Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 4:1-41

4  Upe rire Jesús oñepyrũ jey oporomboʼe pe mar rembeʼýpe ha hetaiterei hénte ijaty ijypýpe. Upémarõ haʼe ojupi ha oguapy peteĩ kanóape, ohomie y rembeʼýgui, ha umi hénte opyta pe kóstape.  Upévo Jesús oñepyrũ omboʼe chupekuéra heta mbaʼe ehémplo rupive, ha heʼi:  “¡Pehendumína! Pe chokokue osẽ oñemitỹ,  ha oñotỹnguévo oĩ semílla hoʼáva tapére ha guyrakuéra ou hoʼupa.  Ótra semílla katu hoʼa ita ári. Upépe pyaʼe heñói ndaipypukúigui pe yvy.  Péro kuarahy ojopévo ohapypa pe kogaraʼy ha ndahapóigui ipiru.  Oĩ avei hoʼáva ñuatĩ apytépe, upéi umi ñuatĩ okakuaa, ojahoʼipa chupekuéra ha upévare ndahiʼái.  Ótra semílla katu hoʼa yvy porãme, heñói ha okakuaa. Oĩ hiʼáva treinta, oĩ hiʼáva sesenta ha ótro katu cien peteĩ semíllagui”.  Upe rire heʼi avei: “Pe ikatúva ohendu, tojapysaka porã”. 10  Upéi, umi hénte ohopa rire, umi oĩva ijypýpe ha umi doce apóstol* oporandu Jesúspe mbaʼépa heʼise umi ehémplo. 11  Jesús heʼi chupekuéra: “Ñandejára penepytyvõ pentende hag̃ua umi sekréto marangatu* Irreinopegua. Péro umi ótrope amboʼe ehémplo rupive. 12  Péicha omañavéramo jepe hikuái ndohechamoʼãi mbaʼeve, ha ohendúramo jepe ndopillamoʼãi mbaʼeve. Ha arakaʼeve ndojevymoʼãi oñeperdona hag̃ua chupekuéra”. 13  Heʼi avei: “Peẽ napentendéi ko ehémplo, ¿mbaʼéicha piko upéicharõ pentendepáta umi ótro ehémplo? 14  ”Pe chokokue oñotỹ Ñandejára ñeʼẽ. 15  Umi oñeñotỹva tapére, umíva hína umi ohendúva Ñandejára ñeʼẽ ha upéi oúma Satanás* ogueraha pe ñeʼẽ oñeñotỹ vaʼekue ipyʼapypekuéra. 16  Upéicha avei umi oñeñotỹ vaʼekue ita ári, umíva ohendu Ñandejára ñeʼẽ ha oguerovia vyʼapópe. 17  Péro noñembohapói rupi ikorasõme, sapyʼaiténte okakuaa, ha Ñandejára ñeʼẽ káusare ohasa asy térã oĩvo oñemoĩva hesekuéra, oñepysanga hikuái. 18  Oĩ avei oñeñotỹva ñuatĩ apytépe, koʼãva hína umi ohendúva Ñandejára ñeʼẽ, 19  péro ojepyʼapyeterei hemikotevẽ ko mundopeguáre*, pe platarayhu ombotavy chupekuéra ha oipotaiterei opa mbaʼe. Koʼã mbaʼe mbeguekatúpe oike ikorasõme ha ojahoʼipa Ñandejára ñeʼẽ, ha upévare ndahiʼái. 20  Ipahápe, umi oñeñotỹ vaʼekue yvy porãme haʼe hína umi ohendu ha orresivi porãva Ñandejára ñeʼẽ. Koʼãva hiʼa treinta, oĩ hiʼáva sesenta ha ótro katu cien peteĩ semíllagui”. 21  Ha heʼi avei: “Peteĩ lámpara ndojeguerúi oñemoĩ hag̃ua kanásto térã tupa guýpe, ¿ajépa? Ojegueru guei oñemoĩ ojehecha hag̃uáme. 22  Ndaipóri hína mbaʼeve oñeñomíva ikatuʼỹ vaʼerã upe rire ojehecha, térã oñemokañy porãva ikatuʼỹ vaʼerã upe rire osẽ hesakãháme. 23  Pe ikatúva ohendu, tojapysaka porã”. 24  Heʼi avei chupekuéra: “Peñatende porãke koʼã mbaʼe pehendúvare. Cháke pe medída peiporúva pende rapicháre ojeporúta penderehe, ha hiʼarive oñembojoʼáta peẽme. 25  Pe oguerekóvape oñemeʼẽvéta, ha pe oguerekoʼỹvagui katu, pe oguerekóva jepe ojepeʼáta chugui”. 26  Ha Jesús heʼive: “Péicha avei Ñandejára Rréino ojogua peteĩ kuimbaʼe oñemitỹvape. 27  Haʼe oke pyharekue ha opuʼã arakuépe, pe semílla katu heñói ha okakuaa (péro haʼe ndoikuaái mbaʼéichapa oiko upéva). 28  Mbeguekatúpe ijehegui voi pe yvy omoheñói pe semílla. Tenonderã osẽ hakã, upéi ijespíga ha ipahápe okakuaa otyarõ meve. 29  Upéi otyarõvo, pe kuimbaʼe ogueru imachéte ha oikytĩ og̃uahẽmagui pe kosécha tiémpo”. 30  Upéi heʼive: “¿Mbaʼérehepa ñambojojáta Ñandejára Rréino, térã mbaʼe ehémplopa jaiporúta ñamyesakã hag̃ua? 31  Ojogua peteĩ mostása raʼỹime, oñeñotỹvo haʼéva hína pe semílla michĩvéva oĩva ko yvy ape ári, 32  péro oñeñotỹ rire heñói, okakuaa ha umi hakã tuichave umi ótro kógagui, upévare umi guyrakuéra yvagapegua ikatu ojaitypo hakãre ha oñemoʼã isómbra guýpe”. 33  Haʼe oiporu heta ehémplo koʼãichagua omombeʼu hag̃ua chupekuéra Ñandejára Ñeʼẽ, péro ojapo upéva haʼekuéra ikatuha peve ontende. 34  Añetehápe haʼe katuete oiporu umi ehémplo oñeʼẽ jave, ha upéi haʼeñoháme omyesakã idisipulokuérape* opa mbaʼe. 35  Ha upe díape kaʼarupytũvo heʼi chupekuéra: “Jahasána pe ótro ládo”. 36  Upévare idisipulokuéra omondopa rire umi hénte upégui, ogueraha Jesúspe pe kanóape. Ha oĩ avei upépe ótro kanoakuéra. 37  Upéi hoʼa hiʼarikuéra peteĩ torménta ndevaíva ha oipeju peteĩ yvytu hatãitereíva, umi oláda ojejapete pe kanóare, oikepa pe y ha haimetemete omyenyhẽ pe kanóa. 38  Jesús katu upe aja oke hína peteĩ akangyta ári pe kanóa rapykuépe. Upémarõ idisipulokuéra omombáy chupe ha heʼi: “¡Mboʼehára! ¿Nderejapomoʼãi piko mbaʼeve, nderehechái piko la ñamanombatamaha?”. 39  Upévo Jesús opuʼã ojaʼo pe yvytúpe ha heʼi pe márpe: “¡Epytaitéke! ¡Ekirirĩetéke!”. Ha pe yvytu opyta ha pe torménta ohasaite. 40  Upémarõ heʼi chupekuéra: “¿Mbaʼére piko pekyhyje? ¿Ndapejeroviái gueteri piko?”. 41  Haʼekuéra katu okyhyjeterei ha heʼi ojupe: “¿Máva piko añetehápe ko kuimbaʼe? Yvytu ha mar jepe iñeʼẽrendu chupe”.

Nóta

Ehecha “Apóstol”, diksionário oĩva ko Bíbliape.
Ehecha “Sekréto Marangatu”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.