Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 14:1-72

14  Upéi, dos día haguépe og̃uahẽ pe Páskua*, ha pe Pan Ilevaduraʼỹva Arete*. Umi saserdóte ruvichakuéra* ha umi mboʼehára leipegua*, oñemongeta ohecha hag̃ua mbaʼéichapa ikatu ojagarra Jesúspe* ha ojuka.  Péro heʼi jey jey hikuái: “Anínte jajapo pe arete aja, ani hag̃ua oiko tuicha guyryry umi hénte apytépe”.  Upéi Jesús oĩ Betániape, Simón pe ilépra vaʼekue rógape, ha oguapy aja hína mesápe ou peteĩ kuña; haʼe ogueru peteĩ mbaʼyruʼi* henyhẽva aséite hyakuã asývagui, ojejapóva nárdo teetégui ha hepyetereíva. Pe kuña oavri pe mbaʼyruʼi ha oñepyrũ oñohẽ Jesús akãre.  Ohechávo upéva hikuái, oĩ ipochýva ha heʼíva ojupe: “¿Mbaʼupe piko oñeñohẽ rei pe aséite hyakuã asýva?  ¡Ko aséite hyakuã asyetéva ikatu kuri oñevende trescientos denáriore* térã hepyve, ha oñemeʼẽ umi imboriahúvape!”. Ha ipochy hikuái pe kuña rehe.  Péro Jesús heʼi: “Pehejána. ¿Mbaʼére piko pemolestase chupe? Iporãiterei ningo pe ojapóva cherehe.  Umi imboriahúva akóinte oĩ penendive, ha oimeha díante ikatu peipytyvõ chupekuéra, che katu naimemoʼãi penendive opa árare.  Haʼe ojapo pe ikatumíva, omoĩ cherehe ko aséite hyakuã asýva, péicha opreparáma che rete oñeñotỹ hag̃ua.  Añetehápe haʼe peẽme: Oñemombeʼúvo umi marandu porã* oparupiete ko yvy ape ári, oñemombeʼúta avei ko kuña ojapo vaʼekue ojegueromanduʼa hag̃ua chupe”. 10  Upe rire, Judas Iscariote, oĩva avei umi doce apóstol* apytépe, oho umi saserdóte ruvichakuéra rendápe ontrega* hag̃ua chupekuéra Jesúspe. 11  Haʼekuéra ovyʼaiterei ohendúvo upéva, ha opromete hikuái Júdaspe omeʼẽtaha chupe monéda de pláta. Upémarõ haʼe oñepyrũ oheka arakaʼépa opyta porãvéta chupe otraisiona hag̃ua Jesúspe. 12  Oñepyrũvo pe Pan Ilevaduraʼỹva Arete, upe díape haʼekuéra ojuka jepi pe mymba Páskuape g̃uarã. Idisipulokuéra* oporandu Jesúspe: “¿Moõpa reipota roho roprepara ndéve pe séna Páskuape g̃uarã?”. 13  Upémarõ Jesús omondo mokõi idisípulope ha heʼi chupekuéra: “Tapeho pe siudápe, ha pejotopáta peteĩ kuimbaʼéndi ogueraháva y peteĩ kambuchípe. Tapeho hendive 14  ha pe oikehápe, peje pe ogajárape: ‘Ore Mboʼehára heʼika ndéve: “¿Moõ piko oĩ pe koty aiporútava asena hag̃ua ko Páskuape che disipulokuérandi?”’. 15  Haʼe ohechaukáta peẽme peteĩ koty guasu, oĩva yvate, upépe oĩmbaite umi mbaʼe jaiporútava, peprepara ñandéve upépe”. 16  Upémarõ idisipulokuéra osẽ oho, oike upe siudápe, otopa Jesús heʼi hagueichaite chupekuéra, ha oprepara hikuái upépe pe Páskua. 17  Pytũ rire, Jesús oho umi doce apóstol ndive. 18  Ha oguapy aja hikuái mesápe osena hag̃ua, Jesús heʼi: “Añetehápe haʼe peẽme: Peteĩva pende apytépe, okarúva hína chendive, chetraisionáta”. 19  Haʼekuéra oñeñandu vaieterei ha enterovénte heʼijoa chupe: “Ndachéi hína, ¿ajépa?”. 20  Jesús heʼi chupekuéra: “Peteĩva pende apytégui, upe opoʼẽva chendive ko fuéntepe, upéva haʼe hína. 21  Añetehápe, pe Yvypóra Raʼy* omanóta ojehai haguéicha Ñandejára Ñeʼẽme. Péro, ¡aichejáranga voi pe otraisionáva pe Yvypóra Raʼýpe! Ikuentave vaʼerãmoʼã upe kuimbaʼépe nonaséirire”. 22  Osena aja gueteri hikuái, Jesús ojagarra peteĩ pan ha oñemboʼe rire, ombojaʼo ha omeʼẽ chupekuéra heʼívo: “Kóina. Kóva orrepresenta che rete”. 23  Avei ojagarra peteĩ kópa ha oagradese rire Ñandejárape, omeʼẽ chupekuéra, ha enterove hoʼu chugui. 24  Upévo heʼi chupekuéra: “Kóva orrepresenta hína ‘che ruguy pe kompromíso* pyahúpe g̃uarã’, oñeñohẽtava heta rehehápe. 25  Añetehápe haʼe peẽme: Che ni mbaʼevéicharõ ndaʼumoʼãvéima víno, haʼu jeyha ára peve víno pyahu Ñandejára Rréinope”. 26  Ha ipahápe, opurahéi rire hikuái ombotuicha hag̃ua Ñandejárape, osẽ oho sérro Olivotýpe. 27  Ha Jesús heʼi chupekuéra: “Enterove peẽ chereja reíta, péicha voi ojehai vaʼekue Ñandejára Ñeʼẽme: ‘Ajukáta pe ovecharerekuápe ha umi ovecha isarambipáta’. 28  Péro añemopuʼã rire omano vaʼekue apytégui, aháta pene renonderã Galiléape”. 29  Upévo Pedro osẽ heʼi Jesúspe: “Enterove umi ótro ndereja reíramo jepe, che ndorohejaichéne”. 30  Upépe Jesús osẽ heʼi chupe: “Añetehápe haʼe ndéve: Ko pyharépe peteĩ gállo osapukái mboyve dos vése, nde chenegáta tres vése”. 31  Pedro katu heʼi jey jey chupe: “Tekotevẽramo jepe amano nendive, ni mbaʼevéicharõ noronegaichéne”. Ha entéro umi ótro heʼijoa avei upéicha. 32  Upéi og̃uahẽ hikuái peteĩ lugár héravape Getsemaní, ha Jesús heʼi idisipulokuérape: “Peguapy koʼápe che añemboʼe aja”. 33  Ha ogueraha hendive Pedro, Santiago ha Juánpe. Ha Jesúspe ojopyeterei pe oikótava, upévare haʼe ojepyʼapyeterei. 34  Upéi heʼi chupekuéra: “Che álma* ruguaite guive ajepyʼapy, ha upéva chejukátama. Pepyta koʼápe ha peñatende porã”. 35  Ohomiévo upégui, oñesũ, ha oñemboʼe Ñandejárape, ha ojerure ikatúramo ohasamínte hag̃ua chugui upe jehasa asy oúva. 36  Ha heʼi: “Abba*, che Ru, ndéve g̃uarã ndaipóri ikatuʼỹva, eipeʼamína chehegui ko kópa*. Péro ani oikótei pe che aipotáva, toiko guei nde reipotáva”. 37  Upéi haʼe ou, ha otopa idisipulokuéra okejoa hína. Upémarõ heʼi Pédrope: “Simón, ¿reke piko? ¿Ndaikatúi piko reñatende porã una orami jepe? 38  Peñatende porãke peikóvo ha peñemboʼe meme ani hag̃ua peʼa mbaʼe vaípe. Añetehápe, yvypóra ningo ojapose iporãva, péro hete* ikangy”. 39  Upéi Jesús oho jey oñemboʼe, ha pe oñemboʼe hagueichaite heʼi jey. 40  Ha ou jey otopa idisipulokuéra okejoa hína, hopehyietereímagui hikuái. Haʼekuéra katu ndoikuaái mbaʼépa heʼíta chupe. 41  Upéi ou jey tres veseha hendapekuéra ha heʼi: “¡Péicha jave piko pepytuʼu ha peke! ¡Ovalémante! ¡Péina!, og̃uahẽma pe óra pe Yvypóra Raʼy oñemeʼẽ hag̃ua umi pekadór pópe. 42  Pepuʼã jaha, ¡péina!, og̃uahẽma hína pe chetraisionáva”. 43  Ha upe javete, heʼipa mboyve upéva og̃uahẽ oúvo Judas, haʼe oĩ kuri umi doce apóstol apytépe. Ha ou hendive heta hénte espáda ha garróte ipópe. Ombou chupekuéra umi saserdóte ruvicha, mboʼehára leipegua, ha karai guasukuéra. 44  Upe otraisionáva chupe heʼi kuri umi kuimbaʼépe mbaʼéichapa opilláta mávapa Jesús: “Pe ahetũva, upévape pejagarra vaʼerã préso ha peñatende ani okañy pendehegui”. 45  Upévo Judas derechoite oñemboja Jesús rendápe ha heʼi: “¡Mboʼehára*!”, ha ohetũ vevyimi chupe. 46  Upévo umi hénte ojagarra Jesúspe ha ogueraha chupe préso. 47  Péro peteĩ omoirũva Jesúspe, ohekýi ijespáda ha onambiʼo pe saserdóte guasu* rembiguáipe. 48  Upévo Jesús ombohovái chupekuéra: “¿Peju piko chejagarra espáda ha garróte reheve, pejagarratarõguáicha peteĩ mondahápe? 49  Káda día ningo aporomboʼe pe témplope ha peẽ ndachejagarrái. Péro koʼã mbaʼe oiko oñekumpli hag̃ua Ñandejára Ñeʼẽme heʼíva”. 50  Upévo enterove idisipulokuéra odiparapa ha oheja rei chupe. 51  Péro osegi chupe ohóvo peteĩ mitãkariaʼy oguerekóva ijapére peteĩ ao de líno, ha ojagarrasemoʼã avei chupe hikuái, 52  péro haʼe ohejánte upe ijao de líno, ha odipara chuguikuéra opívo*. 53  Upéi ogueraha hikuái Jesúspe pe saserdóte guasu rendápe. Ha oñembyaty upépe umi saserdóte ruvicha, umi mboʼehára leipegua ha umi karai guasukuéra. 54  Pedro katu oho hapykuerikuéra mombyrymi guive pe saserdóte guasu korapy peve. Ha oguapy upépe ojepeʼe pe tata ypýpe umi tembiguaikuérandi. 55  Upe aja umi saserdóte ruvichakuéra ha pe Sanedrín* kompletoite oheka mávapa ikatu oñeʼẽ vai Jesús rehe ikatu hag̃uáicha ojejuka chupe, péro ndotopái hikuái ni peteĩ. 56  Añetehápe oĩ heta oñeʼẽ vaíva hese, péro ndaikatúi oñemoĩ hikuái peteĩ ñeʼẽme. 57  Opuʼã avei ótro testígo japu, ha heʼi hese: 58  “Ore rohendu heʼírõ guare: ‘Che aitýta ko témplo yvyporakuéra ojapo vaʼekue ha tres díape amopuʼã jeýta ótro, ndahaʼéiva yvypóra rembiapokue’”. 59  Péro ni upeichavérõ ndaikatúi oñemoĩ hikuái peteĩ ñeʼẽme koʼã mbaʼe heʼívape. 60  Amo ipahápe, oñemboʼy pe saserdóte guasu ha heʼi Jesúspe: “¿Nerehendúi piko mbaʼépa heʼi nderehe hikuái? ¿Mbaʼépa eréta?”. 61  Jesús katu okirirĩnte ha ndeʼíri mbaʼevete. Upévare pe saserdóte guasu oporandu jey chupe: “¿Nde piko hína pe Cristo*, Ñandejára Ijojahaʼỹva Raʼy?”. 62  Jesús heʼi chupe: “Che hína upéva; ha peẽ pehecháta pe Yvypóra Raʼýpe oguapyha Ñandejára Ipuʼakapáva deréchape*, ha ouha hína arai ári”. 63  Upévo pe saserdóte guasu omondoro ijao ha heʼi: “Koʼág̃a nañaikotevẽvéima testígore. 64  Peẽ voi pehendúma mbaʼeichaitépa otaky* Ñandejárare. ¿Mbaʼépa pedesidíta?”. Ha enterovete heʼi omano vaʼerãha. 65  Ha oĩ oñepyrũva ondyvu hese, upéi ohesa jokua ha ombyepoti, ha heʼi chupe: “¡Oimérõ nde añete peteĩ proféta*, emombeʼúna oréve mávapa nenupã!”. Ha umi guárdia trivunalpegua ohovapete rire Jesúspe, ojagarra chupe. 66  Upe aja Pedro oĩ hína pe korapýpe, ha oñemboja avei upépe peteĩva umi sirviénta pe saserdóte guasu rogapegua. 67  Ha ohechávo Pédrope ojepeʼeha hína upépe, omaña porã hese ha heʼi: “Nde ningo reime kuri avei Jesús Nazaretgua ndive”. 68  Haʼe katu onega heʼívo: “Che ni ndaikuaái chupe, ha nantendéi mbaʼépa la ereséva chéve”, ha osẽ oho pe okẽ ypýpe. 69  Upépe pe sirviénta ohecha jey chupe, ha heʼi umi oñemboʼývape upérupi: “Kóva haʼe voínte heseguakuéra”. 70  Ha haʼe onega jey chupe. Upe riremínte umi oñemboʼýva hína upérupi oñepyrũ heʼi Pédrope: “Añetehápe nde heseguakuérante voi, nde ningo galiléo avei”. 71  Upémarõ Pedro oñepyrũ ohura ha heʼi: “Che ndaikuaái ko kuimbaʼépe, ha oimérõ chejapu toiko cherehe mbaʼe vai”. 72  Upe javete peteĩ gállo osapukái dos veseha, upévo Pedro imanduʼa Jesús heʼi vaʼekuére: “Peteĩ gállo osapukái mboyve dos vése, nde chenegáta tres vése”. Ha ñembyasýpe hasẽ soro.

Nóta

Ehecha “Páskua”, diksionário oĩva ko Bíbliape.
Ehecha “Pan Ilevaduraʼỹva Arete”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ojagarrase hikuái Jesúspe umi hénte opensa hag̃uáicha upéva oĩ porãha.
Griégope heʼi: “votélla de alabastro”. Peteĩ mbaʼyru michĩva ojejapóva peteĩ itágui oĩva Alabastrón, Egíptope.
Ehecha “Denário”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Térã: “otraisiona”.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Yvypóra Raʼy”, diksionário oĩva ko Bíbliape.
Térã: “pákto ỹrõ kontráto”.
Ehecha “Álma”, Informasión Oĩvéva 7A-pe.
Péicha umi taʼýra heʼi vaʼekue itúvape ohechauka hag̃ua orrespeta ha ohayhuha chupe.
Kópa heʼise Ñandejára ohejataha ojejuka Jesúspe ojeʼégui hese otakyha Ñandejárare.
Koʼápe oñeñeʼẽ yvypóra imperfékto ha pekadór rehe.
Térã: “Rabí”.
Ehecha “Saserdóte Guasu”, diksionário oĩva ko Bíbliape.
Térã: “opívo lénto”.
Ehecha “Sanedrín”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “pe podér deréchape”.
Ehecha “Blasfemia”, diksionário oĩva ko Bíbliape.
Ehecha “Profesía”, diksionário oĩva ko Bíbliape.