Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 8:1-38

8  Umíva umi árape ijaty jey Jesús rendápe hetaiterei hénte, ha ndoguerekói hikuái hoʼu vaʼerã, upévare haʼe ohenoika idisipulokuérape* ha heʼi:  “Aiporiahuvereko koʼã héntepe, ojapóma ningo tres día opyta hague chendive, ha ndorekói hoʼu vaʼerã.  Oĩ hóga mombyryetereíva ha ahejáramo oho hikuái pyʼa nandi ikatu ikangypa tapére”.  Idisipulokuéra ombohovái chupe: “Koʼárupi ndaipóri mbaʼeve. ¿Moõgui piko roguenohẽta pan romoyg̃uatã hag̃ua koʼã henteitápe?”.  Upéicharamo jepe Jesús oporandu chupekuéra: “¿Mboy pan piko peguereko?”. Haʼekuéra heʼi: “Siete”.  Upéi Jesús heʼi umi héntepe oguapy hag̃ua yvýpe, ojagarra umi siete pan, oñemboʼe Ñandejárape, ha ombohasa idisipulokuérape, omeʼẽ hag̃ua umi héntepe.  Oguereko avei hikuái mbovymi piraʼi, ha Jesús oñemboʼe rire Ñandejárape heʼi idisipulokuérape ombohasa hag̃ua umi héntepe.  Enterovete okaru hyg̃uatãha meve, ha umi tembiʼu hembýva ombyaty hikuái siete kanásto guasu renyhẽ.  Ha umi okaru vaʼekue katu cuatro mil kuimbaʼérupi. Upe rire Jesús omondo umi héntepe hógape. 10  Ha ojupi peteĩ kanóape idisipulokuérandi ha oho Dalmanútape. 11  Upérõ og̃uahẽ umi fariséo*, ha oñepyrũ odiskuti Jesúspe. Ojerure chupe hikuái tojapo peteĩ milágro Ñandejára rérape. 12  Upévo Jesús osuspira ipyʼa mbytete guive ha heʼi: “¿Mbaʼére piko umi hénte oikóva ko tiémpope* milágronte voi ohechase? Añetehápe haʼe peẽme: Koʼã héntepe ndojehechaukamoʼãi ni peteĩ milágro”. 13  Upévo oheja chupekuéra, ojupi jey pe kanóape ha ohasa pe ótro ládo. 14  Idisipulokuéra hesarái ha ndoguerahái mbaʼevete hoʼu hag̃ua, peteĩ pan añoite oguereko hikuái pe kanóape. 15  Ha Jesús heʼi porã chupekuéra: “Pejesareko meméke ha peñeñangareko umi fariséo ha Herodes levadúragui”. 16  Idisipulokuéra katu oñepyrũ ojodiskuti ndoguerúi haguére pan. 17  Ohechávo upéva Jesús heʼi chupekuéra: “¿Mbaʼére piko pejodiskuti ndapeguerúi haguére pan? ¿Ndapehechakuaái gueteri mbaʼépa heʼise ko mbaʼe? ¿Ndaikatúi gueteri piko pentende? 18  ‘Peẽ ningo pende resa ha ndapehechái, pende apysa ha napehendúi.’ ¿Napenemanduʼái piko 19  ambojaʼórõ guare cinco pan umi cinco mil kuimbaʼépe g̃uarã? ¿Mboy kanásto renyhẽ piko pembyaty raʼe umi pan hemby vaʼekuégui?”. Haʼekuéra heʼi: “Doce”. 20  “Ha ambojaʼórõ guare siete pan umi cuatro mil kuimbaʼépe g̃uarã, ¿mboy kanásto guasu renyhẽpa pembyaty raʼe umi pan hembývagui?” Haʼekuéra heʼi: “Siete”. 21  Upémarõ Jesús heʼi chupekuéra: “¿Neʼĩra piko pehechakuaa mbaʼépa heʼise koʼã mbaʼe?”. 22  Upe rire og̃uahẽ hikuái Betsáidape. Upépe umi hénte ogueru hendápe peteĩ kuimbaʼe isiégova, haʼekuéra ojerure asy Jesúspe omonguera hag̃ua chupe. 23  Jesús ojagarra pe kuimbaʼépe ipógui ha oguenohẽ pe puévlogui. Upéi ondyvu hesáre, omoĩ ipo hiʼári ha oporandu chupe: “¿Mbaʼépa rehecha?”. 24  Pe kuimbaʼe omaña henonde gotyo ha heʼi: “Haʼeténgo yvyramáta, péro oiméne kuimbaʼe hína ajeve la oguata”. 25  Upémaramo Jesús opoko jey hesáre, pe kuimbaʼe okueraite ha ohecha porã opa mbaʼe. 26  Upévo haʼe omondo pe kuimbaʼépe hógape ha heʼi chupe: “Aníke reike pe puévlope”. 27  Upéi Jesús ha idisipulokuéra oho umi kompañiaháre oĩva Cesarea de Filípope. Tapére haʼe oñepyrũ oporandu chupekuéra: “¿Mbaʼépa heʼi umi hénte, mávapa hína che?”. 28  Haʼekuéra ombohovái: “Oĩ heʼíva Juan el Bautista térã Elías, ha ótro katu heʼi peteĩ proféta*”. 29  Ha haʼe oporandu chupekuéra: “¿Ha mbaʼépa peẽ peje?”. Pedro ombohovái chupe: “Nde hína pe Cristo*”. 30  Upémaramo heʼi chupekuéra ani hag̃ua ni mbaʼevéicharõ omombeʼu upéva avavépe. 31  Upévo Jesús oñepyrũ omombeʼu idisipulokuérape pe Yvypóra Raʼy* heta ohasa asytaha. Ha umi karai guasu, saserdóte ruvichakuéra* ha mboʼehára leipegua* omboyketaha chupe, ha ojejukáta, péro tres día haguépe opuʼã jeýta. 32  Péicha Jesús omombeʼu porã chupekuéra mbaʼépa oikóta hese. Péro Pedro omohaʼeño chupe ha oñepyrũ omongavaju chupe. 33  Jesús katu ojere chugui, omaña hemimboʼekuéra gotyo ha ojaʼo Pédrope: “¡Eñemoĩ che atukupépe Satanás*! Nde nerepensái Ñandejára opensaháicha, repensa guei yvyporakuéraicha”. 34  Upéi Jesús ohenói umi héntepe ha idisipulokuérape, ha heʼi: “Oĩramo chemoirũséva, toñembyesarái ijehegui, tohupi ijapére ijyvyra pohýi* ha tachemoirũ meme. 35  Oimeraẽ osalvaséva hekove* omanóta, péro oimeraẽ omanóva* haʼe haguére che disípulo térã pe marandu porã* rehehápe, ojesalváta. 36  Añetehápe, ¿mbaʼépe piko ideprovécho peteĩ kuimbaʼépe orekopáramo ko múndope* oĩva, ha upéi omano*? 37  Térã, ¿mbaʼépa omeʼẽta pe kuimbaʼe osalva hag̃ua hekove*? 38  Oimeraẽ oguerotĩva che ñeʼẽ, ha otĩva heʼi hag̃ua haʼeha che disípulo koʼã hénte aña ha oporomoakãratĩva apytépe, pe Yvypóra Raʼy avei otĩta heseve ág̃a og̃uahẽ vove Itúva rekomimbipa reheve umi ánhel marangatu ndive”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Fariséo”, diksionário oĩva ko Bíbliape.
Ehecha “Umi Hénte Oikóva ko Tiémpope”, diksionário oĩva ko Bíbliape.
Haʼekuéra oiméne oimoʼã haʼeha peteĩ proféta yma guare oñemoingove jey vaʼekue. Ehecha Lu 9:19. Ehecha avei “Profesía”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Ehecha “Yvyra Pohýi”, Informasión Oĩvéva 6-pe.
Griégope heʼi: “hiʼálma”. Ehecha “Álma”, Informasión Oĩvéva 7A-pe.
Griégope heʼi: “ohundíva hiʼálma”.
Ehecha “Marandu Porã”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Griégope heʼi: “ohundi hiʼálma”.
Griégope heʼi: “hiʼálma”.