Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 16:1-20

16  Ohasa rire pe sábado, María Magdalena, María haʼéva Santiago sy ha Salomé ojogua mbaʼe ryakuã porã omoĩ hag̃ua Jesús retekuére.  Ha pe semána oñepyrũha díape, pyharevete kuarahy osẽvo, ou ohecha hikuái pe sepultúra.  Haʼekuéra heʼi ojupe: “¿Máva piko oipeʼáta ñandéve pe ita ombotýva sepultúra juru?”.  Péro omañávo, ohecha hikuái pe ita ojepeʼáma hague tuichaitereíramo jepe.  Umi kuña oikévo pe sepultúra ryepýpe, ohecha iderécha gotyo oguapyha hína peteĩ kariaʼy ijao morotĩ pukúva, ha ososopaite hikuái.  Haʼe heʼi: “Ani pekyhyje, peẽ peheka Jesús Nazaretguápe, pe oñemosaingo vaʼekue yvyráre. Péro haʼe ndaiporivéima koʼápe, chupe oñemopuʼã jeýma kuri. Pemañami pe lugár oñemoĩ hague.  Tapeho katu peje idisipulokuérape* ha Pédrope: ‘Haʼe oho pene renonderã Galiléape, upépe pehecháta chupe, heʼi haguéicha peẽme’”.  Umi kuña ningo tuichaiterei oñemondýi ha oryryipa, upévare odipara osẽvo pe sepultúragui. Péro okyhyje rupi, haʼekuéra nomombeʼúi avavépe pe oiko vaʼekue.* ÑEMOHUʼÃ MBYKÝVA Péro opa koʼã mbaʼe oñemanda vaʼekue chupekuéra, omombeʼu mbykymi hikuái umi oĩvape Pedro ndive. Oiko rire koʼã mbaʼe Jesús voi omondo chupekuéra kuarahyresẽ guive kuarahyreike peve, oikuaauka hag̃ua pe marandu imarangatúva ha oñehundiʼỹva: Ñandejára osalvataha yvyporakuérape opa ára g̃uarã. ÑEMOHUʼÃ IPUKÚVA  Jesús opuʼã rire, pyharevete pe semána oñepyrũha ára, ojechauka María Magdalénape raẽ, chugui haʼe omosẽ vaʼekue siete demónio. 10  Ha haʼe oho omombeʼu idisipulokuérape, upérõ haʼekuéra hasẽ ha oñembyasy hína. 11  Péro ohendúvo hikuái Jesús oikove jeyha ha María Magdalena ohecha hague chupe, ndogueroviái. 12  Upe rire Jesús ojechauka ótro kuimbaʼerõguáicha, mokõi idisípulope oho jave hikuái ñúme. 13  Koʼãva oho omombeʼu umi ótrope, péro ndogueroviái jeýnte hikuái. 14  Ipahápe Jesús ojechauka umi óncepe oguapy aja hikuái mesápe, ha ojaʼo chupekuéra, oñemohatã ha ndogueroviái haguére umi ohecha vaʼekuépe chupe opuʼã jeymaha omanóva apytégui. 15  Jesús heʼi: “Tapeho pemombeʼu pe marandu porã umi héntepe oparupiete ko yvy ape ári. 16  Pe oguerovia ha ojevautisáva ojesalváta, pe ogueroviaʼỹva katu oñekondenáta. 17  Umi ogueroviáva ikatúta ojapo koʼã milágro: Che réra rupive omosẽta demónio, oñeʼẽta heta idiómape, 18  ipópe ojagarráta mbói ha hoʼúramo venéno ndojapomoʼãi hesekuéra mbaʼevete asy. Omoĩta hikuái ipo umi hasýva ári ha umíva okueráta”. 19  Heʼipa rire koʼã mbaʼe Jesús ojehupi yvágape ha oguapy Ñandejára deréchape. 20  Upémarõ idisipulokuéra oho opredika oparupiete, Jesús katu ohechauka añeteha pe marandu ogueraháva hikuái umi milágro haʼekuéra ojapóva rupive.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Heta manuskríto iñimportánteva omohuʼã kapítulo 16, versíkulo 8-pe. Péro oĩ manuskríto yma guare orekóva pe ñemohuʼã ipukúva, ha ótro manuskríto ipyahuvéva oreko pe ñemohuʼã mbykýva. Upéicharamo jepe ni peteĩ koʼã párte ndojehaíri Ñandejára espíritu rupive.