Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 11:1-33

11  Haʼekuéra og̃uahẽmbotávo Jerusalénpe, Betfagué ha Betániape, oĩháme sérro Olivoty, Jesús omondo mokõi idisípulope*  ha heʼi: “Tapeho amoite puévlope oĩva pene renondépe. Peikévo petopáta peteĩ vurroraʼy oñeñapytĩva, neʼĩrava gueteri avave ojupi hiʼári; pejora ha pegueru chéve.  Ha oĩrõ heʼíva peẽme: ‘¿Mbaʼéiko pejapo hína?’ peje chupe: ‘Ore Ruvicha oikotevẽ, ha pyaʼe ogueruka jeýta ndéve koʼápe’”.  Upémaramo oho hikuái ha otopa pe vurroraʼy oñeñapytĩ peteĩ okẽ rovái, kálle kóstape, ha ojora hikuái.  Péro umi oñemboʼýva upépe heʼi chupekuéra: “¿Mbaʼére piko pejora hína pe vurroraʼy?”.  Haʼekuéra ombohovái Jesús heʼi hagueichaite, upémarõ umi hénte oheja chupekuéra oho.  Ha ogueraha hikuái pe vurroraʼy Jesús rendápe. Ha omoĩ rire hiʼári umi ijao joʼaha, Jesús ojupi hiʼári.  Oĩ avei heta hénte oipysóva ijao joʼaha pe tapére, ha oĩ avei oikytĩva yvyra rakã umi kokuégui.  Ha umi hénte ohóva henonderã, ha avei umi oúva hapykuéri, osapukái: “¡Ñandejára, esalvamína chupe! ¡Tojehovasa* pe oúva Jehová* rérape! 10  ¡Ñandejára tohovasa ñande ru David Rréino oútava! ¡Ñandejára reiméva yvágape, esalvamína chupe!”. 11  Og̃uahẽ rire Jerusalénpe, Jesús oike pe témplope ha omañambaite upe oĩvare ijerére. Péro kaʼaruetémaramo oho Betániape umi doce disípulondi. 12  Koʼẽ rire, osẽ jeývo hikuái Betániagui, Jesús ivareʼa. 13  Ha mombyry guive ohecha peteĩ ígo máta hoguéva. Oho ohecha ndahiʼáipa, péro ndotopái mbaʼevete hese, hoguémante, ndahaʼéigui itiémpo. 14  Upémarõ heʼi chupe: “Arakaʼeve ndaiporimoʼãvéima hoʼúva ndehegui ni peteĩ yva”. Ha idisipulokuéra ohendu upéva. 15  Upéi og̃uahẽ hikuái Jerusalénpe. Upépe Jesús oike pe témplope, ha oñepyrũ omosẽmba upégui umi ombaʼevende ha oñemúvape. Avei oipetepa yvýre umi mesa kambistakuéra oiporúva, ha umi palóma vendehágui katu ivankokuéra. 16  Jesús ndohejái avavépe ogueraha mbaʼevete témplo ryepýrupi. 17  Haʼe omboʼe umi héntepe ha heʼi: “¿Ndojehaíri piko Ñandejára Ñeʼẽme: ‘Che róga ningo peteĩ lugár opavave oñemboʼe hag̃ua’? Péro peẽ pejapo chugui mondaha raity”. 18  Umi saserdóte ruvicha* ha umi mboʼehára leipegua* katu oñepyrũ ohecha mbaʼéichapa ikatu ojuka chupe. Haʼekuéra okyhyje Jesúsgui, umi hénte ohecharamo rupi haʼe omboʼéva. 19  Ha kaʼaruetémaramo haʼekuéra osẽ pe siudágui. 20  Upéi pyharevete ohasakuévo, ohecha hikuái pe ígo máta ipirupaitemaha hapo guive. 21  Ha Pedro imanduʼávo upe oiko vaʼekuére heʼi chupe: “¡Mboʼehára*, emañami!, pe ígo máta remaldesi vaʼekue ipirúma”. 22  Ha Jesús ombohovái chupekuéra: “Pejeroviákena Ñandejárare. 23  Añetehápe haʼe peẽme, oimeraẽ ipyʼamokõiʼỹre heʼíva ko sérrope: ‘Epuʼã ha tereho ejeity pe márpe’, ojeroviáramo oikotaha upe heʼíva, katuete oikóta. 24  Upévare haʼe peẽme: Opa mbaʼe pejeruréva peñemboʼe jave, pejerovia vaʼerã oñemeʼẽtaha peẽme ha upeichaite oikóta. 25  Ha peñemboʼe jave, peperdona vaʼerã pende rapichápe oimeraẽ mbaʼe vai ojapóva penderehe; upéicha pende Ru oĩva yvágape peneperdonáta avei pene rembiapo vaikue”. 26*  —— 27  Upéi haʼekuéra oho jey Jerusalénpe. Ha Jesús okorre aja pe témplore, oñemboja hendápe umi saserdóte ruvicha, mboʼehára leipegua ha karai guasukuéra, 28  ha heʼi chupe: “¿Nde piko ereko permíso rejapo hag̃ua koʼã mbaʼe? ¿Máva piko heʼi ndéve ikatuha rejapo?”. 29  Jesús heʼi chupekuéra: “Che aporandumíta avei peẽme peteĩ mbaʼe. Ha pembohováiramo chéve, upéicharõ amombeʼúta avei peẽme mávapa omeʼẽ chéve permíso ajapo hag̃ua koʼã mbaʼe. 30  Pejemi chéve, pe vautísmo* Juan ojapo vaʼekue, ¿oúpa Ñandejáragui* térãpa yvyporakuéragui?”. 31  Haʼekuéra katu okalkula ha heʼi ojupe: “Jaʼéramo ‘Ñandejáragui’, heʼíta ñandéve: ‘¿Mbaʼére piko upéicharõ ndapegueroviái raʼe chupe?’. 32  ¿Péro jaʼéta piko: ‘Ou yvyporakuéragui’?”. Okyhyje hikuái umi héntegui, haʼekuéra oguerovia rupi Juan haʼe hague añetehápe peteĩ proféta*. 33  Upévare ombohovái hikuái Jesúspe: “Ndoroikuaái”. Ha Jesús heʼi chupekuéra: “Upéicharõ che namombeʼumoʼãi avei peẽme mávapa omeʼẽ chéve permíso ajapo hag̃ua koʼã mbaʼe”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “Toñevendesi”. Ehecha “Vendisión”, diksionário oĩva ko Bíbliape.
Ehecha Informasión Oĩvéva 1.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Térã: “Rabí”.
Oĩ traduksión omoĩva ko versíkulo, péro heta manuskríto griégo yma guare iñimportánteva nomoĩri.
Ehecha “Vautísmo”, diksionário oĩva ko Bíbliape.
Griégope heʼi: “yvágagui”.
Ehecha “Profesía”, diksionário oĩva ko Bíbliape.