Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 15:1-39

15  Upéi og̃uahẽ umi fariséo* ha mboʼeharakuéra leipegua* oúva Jerusaléngui, ha heʼi Jesúspe:  “¿Mbaʼére piko nde disipulokuéra* omboyke umi ñande ru ypykue omboʼe vaʼekue? Por ehémplo, haʼekuéra ndojepohéiri okaru mboyve”.  Jesús katu ombohovái chupekuéra: “¿Mbaʼére piko peẽ avei pemboyke Ñandejára mandamiénto, pejaposégui umi kuimbaʼe omboʼe vaʼekue?  Por ehémplo, Ñandejára heʼi vaʼekue: ‘Emombaʼe nde ru ha nde sýpe’; ha: ‘Oñeʼẽ vaíva itúva térã isýre ojejuka vaʼerã’.  Peẽ katu peje: ‘Oĩramo heʼíva itúva térã isýpe: “Opa mbaʼe arekóva roipytyvõ hag̃ua, ameʼẽmbáma rregáloramo Ñandejárape”,  upe tapicha natekotevẽvéima omombaʼe itúvape’. Péicha peẽ pemboyke Ñandejára Ñeʼẽ pejaposégui pende rukuéra ypykue omboʼévante.  Peẽ tekove rovamokõi, ndareíri proféta* Isaías heʼi penderehe:  ‘Koʼã hénte ijurúpente chemombaʼe, ikorasõ katu mombyry oĩ chehegui.  Reiete chemombaʼeguasu hikuái, oikógui omboʼe kuimbaʼekuéra heʼívante haʼeramoguáicha che ñeʼẽ’”. 10  Upévo Jesús ohenói umi héntepe ha heʼi chupekuéra: “Pejapysakákena ha pentende koʼã mbaʼe: 11  Yvypórape nomongyʼái umi mbaʼe hoʼúva, síno pe osẽva ijurúgui hína la omongyʼáva chupe”. 12  Upéi idisipulokuéra oñemboja hendápe ha heʼi chupe: “¿Repilla piko umi fariséo ipochy hague pe ere vaʼekuére?”. 13  Jesús heʼi chupekuéra: “Entéro yvyramáta che Ru yvagapegua noñotỹi vaʼekue, ojehapoʼo vaʼerã. 14  Pehejána chupekuéra. Haʼekuéra ndohechái mbaʼeve, ha upéicharamo jepe ohechauka haperã ótrope. Upévare, peteĩ siégo oisãmbyhýramo ótro siégope, mokõivéva hoʼáta peteĩ yvykuápe”. 15  Upépe Pedro osẽ heʼi chupe: “Emyesakãmína oréve pe ehémplo remombeʼu vaʼekue”. 16  Upévo Jesús heʼi: “¿Peẽ piko neʼĩra avei pentende? 17  ¿Ndapehechakuaái piko umi mbaʼe hoʼúva peteĩ kuimbaʼe ohasaha ohóvo hyekuérupi, ha upéi osẽ jeyha? 18  Péro umi mbaʼe osẽva ijurúgui, ou ikorasõgui, ha umíva omongyʼa chupe. 19  Yvypóra korasõgui osẽ umi mbaʼe vai ojaposéva, jejuka, ñemoakãratĩ, tekovai*, ñemonda, japu ha ñeʼẽ vai* ótrore. 20  Koʼã mbaʼe hína la omongyʼáva yvyporakuérape, ndahaʼéi okaru haguére ojepoheiʼỹre”. 21  Upe rire Jesús osẽ oho Tiro ha Sidón gotyo. 22  Ha peteĩ kuñakarai Feniciagua oikóva upépe, osẽ osapukái chupe: “Cheporiahuverekomína che Ruvicha, David Raʼy. Che membykuña ningo oñendemonia ha upévare oĩ vaieterei anga”. 23  Jesús katu ndeʼíri chupe mbaʼeve. Upémarõ idisipulokuéra oñemboja hendápe ha heʼi: “Eréna chupe toho, osapukái ningo oúvo ñande rapykuéri”. 24  Péro haʼe heʼi chupekuéra: “Ñandejára chembou aipytyvõ hag̃ua umi Israelguápente, oikóva ovecha okañy vaʼekuéicha”. 25  Upéi pe kuña oñemboja Jesús rendápe, ha omombaʼe* chupe heʼívo: “¡Che Ruvicha, chepytyvõmína!”. 26  Haʼe heʼi chupe: “Ndovaléi jaipeʼa umi mitãgui hembiʼu ha ñameʼẽ umi jaguaraʼýpe”. 27  Haʼe katu heʼi chupe: “Upeichaite che Ruvicha, péro añetehápe umi jaguaraʼy hoʼu umi tembiʼu kuʼi hoʼáva ijarakuéra meságui”. 28  Upévo Jesús heʼi chupe: “Ajépa tuichaite nde jerovia, toiko katu upe reipotáva”. Ha upe óra guive okuera imembykuña. 29  Upéi, Jesús oho upégui ha og̃uahẽ mar de Galilea ypýpe, ha ojupi rire pe sérrope oguapy upépe. 30  Upévo ou hendápe hetaiterei hénte, ogueru hikuái umi ikarẽva, ijyvaʼỹva, ohechaʼỹva, iñeʼẽngúva ha hetave hasýva ha omoĩ Jesús renondépe. Haʼe omonguerapaite chupekuéra. 31  Umi hénte ohecharamoiterei mbaʼéichapa umi iñeʼẽngúva oñeʼẽ jey, umi oguataʼỹva oguata, umi siégo ohecha, ha ombotuicha hikuái Israel Járape. 32  Jesús katu ohenói idisipulokuérape, ha heʼi: “Aiporiahuvereko koʼã héntepe, ojapóma ningo tres día opyta hague chendive, ha ndorekói hoʼu vaʼerã. Ndaipotái anga oho hikuái pyʼa nandi, ikatúngo ikangypa tapére”. 33  Idisipulokuéra osẽ heʼi chupe: “Koʼárupi ndaipóri mbaʼeve. ¿Moõgui piko ore roguenohẽta pan romoyg̃uatã hag̃ua koʼã henteitápe?”. 34  Upémarõ Jesús oporandu chupekuéra: “¿Mboy pan piko peguereko?”. Haʼekuéra heʼi: “Roguereko siete pan, ha mbovymi piraʼi”. 35  Upéi Jesús heʼi umi héntepe oguapy hag̃ua yvýpe, 36  ojagarra umi siete pan ha umi piraʼi, oagradese rire Ñandejárape ombojaʼo, ombohasa idisipulokuérape ha haʼekuéra omeʼẽ umi héntepe. 37  Enterovete okaru hyg̃uatãha meve, ha umi tembiʼu hembýva ombyaty hikuái siete kanásto guasu renyhẽ. 38  Ha umi okaru vaʼekue katu cuatro mil kuimbaʼe, ha oĩ avei kuña ha mitãnguéra. 39  Ipahápe, Jesús ojedespedipa rire umi héntegui, ojupi peteĩ kanóape ha ou Magadán gotyo.

Nóta

Ehecha “Fariséo”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Profesía”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.
Térã: “blasfemia”, ehecha diksionário oĩva ko Bíbliape.
Térã: “oñesũ”. Yma péicha ojehechauka oñemombaʼeha peteĩ tapichápe.