Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 16:1-28

16  Upépe oñemboja umi fariséo* ha saduseokuéra*, ha otantea hag̃ua Jesúspe ojerure chupe tojapo peteĩ milágro Ñandejára rérape.  Jesús ombohovái chupekuéra: “[[Kaʼarupytũ vove ningo peẽ peje jepi: ‘Tiémpo porãta hína, pe ára pytã asy rupi’.  Pyharevete katu peje: ‘Pe ára ningo pytã asy, péro ijaraipa hína. Koestedía roʼy ha okýta’. Peẽ pemañávo pe ára rehe, peikuaáma tiémpo vaítapa, térãpa tiémpo porãta. Péro ndapehechakuaái mbaʼépa heʼise umi mbaʼe oikóva koʼág̃a.]]*  Umi hénte oikóva ko tiémpope* iñaña, oporomoakãratĩ, ha milágronte voi ohechase. Péro ndojehechaukamoʼãi chupekuéra ni peteĩ milágro, síno pe milágro oiko vaʼekue Jonás rehe añoite ohecháta hikuái”. Upévo Jesús oho, ha oheja chupekuéra.  Upéi idisipulokuéra* ohasa pe ótro ládo, péro hesarái ha ndoguerahái hikuái pan.  Jesús heʼi chupekuéra: “Pejesareko meméke ha peñeñangareko umi fariséo ha saduseokuéra levadúragui”.  Upévare idisipulokuéra oñepyrũ heʼi ojupe: “Péicha heʼi ñandéve ndajaguerúi haguére pan”.  Jesús oikuaágui upéva, heʼi: “¿Mbaʼére piko peje hína ojupe ndaperekoiha pan? Ajépa pejeroviaʼiete.  ¿Neʼĩra piko pehechakuaa mbaʼérepa añeʼẽ peẽme? ¿Napenemanduʼái piko umi cinco pan ambojaʼórõ guare cinco mílpe g̃uarã, ha mboy kanástopa pembyaty? 10  Térã penemanduʼápa umi siete pan ambojaʼórõ guare umi cuatro mílpe g̃uarã, ¿mboy kanásto guasu renyhẽpa pembyaty? 11  ¿Mbaʼéicha piko ndapepillái nañeʼẽi hague peẽme pan rehe? Peñeñangarekóke umi fariséo ha saduseokuéra levadúragui”. 12  Upépe ae idisipulokuéra ohechakuaa Jesús noñeʼẽi hague chupekuéra pe levadúra pan orekóvare, síno oñeʼẽha umi fariséo ha saduseokuéra omboʼévare. 13  Upéi, oike rire Cesarea de Filípope, Jesús oporandu idisipulokuérape: “¿Mbaʼépa heʼi umi hénte pe Yvypóra Raʼy* rehe?”. 14  Haʼekuéra heʼi: “Oĩ heʼíva Juan el Bautista; ótro katu heʼi Elías, ha oĩ avei heʼíva Jeremías, térã peteĩ proféta*”. 15  Jesús heʼi chupekuéra: “¿Péro peẽ mbaʼe peje, máva piko che hína?”. 16  Simón Pedro ombohovái chupe: “Nde hína pe Cristo*, Ñandejára oikovéva Raʼy”. 17  Jesús katu heʼi chupe: “Oiméne revyʼaite Simón, Jonás raʼy, che Ru oĩva yvágape oikuaaukágui ndéve, ha ndahaʼéi yvypóra. 18  Ha che avei haʼe ndéve: Nde hína Pedro, ha ko ita guasu ári amopuʼãta che kongregasión*, ha pe sepultúra* ndaipuʼakamoʼãi hese. 19  Che ameʼẽta ndéve umi lláve ojeike hag̃ua pe Rréino yvagapeguápe. Ha oimeraẽ mbaʼe reñapytĩva ko yvy ape ári, upéva oñeñapytĩma yvágape, ha oimeraẽ mbaʼe rejoráva ko yvy ape ári, upéva ojejoráma yvágape”. 20  Upéi Jesús omanda idisipulokuérape ani hag̃ua ni mbaʼevéicharõ omombeʼu avavépe haʼeha pe Cristo. 21  Upe ára guive, Jesucristo oñepyrũ omombeʼu idisipulokuérape haʼe oho vaʼerãha Jerusalénpe. Ha umi karai guasu, saserdóte ruvichakuéra* ha mboʼeharakuéra leipegua* heta ombohasa asytaha chupe ha ojejukáta, péro tres día haguépe oñemopuʼã jeýta. 22  Upévo Pedro omohaʼeño Jesúspe, ha omongavaju chupe: “Anivéna ere upéicha che Ruvicha, ejeporiahuverekomína nde avei. Ni mbaʼevéicharõ ndoikomoʼãi koʼã mbaʼe nderehe”. 23  Jesús katu ojere chugui ha heʼi Pédrope: “¡Eñemoĩ che atukupépe Satanás*! Nde cherapejokose hína, nerepensáigui Ñandejára opensaháicha, repensa guei yvyporakuéraicha”. 24  Upéi Jesús heʼi idisipulokuérape: “Oĩramo chemoirũséva toñembyesarái ijehegui, tohupi ijapére ijyvyra pohýi*, ha tachemoirũ meme. 25  Oimeraẽ osalvaséva hekove* omanóta, péro oimeraẽ omanóva* haʼe haguére che disípulo, oikove jeýta. 26  Añetehápe, ¿mbaʼépe piko ideprovécho peteĩ kuimbaʼépe orekopáramo ko múndope* oĩva, ha upéi omano*? Térã, ¿mbaʼépa omeʼẽta pe kuimbaʼe osalva hag̃ua hekove*? 27  Pe Yvypóra Raʼy oúta Itúva rekomimbipa reheve, ha oúta hiʼanhelkuérandi opaga hag̃ua peteĩteĩme hembiapokuére. 28  Añetehápe haʼe peẽme, koʼág̃a oĩ pende apytépe umi nomanomoʼãiva ohecha mboyve pe Yvypóra Raʼy oúrõ hína Irréinope”.

Nóta

Ehecha “Fariséo”, diksionário oĩva ko Bíbliape.
Ehecha “Saduséo”, diksionário oĩva ko Bíbliape.
Oĩ manuskríto orekóva ko párte, péro heta manuskríto iñimportántevape ndaipóri.
Ehecha “Umi Hénte Oikóva ko Tiémpope”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Yvypóra Raʼy”, diksionário oĩva ko Bíbliape.
Haʼekuéra oimoʼãne haʼeha peteĩ proféta yma guare oñemoingove jey vaʼekue. Ehecha Lu 9:19. Ehecha avei “Profesía”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Griégope heʼi: “pe Hades rokẽ”. Ehecha “Hades”, Informasión Oĩvéva 8-pe.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Ehecha “Yvyra Pohýi”, Informasión Oĩvéva 6-pe.
Griégope heʼi: “hiʼálma”. Ehecha “Álma”, Informasión Oĩvéva 7A-pe.
Griégope heʼi: “ohundíva hiʼálma”.
Ehecha “Múndo”, diksionário oĩva ko Bíbliape.
Griégope heʼi: “ohundi hiʼálma”.
Griégope heʼi: “hiʼálma”.