Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 17:1-27

17  Upéi, seis día haguépe, Jesús ogueraha Pedro, Santiago ha iñermáno Juánpe, ha ojupi hikuái peteĩ sérro ijyvatévape, oĩ hag̃uáme haʼekuéra año.  Ha upépe Jesús oñepyrũ okambiapa henondepekuéra, pe hova kuarahýicha omimbi, ha umi ijao joʼaha katu omimbipa.  Ha ¡péina!, ohecha avei hikuái Moisés ha Elíaspe oñemongetaha Jesús ndive.  Upémarõ Pedro osẽ heʼi Jesúspe: “Che Ruvicha, iporãite ningo ñaime koʼápe, reipotáramo amopuʼãta koʼápe mbohapy óga kárpa*: peteĩ nembaʼerã, ambue Moiséspe, ha pe ótro katu Elíaspe g̃uarã”.  Haʼe oñeʼẽ aja gueteri, ¡péina!, peteĩ arai omimbipáva ojahoʼi chupekuéra. Ha ¡péina!, pe araígui oñehendu peteĩ oñeʼẽ ha heʼíva: “Kóva hína che Raʼy ahayhuetéva ha aguerohorýva, pehendúke chupe”.  Ohendúvo upéva, idisipulokuéra* oñesũ ha oñakãity, ha okyhyjeterei hikuái.  Upémarõ Jesús ou, ha opokóvo hesekuéra heʼi: “Pepuʼã katu ha ani pekyhyje”.  Upépe haʼekuéra ojesaupi ha ndohechavéima avavépe, síno Jesúspentema.  Oguejývo pe sérrogui Jesús omanda chupekuéra: “Aníke pemombeʼu avavépe ko pehecha vaʼekue, oñemopuʼã jey peve pe Yvypóra Raʼy* umi omanóva apytégui”. 10  Idisipulokuéra katu oporandu chupe: “¿Mbaʼére piko upéicharõ umi mboʼehára leipegua* heʼi Elías raẽ ou vaʼerãha?”. 11  Haʼe ombohovái chupekuéra: “Elías añetehápe ou hína ha omoĩ porãta opa mbaʼe. 12  Che katu haʼe peẽme Elías oúma hague, péro haʼekuéra ndohechakuaái. Ha ojapo hese opa mbaʼe ojaposéva. Péicha avei pe Yvypóra Raʼy katuete ohasa asýta ipoguypekuéra”. 13  Upépe idisipulokuéra ohechakuaa Jesús oñeʼẽ hague Juan el Bautístare. 14  Upéi oho hikuái umi hénte oĩháme, upépe oñemboja Jesús rendápe peteĩ kuimbaʼe, oñesũ henondépe ha heʼi: 15  “Che Ruvicha, cheporiahuverekomína, che raʼy ningo oreko epilépsia ha oĩ vaieterei, pyʼỹinte hoʼa tatápe, ha hoʼa jepi avei ýpe. 16  Agueru kuri nde disipulokuérape, péro ndaikatúi omonguera chupe”. 17  Upévo Jesús osẽ heʼi: “Peẽ tekove* jeroviaʼỹ ha rekoaña, ¿arakaʼe peve piko aiméta penendive ha agueropuʼakáta upe pejapóva? Pegueru chéve koʼápe pe mitãrusu”. 18  Upéi Jesús omongavaju pe demóniope*, ha pe demónio osẽ pe mitãrusúgui, ha upepete haʼe okuera. 19  Upémarõ idisipulokuéra oho Jesús rendápe haʼeñoháme, ha heʼi: “¿Mbaʼére piko ore ndaikatúi romosẽ chupe?”. 20  Haʼe heʼi chupekuéra: “Pejeroviaʼietereígui. Añetehápe haʼe peẽme: Pende jerovia tuicháramo peteĩ mostása raʼỹicha, pejéta ko sérrope: ‘Tereho koʼágui amoite’, ha ohóta, ha ndaiporimoʼãi mbaʼeve ikatuʼỹtava pejapo”. 21*  —— 22  Oĩ aja hikuái Galiléape, Jesús heʼi chupekuéra: “Pe Yvypóra Raʼýpe, katuete oñemeʼẽta* umi kuimbaʼe pópe, 23  ha ojejukáta, péro tres día haguépe oñemopuʼã jeýta”. Upévo haʼekuéra oñembyasyeterei opytávo. 24  Upéi, og̃uahẽ rire hikuái Capernáumpe, oñemboja Pedro rendápe umi kuimbaʼe okovráva pe impuésto témplope g̃uarã*, ha heʼi: “¿Ndopagái piko pene mboʼehára pe impuésto témplope g̃uarã?”. 25  Haʼe heʼi: “Opaga”. Upéicharamo jepe, Pedro og̃uahẽ rire pe ógape Jesús itenonde hese ha heʼi: “¿Mbaʼépa ere Simón? ¿Mávapa opaga umi impuestokuéra umi mburuvicha guasúpe? ¿Itaʼyrakuéra térãpa ótro hénte?”. 26  Haʼe heʼívo: “Ótro hénte”, Jesús heʼi chupe: “Upéicharõ itaʼyrakuéra natekotevẽi opaga umi impuésto. 27  Péro ani hag̃ua ñambopochy chupekuéra, tereho epoi ne pinda pe márpe, ha reikutu vove peteĩ pira, renohẽta ijurúgui peteĩ monéda de pláta*. Egueraha upe monéda ha emeʼẽ chupekuéra, cherehe ha nderehe”.

Nóta

Oiméne ojejapo mymba pirégui.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Yvypóra Raʼy”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Griégope heʼi: “generación”. Ehecha “Umi Hénte Oikóva ko Tiémpope”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Oĩ traduksión omoĩva ko versíkulo, péro heta manuskríto griégo yma guare iñimportánteva nomoĩri.
Térã: “oñetraisionáta”.
Griégope heʼi: “mokõi monéda de drákma”. Péva haʼe vaʼekue peteĩ monéda de pláta oiporúva umi griégo, ha oñegana hag̃ua upéva oñembaʼapo vaʼerã dos díarupi.
Griégope heʼi: “monéda de estatér”. Péva haʼe vaʼekue peteĩ monéda ovaléva cuatro drákma.