Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 20:1-34

20  ”Upévare, pe Rréino yvagapegua ojogua peteĩ ogajárape, osẽva pyharevete oheka ombaʼapo vaʼerã chupe iparraltýpe.  Ha oñemoĩ rire peteĩ ñeʼẽme opaga hag̃ua chupekuéra un denário* por día, omondo iparraltýpe.  Upéi las nuéverupi* osẽ jey ha ohecha ótro kuimbaʼekuéra oñemboʼy reíva hína plásape*;  ha heʼi chupekuéra: ‘Pejúna avei peẽ pembaʼapo che parraltýpe ha apagáta peẽme hekoitépe’.  Upémarõ oho hikuái. Upéi pe ogajára osẽ ha ojapo jey upéicha las dócerupi*, ha las trésrupi* avei.  Ipahápe, kaʼaru las cíncorupi* osẽ, ha otopa jey ótro kuimbaʼekuéra oñemboʼy reíva hína. Ha heʼi chupekuéra: ‘¿Mbaʼére piko peẽ peime rei raʼe un diaite koʼápe?’.  Haʼekuéra heʼi: ‘Avave ningo nomeʼẽi oréve ore travahorã’. Haʼe heʼi: ‘Tapeho peẽ avei pe parraltýpe’.  ”Upéi pytũmbývo, pe ogajára heʼi pe iparraltýre oñangarekóvape: ‘Ehenói umi ombaʼapóvape ha epaga chupekuéra, eñepyrũ umi tapykuépe og̃uahẽ vaʼekuégui, ha upéi epaga umi tenonde ou vaʼekuépe’.  Ha oúvo umi kuimbaʼe oñepyrũ vaʼekue ombaʼapo las cíncorupi, oñemeʼẽ peteĩteĩme un denário. 10  Upévare oúrõ guare umi tenondete oñepyrũ vaʼekue, oimoʼã oñemeʼẽvetaha chupekuéra; péro un denárionte avei ojepaga chupekuéra. 11  Upémarõ haʼekuéra oñepyrũ oñeʼẽ vai pe ogajárare, 12  ha heʼi hikuái: ‘Koʼã tapykuépe ou vaʼekue ningo una órante ombaʼapo, upéicharamo jepe nde repagánte avei chupekuéra oréve repaga haguéicha. ¡Ore katu un diaite rombaʼapo pe kuarahy akúpe!’. 13  Péro pe ogajára heʼi peteĩvape: ‘Chamígo, ndajapói ningo nderehe mbaʼeve ivaíva. Japytángo kuri apagataha ndéve un denário, ¿ajépa? 14  Ejagarra katu la ne mbaʼéva ha tereho. Che ameʼẽse koʼã tapykue og̃uahẽ vaʼekuépe ndéve ameʼẽháicha avei. 15  ¿Ndaikatúingaʼu piko ajapo ajaposéva che plátagui? ¿Térãpa rejepicha* hína chembaʼeporã haguére hendivekuéra?’. 16  Upéicha avei umi itapykuéva hína, opytáta tenonde, ha umi oĩva tenonde, opytáta tapykuépe”. 17  Upéi Jesús oĩma ojupi hag̃uáicha Jerusalénpe, ha ohenói umi doce disípulope* haʼeñoháme, ha heʼi chupekuéra tapére: 18  “¡Péina! Jaha hína Jerusalénpe, ha pe Yvypóra Raʼýpe* oñemeʼẽta umi saserdóte ruvichakuéra* ha mboʼehára leipegua* poguýpe ojehusga hag̃ua. Haʼekuéra heʼíta omano vaʼerãha, 19  ha omeʼẽta chupe umi tetã ambuegua poguýpe, ombyepoti ha oñembohory hag̃ua hese. Upéi oñemosaingóta yvyráre, péro tres día haguépe oñemopuʼã jeýta chupe”. 20  Upéi oñemboja hendápe Zebedeo rembireko, umi mokõi imembýndi, omombaʼe* Jesúspe ha ombaʼejerure chupe. 21  Jesús heʼi pe kuñakaraípe: “¿Mbaʼépa reipota?”. Haʼe heʼi: “Aipota ere chéve, koʼã che memby oguapytaha nde ykére ne Rréinope, peteĩ nde deréchape ha ótro katu nde iskiérdape”. 22  Jesús ombohovái: “Peẽ ndapeikuaái mbaʼépa la pejeruréva. ¿Ikatúta piko pemboyʼu chendive pe kópa che amboyʼútava hína?”. Haʼekuéra heʼi: “Ikatúta”. 23  Jesús heʼi chupekuéra: “Peẽ añetehápe pemboyʼúta avei upe kópagui. Péro che ndaikatúi haʼévo peẽme peguapytaha che derécha térã che iskiérdape. Upéva che Rúmante odesidíta mávapepa omeʼẽta”. 24  Ohendúvo koʼã mbaʼe, umi ótro diez ipochy umi mokõi ndive. 25  Jesús katu ohenói chupekuéra ha heʼi: “Peẽngo peikuaa mbaʼéichapa umi mburuvicha omanda hetãyguakuérare, ha umi poguasukuéra ojopy umi héntendi. 26  Péro peẽ ndaupéichai vaʼerã; pe tuichaséva pende apytépe, oiko vaʼerã pene rembijokuáirõ. 27  Ha pe oĩséva tenondete, oiko vaʼerã pene rembiguáiramo. 28  Péicha avei pe Yvypóra Raʼy ndoúi oporojokuái hag̃ua, ou guei oiko tembiguáiramo, ha omeʼẽ hekove*, opaga* ha oguenohẽ hag̃ua hetápe pekádo poguýgui”. 29  Upéi, osẽvo hikuái Jericógui, hetaiterei hénte oho hendive. 30  Mokõi siégo katu oguapy hína pe tape yképe, ha ohendúvo Jesús ohasaha upérupi, osapukái hikuái: “¡Karai, David Raʼy, oreporiahuverekomína!”. 31  Umi hénte ojaʼóramo jepe chupekuéra okirirĩ hag̃ua, haʼekuéra hatãvéntema osapukái: “¡Karai, David Raʼy, oreporiahuverekomína!”. 32  Upémarõ Jesús opyta, ohenói chupekuéra, ha heʼi: “¿Mbaʼépa peipota ajapo penderehe?”. 33  Haʼekuéra heʼi: “Karai, rohechase jey ningo”. 34  Jesús oiporiahuverekoiterei chupekuéra, ha opoko hesakuérare, upepete ohecha jey hikuái ha omoirũ chupe.

Nóta

Ehecha “Denário”, diksionário oĩva ko Bíbliape.
Griégope heʼi: “pe óra tercérarupi”.
Térã: “merkádope”.
Griégope heʼi: “pe óra séxtarupi”.
Griégope heʼi: “pe óra novénarupi”.
Griégope heʼi: “pe óra undécimarupi”.
Griégope heʼi: “nde resa iñaña”.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Yvypóra Raʼy”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Térã: “oñesũ”. Yma péicha ojehechauka oñemombaʼeha peteĩ tapichápe.
Griégope heʼi: “hiʼálma”. Ehecha “Álma”, Informasión Oĩvéva 7A-pe.
Térã: “orreskata”. Ehecha “Rreskáte”, diksionário oĩva ko Bíbliape.