Ehecha oĩva pype

Ehecha oĩva pype

Marcos 12:1-44

12  Ha Jesús oñepyrũ omoĩ chupekuéra ehémplo: “Peteĩ kuimbaʼe oñotỹ vaʼekue parrál, omongora, ojoʼo upépe peteĩ yvykua oñami hag̃ua iparrál rykue, ha omopuʼã peteĩ tórre. Upéi oalkila pe iparralty umi chokokuépe, ha osẽ oho ótro tetãme.  Og̃uahẽvo pe kosécha tiémpo, haʼe omondo peteĩ hembiguáipe umi chokokue rendápe, ogueru hag̃ua pe parrál otokáva chupe.  Péro haʼekuéra ombyepoti vaipaite pe tembiguáipe, ha omondo chupe po nandi.  Upéi omondo ótro hembiguáipe. Pévape katu oñakã joka hikuái ha oñembohory hese.  Upémarõ haʼe omondo jey ótrope, ha upévape ojuka hikuái. Upéi omondo hetave hembiguáipe, ha ijapyteguikuéra hetápe ombyepoti vaipaite hikuái ha umi ótrope katu ojuka voi.  Pe kuimbaʼe oreko gueteri itaʼýra ohayhuetereíva, ha amo ipahápe omondo hendapekuéra heʼígui: ‘Ko che raʼýpe orrespetáta hikuái’.  Péro umi chokokue heʼi ojupe: ‘Pévape opytáta hína ko kokue; ¡jajukámandi voi chupe ha topytapa ñandéve!’.  Upémarõ ojagarra ha ojuka chupe hikuái, ha upéi tyryryhápe oguenohẽ pe parraltýgui.  ¿Mbaʼépa ojapóta pe parralty jára? Oúta ojukapaite umi chokokuépe ha omeʼẽta iparralty ótrope. 10  ¿Peẽ piko ndapeleéiva arakaʼeve Ñandejára Ñeʼẽme heʼiha: ‘Pe ita omboyke vaʼekue umi óga apoha, upéva haʼe hína pe ita iñimportantevéva oĩva pe eskínape. 11  Jehová* ojapo upéva ha ñandéve g̃uarã tuichaiterei mbaʼe’?”. 12  Upévo haʼekuéra ohechakuaa Jesús oñeʼẽha hesekuéra omombeʼúvo pe ehémplo. Ha upévare oñehaʼã ojagarra chupe hikuái, péro okyhyjégui umi héntegui, ohejánte chupe ha oho. 13  Upéi haʼekuéra omondo Jesús rendápe umi fariséo* ha Herodes segidorkuérape, oity hag̃ua Jesúspe ñuhãme iñeʼẽ rupive. 14  Koʼãva og̃uahẽvo hendápe heʼi: “Mboʼehára, ore ningo roikuaa nde nandejapuiha, ndereikói reñemoĩ porãse avavéndi nderehusgái rupi yvyporakuérape ipíntare, upéva rangue remboʼe hekopete Ñandejára rape: Eremína oréve, ¿ovale piko japaga pe impuésto Césarpe*, térãpa nahániri?”. 15  Jesús opilla hovamokõiha hikuái, upévare heʼi: “¿Mbaʼére piko chemoñuhãse? Pegueru chéve ahecha hag̃ua peteĩ denário*”. 16  Ogueru chupe hikuái peteĩ, ha haʼe heʼi: “¿Máva raʼanga ha máva rérapa ko oĩva hese?”. Haʼekuéra heʼi: “César”. 17  Upémarõ Jesús heʼi: “Pemeʼẽ Césarpe imbaʼéva, péro pemeʼẽ Ñandejárape imbaʼéva”. Haʼekuéra oponderajoa ha ijurujaipa opytávo. 18  Upérõ ou avei hendápe umi saduséo*, haʼekuéra heʼi ndaiporiha ñemoingove jey, ha oporandu chupe hikuái: 19  “Mboʼehára, Moisés ningo ohai vaʼekue kóicha: ‘Oĩramo peteĩ kuimbaʼe omanóva hembireko imembyʼỹre chugui, upéicharõ iñermáno omenda vaʼerã pe viúdare, omeʼẽ hag̃ua iñermánope ñemoñare’. 20  Oĩ vaʼekue siete ermáno, upéi pe ijypykue omenda, péro haʼe omano hembireko imembyʼỹre chugui, 21  ha iñermáno mokõiha omenda upe viúdare, péro omano avei hembireko imembyʼỹre, ha pe mbohapyha upéichante avei. 22  Ha umi siete ermáno omano ifamiliaʼỹre. Amo ipahápe omano avei pe kuña. 23  Upéicharõ, oiko vove pe ñemoingove jey, ¿máva rembirekótapa upe kuña? Umi siete ningo omenda vaʼekue hese”. 24  Jesús heʼi chupekuéra: “Peẽ tuicha pejavy, ndapeikuaáigui Ñandejára Ñeʼẽme heʼíva, ni Ñandejára podér. 25  Ág̃a haʼekuéra opuʼã vove omanóva apytégui, umi kuimbaʼe ha kuñanguéra nomendamoʼãvéima, oikóta hikuái umi ánhel yvagapegua oikoháicha. 26  Ñandejára heʼíma vaʼekue voi peẽme umi omanóva oikove jeytaha. ¿Ndapeleéi piko mbaʼépa Moisés ohai vaʼekue oñeʼẽrõ guare pe sársa máta rehe? Upérõ Ñandejára heʼi chupe: ‘Che hína Abrahán, Isaac, ha Jacob Jára’. 27  Haʼe ningo Ñandejára umi oikovévape g̃uarã ndahaʼéi umi omano vaʼekuépe g̃uarã. Peẽ tuichaiterei pejavy”. 28  Upérõ og̃uahẽ peteĩ mboʼehára leipegua* ha ohendu ojodiskutiha hikuái. Haʼe ohechakuaa Jesús ombohovái porãiterei hague, upémaramo oporandu chupe: “¿Mávapa pe mandamiénto iñimportantevéva?”. 29  Jesús ombohovái: “Pe primero hína kóva: ‘Ehendúke Israel, Jehová haʼe Ñandejára ha Jehová peteĩnte hína. 30  Rehayhu vaʼerã Jehová nde Járape nde pyʼaite guive, ne álma* rugua guive ha opa ne arandu ha ne mbaretekue reheve’. 31  Ha pe segundo katu: ‘Rehayhu vaʼerã nde rapichápe nde rejehayhuháicha’. Ndaipóri ótro mandamiénto tuichavéva koʼãvagui”. 32  Pe mboʼehára leipegua heʼi chupe: “Mboʼehára, añete pe eréva, rembohovái hekopete: ‘Ñandejára ningo Peteĩnte ha ndaipóri Haʼeichagua’. 33  Ha añete jahayhu vaʼerãha Ñandejárape ñande pyʼaite guive, ha opa ñane arandu* ha ñane mbaretekue reheve. Ha jahayhu vaʼerã ñande rapichápe ñande jajehayhuháicha. Koʼãva ovaleve opaichagua sakrifísiogui*”. 34  Jesús ohechakuaávo upe heʼíva oĩ porãha, ombohovái chupe: “Namombyryiete reime Ñandejára Rréinogui”. Péro avave noñanimavéima oporandu chupe mbaʼeve. 35  Jesús katu oporomboʼe aja pe témplope heʼi: “¿Mbaʼéicha rupi umi mboʼehára leipegua heʼi pe Cristo* haʼeha David raʼy? 36  David heʼi vaʼekue espíritu sánto* rupive: ‘Jehová heʼi che Ruvichápe: “Eguapy che deréchape amoĩmba peve nde py guýpe ne enemigokuérape”’. 37  David voi heʼírõ chupe ‘Che Ruvicha’, ¿mbaʼéicha piko upéicharõ pe Cristo haʼéta itaʼýra?”. Ha umi hénte vyʼápe ohendu chupe. 38  Ha omboʼe aja, Jesús heʼi chupekuéra: “Peñeñangarekóke umi mboʼehára leipeguágui. Haʼekuéra oikose okorre opárupi ijao puku reheve, oipota ojesaluda chupekuéra umi plasahárupi*, 39  oguapyse tenondete umi sinagógape* ha oipota umi lugár iñimportantevéva umi karu guasuhárupi. 40  Haʼekuéra oipeʼapa umi viúdagui orekóva guive. Ha oiko oñemboʼe puku guaʼu ojechauka hag̃ua. Koʼãvape ojekastiga vaivéta hína”. 41  Upéi Jesús oho oguapy umi káha de kontrivusión ypýrupi, ha ohecha mbaʼéichapa umi hénte omoĩjoa upépe ipláta. Ha ohecha umi ipláta hetáva omoĩha heta monéda upépe. 42  Upévo ou peteĩ viúda mboriahumi ha omoĩ mokõi monedaʼi saʼieterei ovaléva. 43  Upémarõ Jesús ohenói idisipulokuérape* ha heʼi: “Añetehápe haʼe peẽme, ko viúda mboriahumi, omeʼẽ hetave enterovete umi ótro omeʼẽ vaʼekuégui. 44  Haʼekuéra omeʼẽ chupekuéra hembývante, pe viúda katu oikotevẽramo jepe, omeʼẽmbaite orekomíva”.

Nóta

Ehecha Informasión Oĩvéva 1.
Ehecha “Fariséo”, diksionário oĩva ko Bíbliape.
Péicha oñehenói vaʼekue umi mburuvicha guasúpe Rómape.
Ehecha “Denário”, diksionário oĩva ko Bíbliape.
Ehecha “Saduséo”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Álma”, Informasión Oĩvéva 7A-pe.
Péva hína pe arandu ñantende hag̃ua.
Térã: “sakrifísio ojehapýva ha mymba oñekuaveʼẽvagui”. Ehecha “Sakrifísio Ojehapýva”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “merkádorupi”.
Ehecha “Sinagóga”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.