Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 25:1-46

25  ”Upéicharõ pe Rréino yvagapegua ojogua diez kuñataĩme* ojagarráva ilámpara ha osẽva ohug̃uaitĩ pe nóviope.  Umíva apytépe oĩ cinco oñembotavýva ha cinco iñarandúva.  Umi oñembotavýva ogueraha la ilámpara, péro ndorahái aséite,  umi iñarandúva katu oraha ilámpara ha aséite peteĩ mbaʼyrúpe.  Péro pe nóvio nog̃uahẽimarõ, enterovéva oñepyrũ orambi ha ipahápe opyta oke.  Upéi pyharepyte oñehendu peteĩ osapukáiva: ‘¡Koʼápe ou la nóvio! Pesẽ pehug̃uaitĩ chupe’.  Upévo enterove umi kuñataĩ opuʼã ha oprepara ilamparakuéra.  Umi oñembotavýva heʼi umi iñarandúvape: ‘Pemeʼẽna oréve michĩmi pende aséite, cháke la ore lámpara oguepotaitéma hína’.  Umi iñarandúva ombohovái chupekuéra: ‘Ikatu nañanderupytypái hína. Tapeho pejogua oñevendehágui penembaʼerã’. 10  Haʼekuéra oho aja ojogua, og̃uahẽ pe nóvio, ha umi kuñataĩ ojeprepara vaʼekue oike hendive pe kasamientohápe; ha pe okẽ oñemboty. 11  Upéi ou avei umi ótra kuñataĩ ha heʼi: ‘¡Karai, karai, eavrimína oréve!’. 12  Haʼe ombohovái chupekuéra: ‘Añetehápe haʼe peẽme, che ndapoikuaái’. 13  ”Upévare peñatende porãke peikóvo, cháke ndapeikuaái mbaʼe día ni mbaʼe óratapa. 14  ”Pe Rréino yvagapegua ojogua peteĩ karaípe oviahátava tetã ambuépe. Haʼe ohenoika hembiguaikuérape ha oheja ikargokuérape umi mbaʼeta orekóva. 15  Peteĩvape omeʼẽ cinco talénto*, ótrope mokõi ha ambuépe katu peteĩ, káda únope omeʼẽ pe ikatu vaʼerã ojapo, ha upéi oho tetã ambuépe. 16  Pe orekóva cinco talénto pyaʼe voi oho omombaʼapo ha oganave cinco talénto. 17  Péicha avei pe orekóva mokõi, oganave mokõi. 18  Péro pe oreko vaʼekue peteĩnte oho ojoʼo peteĩ yvykua ha upépe omokañy pe pláta ahéno. 19  ”Heta tiémpo rire ou jey pe karai ha ohenói umi hembiguáipe, oikuaa hag̃ua mbaʼépa ojapo hikuái pe plátagui. 20  Ha ou pe oreko vaʼekue cinco talénto ha oganave cinco, ha heʼi: ‘Che patrón, ndéngo remeʼẽ kuri chéve cinco talénto ha emañamína, aganave cinco talénto’. 21  Ipatrón heʼi chupe: ‘Oĩ porã, ¡ajépa ndeguápo che rembiguái ajeroviaha! Rejapo porã haguére umi tembiapo aheja vaʼekue nde kárgope, amoĩta nde poguýpe hetave mbaʼe. Evyʼa ne patrón ndive’. 22  Upéi ou pe oreko vaʼekue mokõi talénto ha heʼi: ‘Che patrón, ndéngo remeʼẽ kuri chéve mokõi talénto ha emañamína, aganave mokõi talénto’. 23  Ipatrón heʼi chupe: ‘Oĩ porã, ¡ajépa ndeguápo che rembiguái ajeroviaha! Rejapo porã haguére umi tembiapo aheja vaʼekue nde kárgope, amoĩta nde poguýpe hetave mbaʼe. Evyʼa ne patrón ndive’. 24  ”Ipahápe ou pe tembiguái orekóva peteĩ talénto ha heʼi: ‘Che patrón, chéngo aikuaa nde rejopyetereiha nde rapichándi, remonoʼõha nereñemitỹi haguépe, ha rembyatyha rembaʼapoʼỹ haguépe. 25  Upévare akyhyje, ha aha amokañy ne talénto yvyguýpe. Kóina ápe ne mbaʼéva’. 26  Upépe ipatrón ombohovái chupe: ‘Nde tembiguái aña, ateʼỹ reikóva, oimérõ reikuaa raʼe amonoʼõha nañemitỹi haguépe ha ambyatyha ambaʼapoʼỹ haguépe. 27  ¿Mbaʼére piko upéicharõ ndereguerahái raʼe che pláta vánkope? Upéicharire, ag̃uahẽvo oñemeʼẽ vaʼerãmoʼã chéve che pláta ha hetave voi katu. 28  ”’Upévare, peipeʼa chugui pe talénto ha pemeʼẽ pe orekóvape diez talénto. 29  Entéro oguerekóvape oñemeʼẽvéta, hetave oguereko hag̃ua, pe oguerekoʼỹvagui katu upe oguerekomíva jepe ojepeʼáta chugui. 30  Ha pe tembiguái ndovaléiva mbaʼeverã, pemombo amo okápe, pytũmbýpe. Upépe hasẽ soro ha ipyahẽta ñembyasýgui’. 31  ”Pe Yvypóra Raʼy* og̃uahẽ vove tuicha podér reheve entéro umi ánhel ndive, oguapýta itróno omimbipávape. 32  Ha opa tetãnguéra oñembyatýta henondépe, ha haʼe omoĩta umi héntepe mokõi atýpe, pe ovecharerekua oipeʼaháicha ovecha, kavarágui. 33  Omoĩta umi ovecha iderécha gotyo ha umi kavara ijiskiérda gotyo. 34  ”Upéi pe Rréi heʼíta umi oĩvape iderécha gotyo: ‘Peju peẽ che Ru ohovasa* vaʼekue ha pereko penembaʼerã pe Rréino ojeprepara vaʼekue peẽme g̃uarã, ko múndo* oñepyrũ guive. 35  Cheñembyahýi kuri ha peẽ chemongaru; cheyʼuhéi ha peẽ chemboyʼu. Ndachekuaáiramo jepe cherresivi torypápe pende rógape. 36  Cheopívo ha pemeʼẽ chéve che aorã. Cherasy ha peñangareko cherehe. Aime kárselpe ha peju che rendápe’. 37  Upérõ umi hekojojáva ombohováita chupe: ‘Che Ruvicha, ¿arakaʼe piko rohecha ñembyahýire ha romongaru, térã yʼuhéire ha romboyʼu? 38  ¿Arakaʼe piko rorresivi ore rógape torypápe ndoroikuaáiramo jepe, térã rohecha ndeopívo ha romonde? 39  ¿Arakaʼe piko rohecha raʼe nderasy térã reimeha kárselpe ha roho ne rendápe?’. 40  Pe Rréi ombohováita chupekuéra: ‘Añetehápe haʼe peẽme: Pejapóvo iporãva peteĩ koʼã che ermáno michĩvéva rehehápe jepe, cherehehápe pejapo hína’. 41  ”Upéi heʼíta umi ijiskiérda gotyo oĩvape: ‘Tapeho koʼágui, peẽ peñekondena peho hag̃ua tatarendy ogueʼỹvape arakaʼeve*, ojeprepara vaʼekue pe Aña* ha hiʼanhelkuérape g̃uarã. 42  Cheñembyahýi kuri ha peẽ nachemongarúi, ha cheyʼuhéi ha nachemboyʼúi. 43  Ndarekói kuri apyta hag̃ua ha ndacherresivíri torypápe, cheopívo ha nachemondéi; cherasy ha aime kárselpe péro napeñangarekói cherehe’. 44  Haʼekuéra ombohováita: ‘Che Ruvicha, ¿arakaʼe piko ore rohecha neñembyahýi, ndeyʼuhéi, ndereguerekói repyta hag̃ua, ndeopívo, nderasy térã reime kárselpe ha noroñatendéi nderehe?’. 45  Haʼe ombohováita chupekuéra: ‘Añetehápe haʼe peẽme: Napeipytyvõivo peteĩ koʼã michĩvévape jepe, chéve nachepytyvõi’. 46  Ha koʼãva oñehundíta opa ára g̃uarã, péro umi hekojojáva oikovéta opa ára g̃uarã”.

Nóta

Griégope heʼi: “vírhen”.
Ehecha “Talénto”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Térã: “ovendesi”. Ehecha “Vendisión”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
La Bíbliape ojeporu jepi pe ñeʼẽ tata ohechauka hag̃ua ñehundi opa ára g̃uarã. Ehecha Apc 19:20. Ehecha avei “Gehena”, Informasión Oĩvéva 9-pe.
Térã: “Diablo”, ehecha diksionário oĩva ko Bíbliape.