Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 13:1-37

13  Upéi Jesús osẽvo pe témplogui, peteĩ idisípulo* heʼi chupe: “Mboʼehára, ¡emañamína koʼã ita ha koʼã óga rehe!”.  Jesús katu heʼi chupe: “¿Rehechápa koʼã óga tuichaicháva? Umi ita oĩva koʼápe katuete ojeitypáta, ndopytamoʼãi ni peteĩva ojoʼári”.  Upéi haʼe oguapy sérro Olivotýpe, ha upégui ojehecha pe témplo. Upévo oñemboja hendápe Pedro, Santiago, Juan ha Andrés, ha oporandu chupe haʼeñoháme:  “Eremína oréve: ¿Arakaʼépa oikóta koʼã mbaʼe? ¿Ha mbaʼépa oikóta ropilla hag̃ua og̃uahẽtamaha huʼãme koʼã mbaʼe?”.  Upévo Jesús oñepyrũ heʼi chupekuéra: “Peñatendéke ani avave penembotavy.  Cháke oĩta heta oiporútava che réra heʼívo: ‘Che hína pe Cristo*’, ha hetápe ombotavýta.  Avei pehendúvo oikoha gérra heta hendárupi ani peñemondýi; koʼã mbaʼe oiko vaʼerã, upéicharõ jepe ndahaʼemoʼãi gueteri pe ára pahaite.  ”Cháke peteĩ tetã opuʼãta ótro tetãre, ha umi goviérno opuʼãta ojuehe; oĩta yvyryrýi ápe ha pépe, avei oĩta ñembyahýi. Koʼã mbaʼe oikóvo oñepyrũta ramo hína umi jehasa asy*.  ”Peẽ katu peñatende vaʼerã, cháke oĩta pendegueraháva trivunálpe, ha peñembyepotíta sinagogahárupi*. Avei peñemboʼy vaʼerã umi governadór ha rréi renondépe che káusare, ha péicha ikatúta pemombeʼu chupekuéra umi mbaʼe pegueroviáva. 10  Avei pe marandu porã* ojekuaauka raẽ vaʼerã opa tetãrupi. 11  Péro haʼekuéra pendejagarra vove pendegueraha hag̃ua, ani pejepyʼapy peje vaʼerãre. Upe órape ojekuaaukáta peẽme mbaʼépa pejéta, ha upéva la peje vaʼerã. Ndahaʼéi voi peẽ la peñeʼẽtava, síno pe espíritu sánto* penepytyvõta peñeʼẽ hag̃ua. 12  Upérõ avei oĩta omeʼẽva iñermánope ojejuka hag̃ua, túva omeʼẽta itaʼýrape, ha taʼyrakuéra opuʼãta ituvakuérare ha omeʼẽta chupekuéra ojejuka hag̃ua. 13  Ha avave ndaijaʼemoʼãi penderehe che réra káusare. Péro pe oaguantáva ipahaite peve, ojesalváta. 14  ”Ha ág̃a pehecha vove pe mbaʼe ñanembojeguarúva ha oguerúva ñehundi, oĩha pe lugár ndovaleihápe oĩ (pe oleéva toñatende porã ontende hag̃ua ko mbaʼe), upérõ umi oĩva Judéape todipara toho umi sérrore. 15  Pe oĩva terrásape, aníke oguejy ni oike hógape onohẽ mbaʼeve. 16  Ha pe oĩva ñúme ani ojevy oheka hag̃ua ijao joʼaha. 17  ¡Aichejáranga umi kuña hyeguasúva ha umi imemby kambúva umi árape! 18  Peñemboʼe memékena, ani hag̃ua oiko upéva roʼy tiémpope. 19  Cháke umi árape ojehasa asýta, arakaʼeve oikoʼỹ haguéicha Ñandejára ojapo ñepyrũ guive ko múndo*; ha upe rire ndoikomoʼãvéima avei. 20  Añetehápe, Jehová* nomombykýirire umi ára, ni peteĩ yvypóra ndojesalvamoʼãi. Péro umi ojeporavo vaʼekue rehehápe haʼe omombyky umi ára. 21  ”Ha oĩramo upérõ heʼíva peẽme: ‘¡Pemañami, koʼápe oĩ pe Cristo!’, térã ‘¡Namoite oĩ!’, ani peguerovia. 22  Cháke oĩta heta Cristo guaʼu ha proféta* japu ojapótava milágro ha techapyrã ombotavy hag̃ua ikatúramo umi Ñandejára oiporavo vaʼekuépe jepe. 23  Amombeʼúma peẽme opa koʼã mbaʼe oiko mboyve, upévare peñatende porãkena. 24  ”Umi árape, pe jehasa asy rire pe kuarahy iñypytũta, jasy ndohesapemoʼãi, 25  umi estrélla hoʼáta yvágagui, ha opa mbaʼe oĩva yvágape oñembokachapaitéta. 26  Upévo haʼekuéra ohecháta Yvypóra Raʼýpe* ouha umi arai ári, tekomimbipa ha podér reheve. 27  Haʼe omondóta hiʼanhelkuéra ombyaty hag̃ua umi ojeporavo vaʼekuépe opa hendáguio; nórte, sur, kuarahyreike ha kuarahyresẽguio, pe yvy púnta guive yvága púnta peve. 28  ”Amoĩta peẽme peteĩ ehémplo: Pejepyʼamongeta pe ígo máta rehe: umi hakã pyahu ikyrỹi ha hoky jave, peẽ peikuaa hiʼag̃uimaha arahaku. 29  Upéicha avei, pehecha vove oikoha koʼã mbaʼe, peikuaáke pe Yvypóra Raʼy og̃uahẽmbaitemaha, oĩmaha pe okẽme. 30  Añetehápe haʼe peẽme, umi hénte oikóva ko tiémpope* ni mbaʼevéicharõ ndohasamoʼãi oiko mboyve opa koʼã mbaʼe. 31  Yvága ha yvy ohasáta, péro che ñeʼẽ ndohasamoʼãi. 32  ”Upe día ha upe óra katu avave ndoikuaái, ni umi ánhel yvagapegua, ni pe Taʼýra. Pe Túva añoite oikuaa. 33  Pejesareko meméke ha peñatende porãke, cháke ndapeikuaái pe ára Ñandejára oiporavo vaʼekue. 34  Haʼete ningo peteĩ karai ohóva ótro tetãme. Haʼe oheja hóga hembiguaikuéra poguýpe, ha omeʼẽ peteĩteĩme hembiaporã. Pe okẽre oñangarekóvape katu heʼi oñatende porã hag̃ua. 35  Upévare, peñatende porãke peikóvo, cháke ndapeikuaái hína arakaʼépa oúta pe Ogajára. Ndapeikuaái oútapa kaʼarupytũ, pyharepyte, de madrugáda, térãpa koʼẽmbotávo. 36  Ani ág̃a peimoʼãʼỹve jave og̃uahẽ, ha pendetopa pekejoa hína. 37  Ko haʼéva peẽme, enterovépe haʼe: Peñatende porãke peikóvo”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Cristo”, diksionário oĩva ko Bíbliape.
Haʼete pe oñandúva peteĩ kuña hasýmava imemby hag̃uáicha.
Ehecha “Sinagóga”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha Informasión Oĩvéva 1.
Ehecha “Profesía”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Ehecha “Umi Hénte Oikóva ko Tiémpope”, diksionário oĩva ko Bíbliape.