Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 2:1-23

2  Jesús onase Belénpe, oĩva Judéape, rréi Herodes tiémpope. Upéi kuarahyresẽguio ou Jerusalénpe umi karai oadivináva omañávo estrellakuérare,  ha heʼi: “¿Moõiko oime pe hudiokuéra rréi onase vaʼekue? Rohecha ningo ijestrélla kuarahyresẽ gotyo ha upévare roju romombaʼe* hag̃ua chupe”.  Ohendúvo upéva, rréi Herodes ipyʼatarovaite ha opa umi hénte oĩva Jerusalénpe avei.  Upémarõ ohenoika umi saserdóte ruvichakuéra* ha umi mboʼehára leipeguápe* ha oporandu chupekuéra moõpa onase vaʼerã pe Cristo*.  Haʼekuéra heʼi: “Belén oĩva Judéape, upéicha ningo ohai vaʼekue pe proféta:  ‘Nde Belén reiméva Judápe, nde ndahaʼéi hína pe puévlo michĩvéva umi mburuvicha Judagua apytépe. Ndehegui osẽta peteĩ ogovernátava che retã Israel ha oñangarekótava hesekuéra peteĩ ovecharerekuáicha’”.  Upémarõ Herodes ohenoika ñemiháme umi adivínope, ha oporandu porã chupekuéra arakaʼépa ohecha ñepyrũ hikuái upe estrélla.  Ha omondóvo Belénpe, heʼi chupekuéra: “Tapeho peheka porã pe mitãʼi, ha ág̃a petopa vove, peju pemombeʼu chéve aha hag̃ua avei amombaʼe chupe”.  Ohendu rire pe rréipe haʼekuéra osẽ oho, ha pe estrélla ohecha vaʼekue kuarahyresẽ gotyo, koʼág̃a oho henonderãkuéra. Upéi pe estrélla opyta peteĩ óga ári ha upépe oĩ pe mitãʼi. 10  Umi adivíno ovyʼaiterei ohechávo upe estrélla. 11  Ha oikévo upe ógape otopa pe mitãme isy María ndive, ha oñesũ omombaʼe pe mitãme. Upe rire oavri hikuái umi mbaʼe porã oguerúva ha omeʼẽ chupe rregálo: óro, olívano* ha mírra*. 12  Péro Ñandejára oavisa chupekuéra iképe ani hag̃ua oho Herodes rendápe. Upévare haʼekuéra oho hetãme ótro tapérupi. 13  Oho rire hikuái, Jehová* ánhel oñeʼẽ Josépe iképe ha heʼi: “Epuʼã ejagarra pe mitã ha isýpe ha tapeho pekañy Egíptope. Pepyta upépe haʼe jey peve ndéve reju hag̃ua, cháke Herodes oheka hína pe mitãʼípe ojuka hag̃ua”. 14  Upévo José opuʼã ojagarra pe mitã ha isy, ha upe pyharépe ohopa hese Egíptope. 15  Ha opyta upépe Herodes omano meve, oñekumpli hag̃ua Jehová heʼi vaʼekue iproféta rupive: “Egíptogui ahenói che raʼýpe”. 16  Péro Herodes orrenegaiterei ohechakuaávo umi adivíno ombotavy hague chupe. Upémarõ heʼi hembiguaikuérape: “Tapeho Belénpe ha ijerére, ha pejukapaite chéve umi mitãkuimbaʼe orekóva guive dos áño térã imitãvéva”. Haʼe ojapo upéicha umi adivíno omombeʼúgui chupe arakaʼépa ohecha ñepyrũ pe estrélla. 17  Ha péicha oñekumpli Ñandejára heʼi vaʼekue proféta Jeremías rupive: 18  “Oñehendu hasẽ soro ha ojaheʼóva Ramápe. Raquel ojaheʼo imembykuéra ndaiporivéima rupi, ha ndohejái avave okonsola chupe”. 19  Upéi Herodes omano rire, ¡péina!, Jehová ánhel ojechauka Josépe iképe, Egíptope, 20  ha heʼi chupe: “Epuʼã ejagarra pe mitã ha isýpe, ha tereho Israélpe, omanóma umi oheka vaʼekue pe mitãme* ojuka hag̃ua”. 21  Upémarõ haʼe opuʼã, ojagarra pe mitãʼi ha isýpe ha oho Israélpe. 22  Péro oikuaávo Arquelao ogovernaha Judéape, itúva Herodes rendaguépe, okyhyje oho hag̃ua upépe. Ha Ñandejára oavisa chupe iképe oho hag̃ua Galiléape. 23  Ha oho oiko peteĩ puévlo héravape Nazaret, oñekumpli hag̃ua pe ojeʼe vaʼekue umi proféta rupive: “Oñehenóita chupe Nazaretgua”.

Nóta

Térã: “oñesũ”. Yma péicha ojehechauka oñemombaʼeha peteĩ tapichápe.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Peteĩ mbaʼe hyakuã asýva ojehapy jave.
Ehecha “Mírra”, diksionário oĩva ko Bíbliape.
Ehecha Informasión Oĩvéva 1.
Griégope heʼi: “oheka vaʼekue pe mitã álma”. Ehecha “Álma”, Informasión Oĩvéva 7A-pe.