Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 21:1-46

21  Upéi, og̃uahẽmbotávo Jerusalénpe, opyta hikuái Betfaguépe, oĩháme sérro Olivoty. Upépe Jesús omondo mokõi idisípulope*,  heʼívo: “Tapeho pe puévlo opytáva pene renondépe, ha peikévo petopáta peteĩ vúrro oñeñapytĩva ha peteĩ vurroraʼy hendive; pejora ha pegueru chéve.  Ha oĩrõ oporandúva peẽme, peje chupe: ‘Ore Ruvicha oikotevẽ’. Ha upepete ohejáta pegueru”.  Añetehápe upéva oiko oñekumpli hag̃ua Ñandejára heʼi vaʼekue pe proféta* rupive:  “Peje umi Sionguápe*: ‘¡Péina!, ou hína ne rendápe vúrro ári nde Ruvicha guasu ipyʼaporãitéva*. Oguapy oúvo peteĩ vurroraʼy ári, peteĩ mymba oguerojáva mbaʼe pohýi memby’”.  Upémarõ umi disípulo oho ojapo Jesús omanda hagueichaite chupekuéra.  Ha ogueru hikuái pe vúrro imemby reheve, ha omoĩ hiʼarikuéra umi ijao joʼaha, ha upéi Jesús ojupi hiʼári.  Pe hénte apytépe oĩ heta oipysóva ijao joʼaha pe tapére, ha oĩ avei oikytĩva yvyra rakã ha omyasãi pe tapére.  Ha umi henteita ohóva henonderã, ha avei umi oúva hapykuéri, oñepyrũ osapukái: “¡Ñandejára, esalvamína David Raʼýpe! ¡Tojehovasa* pe oúva Jehová* rérape! ¡Ñandejára reiméva yvágape, esalvamína chupe!”. 10  Jesús oikévo Jerusalénpe, enterove umi hénte upepegua ipyʼatarovapa, ha heʼijoa hikuái: “¿Máva piko kóva?”. 11  Ha umi hénte heʼi chupekuéra: “¡Kóva haʼe hína Jesús oúva Nazarétgui oĩva Galiléape. Haʼe hína pe proféta oñepromete vaʼekue outaha!”. 12  Upéi Jesús oike pe témplope, ha omosẽmba upégui umi ombaʼevende ha oñemúvape. Oipetepa yvýre umi mesa kambistakuéra oiporúva, ha umi palóma vendehágui katu ivankokuéra. 13  Ha heʼi: “Ñandejára Ñeʼẽme ojehai: ‘Che róga ningo peteĩ lugár oñeñemboʼe hag̃ua’, ha peẽ katu pejapo chugui mondaha raity”. 14  Pe témplope avei oñemboja hendápe umi siégo ha umi ikarẽva, ha Jesús omonguera chupekuéra. 15  Umi saserdóte ruvichakuéra* ha mboʼehára leipegua* ipochyeterei ohechávo umi mbaʼe porãita haʼe ojapóva ha ohendúvo umi mitãnguérape osapukaijoa pe témplope: “¡Ñandejára, esalvamína David Raʼýpe!”. 16  Upévare heʼi hikuái Jesúspe: “¿Rehendu piko mbaʼépa la heʼíva hína hikuái?”. Jesús heʼi chupekuéra: “Ahendu. ¿Ha ndapeleéiva piko arakaʼeve Ñandejára Ñeʼẽme heʼiha: ‘Umi mitãnguéra ha mitãraʼy jepe nemombaʼe’?”. 17  Upévo haʼe osẽ pe siudágui, oho Betániape ha opyta upépe upe pyhare. 18  Pyharevete, ou jeývo pe siudápe, ivareʼa sapyʼa. 19  Ha ohecha pe tape yképe peteĩ ígo máta, ha oho ohecha ndahiʼáipa, péro ndotopái mbaʼevete hese, hoguémante. Upémarõ heʼi chupe: “Koʼág̃a guive arakaʼeve nosẽmoʼãvéima ne mátagui ni peteĩ yva”. Ha pe ígo máta upepete ipiru. 20  Idisipulokuéra ohecharamoiterei upéva, ha heʼi: “¿Mbaʼéicha rupi piko ko ígo máta pyaʼete ipiru?”. 21  Jesús katu ombohovái chupekuéra: “Añetehápe haʼe peẽme: Pejerovia ha napendepyʼamokõiriramo, peẽ avei pejapóta che ajapo vaʼekue pe ígo mátare ha ndahaʼéi upévante; pejéta avei ko sérrope: ‘Epuʼã ha tereho ejeity pe márpe’, ha katuete oikóta. 22  Ha opa mbaʼe pejeruréva peñemboʼe jave, oñemeʼẽta peẽme pejeroviáramo”. 23  Upéi Jesús oike pe témplope ha, omboʼe aja umi héntepe, oñemboja hendápe umi saserdóte ruvicha ha karai guasukuéra ha heʼi chupe: “¿Nde piko ereko permíso rejapo hag̃ua koʼã mbaʼe? ¿Máva piko heʼi ndéve ikatuha rejapo?”. 24  Jesús ombohovái chupekuéra: “Che aporandúta avei peẽme peteĩ mbaʼe. Ha pembohováiramo chéve, upéicharõ amombeʼúta peẽme mávapa omeʼẽ chéve permíso ajapo hag̃ua koʼã mbaʼe: 25  Pe vautísmo* Juan ojapo vaʼekue, ¿oúpa Ñandejáragui*, térãpa yvyporakuéragui?”. Péro haʼekuéra okalkula ha heʼi ojupe: “Jaʼéramo ‘Ñandejáragui’, heʼíta ñandéve: ‘¿Mbaʼére piko upéicharõ ndapegueroviái raʼe chupe?’. 26  Péro jaʼérõ: ‘Yvyporakuéragui’, koʼã henteita ñandeapeligra, enterove haʼekuéra ogueroviágui Juan haʼe hague peteĩ proféta”. 27  Upévare ombohovái hikuái Jesúspe: “Ndoroikuaái”. Haʼe katu heʼi chupekuéra: “Upéicharõ che namombeʼumoʼãi avei peẽme mávapa omeʼẽ chéve permíso ajapo hag̃ua koʼã mbaʼe. 28  ”¿Mbaʼépa peẽ peje? Peteĩ karai mokõi itaʼýra. Ha heʼi pe ijypykuépe: ‘Che raʼy, terehóna embaʼapo koestedía parraltýpe’. 29  Haʼe heʼi: ‘Aháta che ru’, péro upéi ndohói. 30  Upe rire heʼi avei upéicha pe imitãvévape. Haʼe katu ombohovái: ‘Ndahamoʼãi’, péro upéi ombyasy heʼi haguére upéicha, ha oho ombaʼapo. 31  Koʼã mokõivéva apytégui, ¿mávapa ojapo itúva rembipota?”. Haʼekuéra heʼi: “Pe imitãvéva”. Jesús heʼi chupekuéra: “Añetehápe haʼe peẽme, umi impuésto kovraha ha umi kuña rekovai oho pene renonderã Ñandejára Rréinope. 32  Juan ningo ou vaʼekue ohechaukávo peẽme tape porã, péro peẽ ndapegueroviái chupe. Umi impuésto kovraha ha umi kuña rekovai katu oguerovia. Ha pehecháramo jepe koʼã mbaʼe, peẽ napeñembyasýi ha ndapegueroviái chupe. 33  ”Pehendumi avei ko ótro ehémplo: Oĩ vaʼekue peteĩ kuimbaʼe, peteĩ ogajára oñotỹva parrál ijyvýpe ha omongora. Avei ojoʼo upépe peteĩ yvykua oñami hag̃ua iparrál rykue, ha omopuʼã peteĩ tórre. Upéi oalkila pe iparralty umi chokokuépe, ha osẽ oho ótro tetãme. 34  Og̃uahẽvo pe kosécha tiémpo, haʼe omondo hembiguaikuérape umi chokokue rendápe, ogueru hag̃ua pe parrál otokáva chupe. 35  Umi chokokue katu ojagarra peteĩvape ha hetaiterei ombyepoti, ótrope katu ojukaite ha ambuépe ojapi vaipaite itápe. 36  Upémarõ ko vuéltape omondo hetave tembiguái. Ha umi chokokue ojapo jey hesekuéra ojapo hagueichaite umi ótrore. 37  Amo ipahápe omondo itaʼýrape hendapekuéra, ha heʼi: ‘Ko che raʼýpe orrespetáta hikuái’. 38  Péro ohechávo pe taʼýrape, umi chokokue heʼi ojupe: ‘Pévape opytáta hína ko kokue; ¡jajukámandi voi chupe ha topytapa ñandéve!’. 39  Upémarõ ojagarra hikuái pe kariaʼýpe, mbaretépe oguenohẽ pe parraltýgui ha ojuka chupe. 40  Upévare, ág̃a ou vove pe parralty jára, ¿mbaʼépa ojapóta umi chokokuére?”. 41  Haʼekuéra heʼi: “Iñaña haguére hikuái ojukapaitéta chupekuéra, upéi oalkiláta iparralty ótro chokokuépe, ha umíva itiémpope omeʼẽta pe parralty járape umi parrál otokáva chupe”. 42  Upéi Jesús heʼi chupekuéra: “¿Peẽ piko ndapeleéiva arakaʼeve Ñandejára Ñeʼẽme heʼiha kóicha: ‘Pe ita omboyke vaʼekue umi óga apoha, upéva haʼe hína pe ita iñimportantevéva oĩva pe eskínape. Jehová ojapo upéva, ha ñandéve g̃uarã tuichaiterei mbaʼe’? 43  Upévare haʼe peẽme: Ñandejára Rréino ojepeʼáta pendehegui ha oñemeʼẽta umi hénte ojapóvape hembipota. 44  Ha pe hoʼáva ko itáre, ijakuʼíta. Ha pe ita hoʼáramo hiʼári katu, ombochipepaitéta chupe”. 45  Umi saserdóte ruvichakuéra ha umi fariséo* ohendu rire koʼã ehémplo, ohechakuaa Jesús oñeʼẽ hague hesekuéra. 46  Péro ojagarraséramo jepe chupe, okyhyje hikuái umi héntegui, haʼekuéra ogueroviágui Jesús haʼeha peteĩ proféta.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Profesía”, diksionário oĩva ko Bíbliape.
Griégope heʼi: “Sión memby”.
Térã: “pe ndaipochyreíriva”.
Térã: “Toñevendesi”. Ehecha “Vendisión”, diksionário oĩva ko Bíbliape.
Ehecha Informasión Oĩvéva 1.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Griégope heʼi: “yvágagui”.
Ehecha “Fariséo”, diksionário oĩva ko Bíbliape.