Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 14:1-36

14  Upe tiémpope, rréi Heródespe oñemombeʼu Jesús ojapóva,  ha heʼi hembiguaikuérape: “Péva Juan el Bautista hína, oñemopuʼã chupe omanóva apytégui ha upévare ojapo koʼã milágro”.  Herodes voi ningo orahauka vaʼekue Juánpe kárselpe ha omosã chupe kadénape, Herodías káusare, haʼe hína iñermáno Filipo rembireko.  Ojapo upéva Juan oikógui heʼi Heródespe: “Ndovaléi remenda hese”.  Péro ojukaséramo jepe chupe, okyhyje umi héntegui, enterovénte ogueroviágui Juan haʼeha proféta*.  Upéi Herodes kumpleañohápe, Herodías membykuña ojeroky enterove rovake, ha Heródespe ogustaiterei,  upévare opromete ha ohura voi pe mitãkuñáme omeʼẽtaha chupe oimeraẽ mbaʼe ojeruréva.  Isy heʼi rire chupe mbaʼépa ojeruréta, haʼe heʼi: “Aipota regueru chéve koʼápe peteĩ vandéhape, Juan el Bautista akã”.  Pe rréi ombyasy ohendúvo upéva, péro ohura rupi iñinvitadokuéra rovake, omanda ojegueru hag̃ua chupe. 10  Upémarõ omondo oñeñakãʼo hag̃ua Juánpe, upe kárselpe. 11  Upéi ojegueru iñakãngue peteĩ vandéhape, ha oñemeʼẽ pe mitãkuñáme, haʼe katu ogueraha isýpe. 12  Upe rire ou Juan disipulokuéra* ogueraha pe hetekue oñotỹ, ha ou omombeʼu hikuái Jesúspe. 13  Ohendúvo upéva, Jesús ojupi peteĩ kanóape ha oho upégui peteĩ lugár ikatutahápe oĩ haʼeño. Umi hénte katu oikuaávo upéva, osegi chupe yvýrupi umi siuda guive. 14  Upéi Jesús oguejy pe kanóagui, ha ohechávo umi henteitápe, oiporiahuverekoiterei chupekuéra, ha omonguera umi hasývape. 15  Kaʼaruetémarõ idisipulokuéra ou heʼi chupe: “Tárdema ha koʼárupi ndaipóri mbaʼeve, emondóna koʼã héntepe umi puévlore tojogua oimeraẽ mbaʼe hoʼu hag̃ua”. 16  Jesús katu heʼi chupekuéra: “Natekotevẽingo oho hikuái; pemeʼẽna peẽ chupekuéra hoʼu vaʼerã”. 17  Haʼekuéra osẽ heʼi: “Mbaʼevete ndoroguerekói koʼápe, cinco pan ha mokõi pirámante”. 18  Jesús heʼi: “Pegueru katu umíva koʼápe”. 19  Upe rire heʼi umi héntepe oguapy hag̃ua kapiʼipépe. Ojagarra umi cinco pan ha mokõi pira, omaña yvágare ha oñemboʼe* Ñandejárape. Upéi ombojaʼo umi pan, ha ombohasa idisipulokuérape omeʼẽ hag̃ua umi héntepe. 20  Enterovénte hoʼu hyg̃uatãha meve, ha upéi ombyaty hikuái umi tembiʼu hembýva doce kanásto renyhẽ. 21  Ha umi okaru vaʼekue katu, cinco mil kuimbaʼérupi voi, ha oĩve avei kuña ha mitãnguéra. 22  Upéi pyaʼe porã Jesús heʼi idisipulokuérape tojupi pe kanóape, ohasáma hag̃ua henonderã pe ótro ládo. Haʼe katu opytave ojedespedi hag̃ua umi héntegui. 23  Umi hénte ohopa rire, haʼe ojupi haʼeño pe sérrope oñemboʼe hag̃ua. Ha pyharepyte peve opyta upépe haʼeño. 24  Upe aja pe kanóa mombyryetereíma oho pe y rembeʼýgui, ha pe yvytu atã ohug̃uaitĩva chupekuéra omopuʼã hesekuéra umi oláda, ha vaípe ojecha hikuái. 25  Upéi koʼẽmbotávo, Jesús oguata oúvo hendapekuéra pe mar ári. 26  Ohechávo oĩha peteĩ oguatáva pe mar ári, umi disipulokuéra tuichaiterei oñemondýi, ha okyhyjégui osapukái hikuái: “¡Mbaʼéiko pe oúva*!”. 27  Upévo Jesús oñeʼẽ chupekuéra, ha heʼi: “Ani peñemondýi, chénteko; ani pekyhyje”. 28  Upépe Pedro osẽ heʼi chupe: “Ndéramo añete che Ruvicha, ere chéve aha hag̃ua ne rendápe y ári”. 29  Jesús heʼi chupe: “¡Eju!”. Upémarõ Pedro oguejy pe kanóagui, ha oñepyrũ oguata pe y ári ha oho hendápe. 30  Péro ohechávo pe torménta, okyhyje ha oñepyrũ oñapymi, upévo osapukái: “Che Ruvicha, ¡chesalvamína!”. 31  Upémarõ Jesús ipojái hese ha heʼi chupe: “Ajépa rejeroviaʼiete. ¿Mbaʼére piko péicha ndepyʼamokõi?”. 32  Ojupi rire hikuái pe kanóape opaite pe torménta. 33  Upévo idisipulokuéra oĩva pe kanóape omombaʼe* chupe ha heʼi: “Añetehápe nde hína Ñandejára Raʼy”. 34  Upéi ohasa rire pe ótro ládo, og̃uahẽ hikuái Genesarétpe. 35  Umi kuimbaʼe upepegua opillávo Jesús og̃uahẽha, omondo avíso oparupiete upe jerére. Ha umi hénte ogueru hendápe entéro umi hasývape. 36  Haʼekuéra ojerure asy chupe, ohejamínte hag̃ua opoko pe ijao ruguáire jepe, ha umi opokóva guive hese, okueraite opytávo.

Nóta

Ehecha “Profesía”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “ovendesi umíva”.
Térã: “Péva peteĩ visión”. Ehecha “Visión”, diksionário oĩva ko Bíbliape.
Térã: “oñesũ”. Yma péicha ojehechauka oñemombaʼeha peteĩ tapichápe.