Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Mateo 13:1-58

13  Upe árape, Jesús osẽ rire pe ógagui, oho oguapy pe mar rembeʼýpe.  Ha hetaiterei hénte ou hendápe upépe, upémarõ haʼe ojupi peteĩ kanóape ha oguapy. Umi hénte katu oñemboʼy pe y rembeʼýpe.  Upérõ Jesús oiporu heta ehémplo omboʼe hag̃ua chupekuéra. Oñepyrũvo heʼi: “¡Péina!, peteĩ chokokue osẽ oñemitỹ hag̃ua,  ha oñotỹnguévo oĩ semílla hoʼáva tapére, ha guyrakuéra ou hoʼupa.  Ótra semílla katu hoʼa ita ári. Upépe pyaʼe heñói ndaipypukúigui pe yvy.  Péro kuarahy ojopévo ohapy ha ndahapóigui ipirupa.  Oĩ hoʼáva ñuatĩ apytépe, upéi umi ñuatĩ okakuaa ha ojahoʼipa chupekuéra.  Ótra semílla katu hoʼa yvy porãme ha hiʼa, oĩ hiʼáva cien peve peteĩ semíllagui; oĩ hiʼáva sesenta ha ótro katu hiʼa treinta.  Pe ikatúva ohendu, tojapysaka porã”. 10  Upéi idisipulokuéra* ou heʼi Jesúspe: “¿Mbaʼére piko reñeʼẽ jave chupekuéra reiporu ehémplo?”. 11  Haʼe ombohovái: “Ñandejára penepytyvõ pentende hag̃ua umi sekréto marangatu* Irréino yvagapegua rehegua. Péro chupekuéra nahániri. 12  Pe oguerekóvape oñemeʼẽvéta, hetave oguereko hag̃ua, ha pe oguerekoʼỹvagui katu, pe oguerekomíva jepe ojepeʼáta chugui. 13  Haʼekuéra omaña péro ndohechái mbaʼeve, ohendu péro nontendéi upe ohendúva ni ndopillái mbaʼeve. Upévare añeʼẽ chupekuéra ehémplo rupive. 14  Ha péicha oñekumpli hesekuéra proféta* Isaías ohai vaʼekue: ‘Peẽ pehendúramo jepe, ni mbaʼevéicharõ ndapepillamoʼãi mbaʼeve; pemañáramo jepe, ni mbaʼevéicharõ ndapehechamoʼãi. 15  Koʼãva akãme ndoikevéima mbaʼeve, haʼekuéra ohendu péro ndojapói, omboty hikuái hesa ha ijapysa. Péicha nohendúi ha ndohechái mbaʼevete. Upévare ndohechakuaái mbaʼépa ojapo vaʼerã ha ndojevýi che rendápe amonguera hag̃ua chupekuéra’. 16  ”Peẽ katu pevyʼa pehecha ha pehendúgui koʼã mbaʼe. 17  Añetehápe haʼe peẽme: Heta proféta ha kuimbaʼe hekoporãva ohechase vaʼekue umi mbaʼe peẽ pehecháva, péro ndohechái. Avei ohenduse vaʼekue umi mbaʼe peẽ pehendúva, péro nohendúi. 18  ”Pehendumi mbaʼépa heʼise pe ehémplo oñeʼẽva pe chokokuére. 19  Oĩ jave ohendúva pe marandu Rréino rehegua ha nontendéiva mbaʼépa heʼise, ou pe aña ha oipeʼa pe oñeñotỹ vaʼekue ipyʼapýpe. Upéva hína pe tapére oñeñotỹ vaʼekue. 20  Ha upe oñeñotỹ vaʼekue ita ári; upéva hína pe ohendúva pe marandu ha pyaʼe voi oguerovia vyʼapópe. 21  Péro noñembohapói rupi ikorasõme sapyʼaiténte okakuaa, ha ohasa asy térã oĩvo oñemoĩva hese pe marandu káusare, pyaʼe oñepysanga. 22  Pe oñeñotỹ vaʼekue ñuatĩ apytépe, upéva hína pe ohendúva pe marandu péro ojepyʼapyeterei hemikotevẽ ko mundopeguáre* ha pe platarayhu ombotavy chupe. Koʼã mbaʼe ojahoʼipa pe marandu ha upévare haʼe ndahiʼái. 23  Pe oñeñotỹva yvy porãme katu haʼe hína pe ohendúva pe marandu ha ontendéva mbaʼépa heʼise. Péva añetehápe hiʼa ha osẽ porã, oĩ hiʼáva cien peve peteĩ semíllagui; oĩ hiʼáva sesenta ha ótro katu treinta”. 24  Jesús omombeʼu avei chupekuéra ótro ehémplo: “Pe Rréino yvagapegua ojogua peteĩ kuimbaʼépe oñotỹ vaʼekue ikokuépe semílla iporãva. 25  Umi kuimbaʼe oke aja, ou iñenemígo oñotỹ ñana vai pe trígo apytépe ha oho. 26  Pe trígo heñói ha hiʼa, upévo osẽ avei pe ñana vai. 27  Upémaramo umi tembiguái ou heʼi pe ogajárape: ‘Patrón, ndéngo reñotỹ kuri semílla iporãva nde kokuépe, ¿ajépa? ¿Mbaʼéicha rupi piko upéicharõ osẽ koʼã ñana vai?’. 28  Haʼe heʼi chupekuéra: ‘Peteĩ che enemígo ojapo upéva’. Umi tembiguái heʼi: ‘¿Reipota piko roho romondoro?’. 29  Haʼe heʼi: ‘Nahániri, ani ág̃a peichahágui pemondorohápe pe ñana, pemondoro avei pe trígo hendive. 30  Peheja mokõivéva tokakuaa oñondive pe kosécha tiémpo peve, ha upévo haʼéta umi omonoʼõvape: Pembyaty raẽ pe ñana ha pejokua pehapy hag̃ua, ha upéi pembyaty pe trígo che galpónpe*’”. 31  Jesús omoĩ jey ótro ehémplo: “Pe Rréino yvagapegua ojogua peteĩ mostása raʼỹime, peteĩ kuimbaʼe ojagarra vaʼekue oñotỹ ikokuépe. 32  Pe mostása raʼỹi ningo pe semílla michĩvéva, péro upéi heñói ha tuichaiteve ambue kógagui, oiko chugui peteĩ yvyramáta, ha ou umi guyrakuéra yvagapegua ojaitypo hakãre”. 33  Omombeʼu avei chupekuéra ótro ehémplo: “Pe Rréino yvagapegua ojogua levadúrape, peteĩ kuña ombojeheʼáva* diez kílo arínare pe mása kompletoite ovu peve”. 34  Jesús oiporu umi ehémplo omombeʼu hag̃ua koʼã mbaʼe umi héntepe. Añetehápe, haʼe oiporu katuete umi ehémplo oñeʼẽ jave. 35  Péicha oñekumpli pe profesía heʼíva: “Aiporúta ehémplo amboʼe hag̃ua chupekuéra, amombeʼúta umi mbaʼe iñepyrũmby guive oĩva kañyháme”. 36  Upéi omondo rire umi héntepe, Jesús oike pe ógape. Upépe idisipulokuéra ou hendápe ha heʼi: “Ndéngo reñeʼẽ kuri ñana vai oñeñotỹ vaʼekuére kokuépe. Emyesakãna oréve mbaʼépa heʼise upe ehémplo”. 37  Haʼe ombohovái: “Pe chokokue osẽva oñotỹ pe semílla iporãva, upéva hína pe Yvypóra Raʼy*, 38  pe kokue katu, ko múndo*. Pe semílla iporãva, umíva hína pe Rréino ñemoñare; ha pe ñana katu pe aña ñemoñare. 39  Pe enemígo ou vaʼekue oñotỹ pe ñana vai, upéva hína pe Aña*. Pe kosécha tiémpo katu pe múndo ára pahaite oñemoag̃uívo; ha umi omonoʼõva, umi ánhel. 40  Ha pe ñana vai oñembyatyháicha ojehapy hag̃ua, upéicha avei oikóta pe múndo ára pahaite oñemoag̃uívo. 41  Pe Yvypóra Raʼy omondóta hiʼanhelkuérape, ha haʼekuéra ombyatýta Irréinogui entéro umi omoñepysangáva hapichápe ha umi hembiapo vaívape. 42  Ha opoíta chupekuéra tatakua rendýpe, upépe haʼekuéra hasẽ soro ha ipyahẽta ñembyasýgui. 43  Upérõ umi hekojojáva kuarahýicha omimbíta Itúva Rréinope. Pe ikatúva ohendu, tojapysaka porã. 44  ”Pe Rréino yvagapegua ojogua pláta yvyguýpe, peteĩ kuimbaʼe otopáva pe ñúme ha upéi oñomi jeýva. Ha ovyʼaitereígui oho ovendepa ikosakuéra ha ojogua upe ñu. 45  ”Pe Rréino yvagapegua ojogua avei peteĩ komersiántepe, oikóva oviaha oheka hag̃ua pérla iporãva. 46  Ha ojuhúvo peteĩ pérla iporãitereíva, oho pyaʼe porã ovendepa ikosakuéra ha ojogua. 47  ”Pe Rréino yvagapegua ojogua avei peteĩ rred tuichaitereívape, ojepoíva márpe ha onohẽva opaichagua pira. 48  Ha henyhẽ rire pirágui oñeguenohẽ y rembeʼýpe, ha upépe oñemoĩ kanástope umi pira iporãva, ha oñemombo umi ndovaléiva. 49  Upéicha oikóta pe múndo ára pahaite oñemoag̃uívo, umi ánhel osẽta ha omboykéta umi iñañáva hekojojáva apytégui. 50  Ha opoíta umi iñañávape tatakua rendýpe, upépe hasẽ soro ha ipyahẽta hikuái ñembyasýgui. 51  ”¿Pepilla piko mbaʼépa heʼise koʼã mbaʼe?”. Haʼekuéra heʼi: “Ropilla”. 52  Ha Jesús heʼi: “Upéicharõ katu, peteĩ mboʼehára oñehekomboʼe vaʼekue pe Rréino yvagapeguáre, ojogua peteĩ ogajárape, onohẽva imbaʼerepy apytégui mbaʼe ipyahúva ha itujáva”. 53  Upéi, omboʼepa rire chupekuéra koʼã ehémplo rupive, Jesús osẽ oho upégui. 54  Ha og̃uahẽ rire ivállepe oñepyrũ oporomboʼe umi sinagogahárupi*, ha umi hénte ijurujaipa opytávo ha heʼi: “¿Moõgui piko kóva osẽ iñaranduete? ¿Ha máva piko omeʼẽ chupe podér ojapo hag̃ua koʼã milágro? 55  ¿Kóva piko ndahaʼéi pe karpintéro raʼy? ¿Ha isy piko ndahaʼéi María, ha umi iñermáno Santiago, José, Simón, ha Judas? 56  ¿Ha iñermanakuéra piko ndahaʼéi umi oikóva árupi ñanendive? ¿Mbaʼéicha rupi piko upéicharõ ivalete ko kuimbaʼe?”. 57  Ha ndojeroviaséi* hese hikuái. Jesús katu heʼi chupekuéra: “Peteĩ profétape ningo opárupi ojeguerohory. Péro ivállepe ha hogayguakuéra apytépe ndojeguerohorýi chupe”. 58  Ha ndojeroviáigui hese hikuái, ndojapói upépe heta milágro.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Sekréto Marangatu”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “sílope”.
Griégope heʼi: “omokañýva”.
Ehecha “Yvypóra Raʼy”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Térã: “oñepysanga hikuái ikáusare”.