Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 23:1-39

23  Upéi, Jesús oñepyrũvo oñeʼẽ umi héntepe ha idisipulokuérape*, heʼi:  “Umi mboʼehára leipegua* ha fariseokuéra* heʼi ojeporavo hague chupekuéra ojapo hag̃ua pe tembiapo Moisés ojapo vaʼekue.  Upévare, opa mbaʼe heʼíva peẽme, pejapo vaʼerã. Anínte peiko oikoháicha hikuái. Haʼekuéra heʼi peteĩ mbaʼe, péro ndojapói pe heʼíva.  Ojokua hikuái umi kárga pohýi ha omoĩ hapichakuéra atiʼy ári, péro haʼekuéra ni ikuãʼíme nomomyiséi.  Opa mbaʼe ojapo hikuái ojechauka hag̃uánte. Upévare ombotuichave umi kahaʼi* omoĩva isyváre ha ijyváre. Avei ombopuku pukuve umi fléko oĩva ijaóre.  Oho jave karu guasuhápe oipota umi lugár iñimportantevéva. Ha umi sinagógape* katu, oguapyse tenondete.  Oipota ojesaluda chupekuéra umi plasahárupi*, ha enterove tohenói chupekuéra Mboʼehára*.  Peẽ katu ani peheja avave penerenói Mboʼehára. Pene Mboʼehára ningo peteĩnte, ha peẽ enterovéva oñoermáno.  Ha ani peje, ore ru* avavépe ko yvy ape ári. Peteĩnte pende Ru, oĩva yvágape. 10  Ani avei peheja avave heʼi peẽme ‘che ruvicha’. Pende Ruvicha ningo peteĩnte, haʼe hína Cristo. 11  Ha pe tuichavéva pende apytépe, oiko vaʼerã pene rembijokuáirõ. 12  Pe oñembotuichávape, ojeapoʼíta, ha pe oñemomirĩvape katu oñembotuicháta. 13  ”¡Aichejáranga peẽ mboʼehára leipegua ha fariseokuéra rovamokõi! Peẽngo pemboty pe Rréino yvagapegua umi héntegui. Peẽ voi ndapeikéi, ha ndapehejái oike umi oikesévape. 14*  —— 15  ”¡Aichejáranga peẽ mboʼehára leipegua ha fariseokuéra rovamokõi! Peikóva pehasa pe mar ha peguatáva mombyrymbyry pehekávo peteĩ jepe pende disipulorã*. Ha pehekomboʼe rire chupe katu iñañavéma pendehegui, ha upévare koʼýte omerese oho Gehénape*. 16  ”¡Aichejáranga peẽ mboʼehára resatũ! Peẽ ningo peje: ‘Oĩrõ ohuráva pe témplore upéva ndahaʼéi mbaʼeve; péro oĩrõ ohuráva pe óro templopegua rehe, upéva katu okumplímante vaʼerã iñeʼẽ’. 17  ¡Ajépa pendevýro, peẽ tekove resatũ! ¿Mbaʼe piko iñimportanteve? ¿Pe óro térãpa pe témplo omomarangatúva pe óro? 18  Peje avei: ‘Oĩrõ ohuráva pe altár* rehe, upéva ndahaʼéi mbaʼeve; péro oĩrõ ohuráva pe jopói oĩvare altár ári, upéva katu okumplímante vaʼerã iñeʼẽ’. 19  ¡Peẽ tekove resatũ! ¿Mbaʼe piko iñimportanteve? ¿Pe jopói, térãpa pe altár omomarangatúva pe jopói? 20  Pe altár rehe ohuráva, ohura hína hese ha opa mbaʼe oĩvare hiʼári. 21  Ha pe témplore ohuráva, ohura hína hese ha pe oikóvare upépe. 22  Ha pe yvágare ohuráva, ohura hína Ñandejára trónore ha pe oguapývare upépe. 23  ”¡Aichejáranga peẽ mboʼehára leipegua ha fariseokuéra rovamokõi! Peẽ ningo pemeʼẽ pe diésmo, jervavuéna, enéldo ha komínogui. Péro pemboyke umi mbaʼe iñimportantevéva oĩva pe Léipe*, umíva hína: tekojoja, poriahuvereko ha jerovia. Tekotevẽ añete pemeʼẽ diésmo, péro ndahaʼéi upe haguére pemboykétava koʼã mbaʼe. 24  ¡Peẽ mboʼehára resatũ peikóva peipeʼa pe ñatiʼũ, péro pemokõ pe kaméllo! 25  ”¡Aichejáranga peẽ mboʼehára leipegua ha fariseokuéra rovamokõi! Peẽ pemopotĩ pe kópa ha pláto ijapéguionte, péro hyepýpe henyhẽ taryrýigui ha umi mbaʼe pejapose tarovaitévagui pejejokoʼỹre. 26  Nde fariséo resatũ, emopotĩ raẽna pe kópa ha pe pláto hyepýguio, upéicharõ pe ijape ipotĩta avei. 27  ”¡Aichejáranga peẽ mboʼehára leipegua ha fariseokuéra rovamokõi! Peẽ ningo pejogua umi panteón oñepintávape*, ijapéguio haʼete ku iporãitereíva, hyepýpe katu henyhẽte umi omanóva kanguekue ha opaichagua mbaʼe kyʼágui. 28  Peẽ avei upéicha, haʼetévaicha ku penderekojojáva pende rapichakuéra renondépe, péro pende pyʼapy henyhẽ tovamokõi ha ñañágui. 29  ”¡Aichejáranga peẽ mboʼehára leipegua ha fariseokuéra rovamokõi! Peẽ ningo pemopuʼã umi profetakuéra* panteón, ha pemoporã umi hekojojáva sepultúra, 30  ha upéi peje: ‘Roikórire umi ore rukuéra ypykue tiémpope, noroipytyvõi vaʼerãmoʼã chupekuéra ojuka hag̃ua umi profétape’. 31  Ha péicha peẽ voi pemombeʼu peẽ haʼeha umi proféta jukahare família. 32  Upéicharõ, pemohuʼãmandi pende rukuéra ypykue omoñepyrũ vaʼekue. 33  ”Peẽ mbói ñemoñare, ¿mbaʼéicha piko ikatúta pekañy ani hag̃ua pejekastiga Gehénape? 34  Upévare, amondo pene rendápe profetakuéra, kuimbaʼe iñarandúva ha mboʼeharakuéra. Umíva peẽ pejukáta ha pemosaingóta yvyráre. Ótrope katu pembyepotíta umi sinagogahárupi ha pepersegíta chupekuéra opa umi siudahárupi. 35  Ha péicha oúta pende ári entéro hekojojáva ruguy oñeñohẽ vaʼekue ko yvy ape ári, Abel guive Zacarías, Baraquías raʼy peve, chupe ningo pejuka vaʼekue pe témplo ha pe altár paʼũme. 36  Añetehápe haʼe peẽme: Umi hénte oikóva ko tiémpope* ojekastigáta koʼã mbaʼére. 37  ”Jerusalén, Jerusalén, rejukáva umi proféta ha rejapíva itápe umi Ñandejára remimboúpe..., ¡hetaite ningo añehaʼã ambyaty ne membykuéra, pe ryguasu ombyatyháicha imembykuéra ipepo guýpe! Péro peẽ ndapeipotái. 38  ¡Péina! Pende róga ojeheja reíma peẽme. 39  Che haʼe peẽme: Ni mbaʼevéicharõ ndacherechamoʼãvéima og̃uahẽ meve pe ára peje hag̃ua: ‘¡Tojehovasa* pe oúva Jehová* rérape!’”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Mboʼehára Leipegua”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Kahaʼi orekóva pype Ñandejára Ñeʼẽ. Umi kuimbaʼe hudío oiporu vaʼekue koʼãva amulétoicha oñangareko hag̃ua hesekuéra.
Ehecha “Sinagóga”, diksionário oĩva ko Bíbliape.
Térã: “merkádorupi”.
Térã: “Rabí”.
Koʼápe Jesús oñeʼẽ umi título oñemoĩvare umi rrelihión omoakãvape, por ehémplo “Paʼi, Padre”.
Oĩ traduksión omoĩva ko versíkulo, péro heta manuskríto griégo yma guare iñimportánteva nomoĩri.
Griégope heʼi: “proselitorã”.
Ehecha “Gehena”, Informasión Oĩvéva 9-pe.
Ehecha “Altár”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Térã: “oñemomorotĩva, oñepintáva kálpe”.
Ehecha “Profesía”, diksionário oĩva ko Bíbliape.
Ehecha “Umi Hénte Oikóva ko Tiémpope”, diksionário oĩva ko Bíbliape.
Térã: “Toñevendesi”. Ehecha “Vendisión”, diksionário oĩva ko Bíbliape.
Ehecha Informasión Oĩvéva 1.