Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 3:1-35

3  Upéi Jesús oike jey peteĩ sinagógape*, ha upépe oĩ peteĩ kuimbaʼe ipo ypíva.  Umi fariséo* katu omaña porã Jesús rehe jahecha omonguerátapa pe kuimbaʼépe sábadope, ikatu hag̃uáicha okopi hese.  Jesús osẽ heʼi pe kuimbaʼe ipo ypívape: “Epuʼã ha eñemoĩ mbytépe”.  Upéi heʼi umi fariséope: “¿Mbaʼépa iporãve jajapo sabadokue, iporãva térãpa ivaíva? ¿Iporãvépa jasalva ñande rapichápe* térã jajuka?”. Haʼekuéra katu okirirĩete.  Upe rire Jesús omaña vai hesekuéra ha ombyasyeterei peichaite peve ipyʼahatã haguére hikuái. Upéi heʼi pe kuimbaʼépe: “Eipyso nde po”, ha oipysóvo ipo, opyta porã jey.  Ohechávo upéva, umi fariséo osẽ upégui, oñembyaty pyaʼe porã ha oñemongeta Herodes segidorkuérandi, ohecha hag̃ua mbaʼéichapa ojukáta Jesúspe.  Jesús ha idisipulokuéra* katu oho mar gotyo, ha heta hénte Galilea ha Judeagua oho hapykuéri.  Ohendúvo umi mbaʼeta ojapóva, ou avei hendápe hetaiterei hénte Jerusalén, Idumea, Tiro ha Sidón jerégui, ha avei umi oĩva jahasávo Jordán.  Ha Jesús heʼi idisipulokuérape ogueru hag̃ua peteĩ kanoaʼi, ikatu hag̃uáicha oiporu ojopypárõ g̃uarã chupe umi henteita. 10  Haʼe ningo omonguera hetápe, upévare opavave hasýva oñomyañamba opokoségui hese. 11  Umi demónio* jepe ohecha vove chupe, oñesũ henondépe ha osapukái hikuái: “Nde hína Ñandejára Raʼy”. 12  Jesús katu omanda chupekuéra ani hag̃ua ni mbaʼevéicharõ omombeʼu mávapa haʼe. 13  Upéi ojupi peteĩ sérrope ha ohenoika umi haʼe oiporavo vaʼekuépe, ha ou hikuái hendápe. 14  Upévo haʼe oiporavo ijapyteguikuéra doce kuimbaʼe omoirũ hag̃ua chupe ha opredika hag̃ua avei. Koʼãvape ohenói apóstol*. 15  Ha omeʼẽ chupekuéra autorida omosẽ hag̃ua umi demóniope. 16  Koʼãva hína umi doce oiporavo vaʼekue: Simón, chupe haʼe ombohéra avei Pedro, 17  Santiago haʼéva Zebedeo raʼy ha iñermáno Juan (koʼã mokõime Jesús ombohéra Boanerges, heʼiséva “Arasunu Raʼy”), 18  avei Andrés, Felipe, Bartolomé, Mateo, Tomás, Santiago haʼéva Alfeo raʼy, Tadeo, Simón pe cananita, 19  ha Judas Iscariote, upéi otraisiona vaʼekue chupe. Upe rire Jesús oho oike peteĩ ógape. 20  Upépe oñembyaty jey hetaiterei hénte, upévare haʼekuéra ndaikatúi ni okaru. 21  Oikuaávo upéva Jesús hentekuéra ou ogueraha hag̃ua chupe, heʼígui hikuái: “Itavyraíma ningo”. 22  Ha umi mboʼehára leipegua* oúva Jerusaléngui heʼi avei: “Kóva ningo oĩ Beelzebub* poguýpe ha omosẽ umi demónio, oipytyvõgui chupe umi demónio ruvicha”. 23  Jesús katu ohenói chupekuéra ha omoĩ peteĩ ehémplo, heʼívo: “¿Mbaʼéicha piko Satanás* omosẽta Satanáspe? 24  Peteĩ goviérno hoʼáta umi hénte oiko vaipáramo oñondive, 25  ha umi hénte oĩva peteĩ ógape ndohopukumoʼãi opuʼãmbárõ oñoakãre. 26  Upéicha avei Satanás opuʼãrõ ijehe voi, ha umi oĩva ipoguýpe opuʼãmbárõ oñoakãre, ndohopukumoʼãi ha oñehundíta. 27  Añetehápe, oĩramo oikéva peteĩ kuimbaʼe imbaretéva rógape omonda hag̃ua chugui ikosakuéra, tekotevẽ oñapytĩ raẽ chupe, ha upéi ae ikatúta omonandi chugui hóga. 28  Añetehápe haʼe peẽme, yvyporakuérape oñeperdonáta opaichagua pekádo ojapóva térã ñeʼẽ vai* heʼíva. 29  Péro oimeraẽ otakýva espíritu sántore* noñeperdonamoʼãi arakaʼeve, ipekádo opytáne hiʼári opa ára g̃uarã”. 30  Jesús heʼi upéva haʼekuéra heʼi haguére: “Oñendemonia ningo péva”. 31  Upéi ou isy ha iñermanokuéra, oñemboʼy hikuái okápe, ha heʼika Jesúspe osẽ hag̃ua hendapekuéra. 32  Upérõ umi henteita oguapyjoáva Jesús jerére, heʼi chupe: “¡Péina!, okápe oime nde sy ha ne ermanokuéra ndereka hína”. 33  Haʼe katu ombohovái chupekuéra: “¿Máva piko che sy ha che ermanokuéra?”. 34  Ha ojere omaña umi oguapývare ijerére ha heʼi: “¡Péina, che sy ha che ermanokuéra! 35  Oimeraẽ ojapóva Ñandejára rembipota, upéva hína che ermáno, che ermána ha che sy”.

Nóta

Ehecha “Sinagóga”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Griégope heʼi: “peteĩ álma”. Ehecha “Álma”, Informasión Oĩvéva 7A-pe.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “umi espíritu”. Ehecha “Demónio”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Beelzebub”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Térã: “blasfemia”, ehecha diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.