* ánhel oguejy yvágagui, oipeʼa pe ita ombotýva pe sepultúra ha oguapy hína hiʼári.  Pe ánhel omimbi araveráicha ha ijao katu morotĩ sakã.  Okyhyjégui chugui, umi guárdia oryrýi osusũ ha opyta ku omanorõguáicha.  Pe ánhel katu heʼi umi kuñáme: “Ani pekyhyjétei, che aikuaa pehekaha Jesúspe, upe oñemosaingo vaʼekue yvyráre.  Haʼe ndaipóri koʼápe, oñemopuʼãma chupe, haʼe heʼi haguéicha. Pejúnte pemaña pe lugár oñemoĩ hague.  Ha tapeho pyaʼe porã pemombeʼu idisipulokuérape* oñemopuʼã jey hague chupe omanóva apytégui. Ha ¡péina!, haʼe ohóma hína pene renonderã Galiléape. Upépe pehecháta chupe. Kóva hína pe notísia aguerúva peẽme”.  Umi kuña pyaʼe osẽ upe sepultúra oĩhágui. Ha oñemondýiramo jepe, vyʼapópe odipara oho omombeʼu Jesús disipulokuérape pe oikóva.  Ha ¡péina!, Jesús oñug̃uaitĩ hendivekuéra ha heʼi: “¡Mbaʼéichapa penekoʼẽ!”. Upévo haʼekuéra oñemboja hendápe, oñakarama ipýre ha omombaʼe* chupe. 10  Jesús katu heʼi chupekuéra: “¡Ani pekyhyje! Tapeho pemombeʼu che ermanokuérape, ha toho hikuái Galiléape cherecha hag̃ua”. 11  Umi kuña oho aja, umi guárdia oho pe siudápe ha omombeʼu umi saserdóte ruvichakuérape* opa mbaʼe oiko vaʼekue. 12  Upémarõ koʼãva oñembyaty umi karai guasukuéra ndive ha oñemoĩ peteĩ ñeʼẽme omeʼẽ hag̃ua heta porã pláta umi soldádope. 13  Ha heʼi chupekuéra: “Peje vaʼerã: ‘Idisipulokuéra ou omonda hetekue pyhare roke aja’. 14  Ha peichahágui pe governadór oikuaáramo, anínte pejepyʼapy mbaʼevére. Pehejánte ore kárgope, ore roñeʼẽta hendive”. 15  Upémarõ umi soldádo ojagarra pe pláta ha ojapo ojeʼe haguéicha chupekuéra. Ko kuénto isarambi umi hudío apytépe koʼág̃a peve. 16  Umi once disípulo katu oho Galiléape, pe sérro Jesús heʼi haguépe chupekuéra. 17  Ha ohechávo hikuái Jesúspe omombaʼe chupe, péro oĩ avei umi ipyʼamokõiva. 18  Upévo Jesús oñemboja hendapekuéra ha heʼi: “Opa mbaʼe oĩva yvágape ha yvy ape ári oñemoĩ che poguýpe. 19  Upévare, tapeho pemboʼe umi hénte opa tetãyguápe oiko hag̃ua chuguikuéra che disípulo; ha pevautisa* Túva, Taʼýra ha espíritu sánto* rérape. 20  Ha pemboʼe chupekuéra ojapo hag̃ua opa mbaʼe amanda vaʼekue peẽme. Ha ¡péina!, aiméta penendive opa ára, og̃uahẽ meve huʼãme ko múndo* ára paha”.

Nóta

Ehecha Informasión Oĩvéva 1.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “oñesũ”. Yma péicha ojehechauka oñemombaʼeha peteĩ tapichápe.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Múndo”, diksionário oĩva ko Bíbliape.