Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Marcos 10:1-52

10  Upéi Jesús osẽ upégui, og̃uahẽ Judea rembeʼýpe ha ohasa pe Jordán. Upévo oho jey hendápe hetaiterei hénte, ha jepiveguáicha oñepyrũ jey omboʼe chupekuéra.  Upépe oñemboja hendápe umi fariséo*; ha otantea hag̃ua Jesúspe, oporandu chupe ovalépa peteĩ kuimbaʼe ojedivorsia hembirekógui.  Jesús ombohovái chupekuéra: “¿Mbaʼépa omanda rakaʼe peẽme Moisés?”.  Haʼekuéra heʼi: “Moisés heʼi pe kuimbaʼe ikatuha opoi hembirekógui omeʼẽma guive chupe peteĩ dokuménto heʼíva ojedivorsiaha”.  Jesús katu heʼi chupekuéra: “Pendepyʼahatãguinte Moisés omeʼẽ peẽme ko mandamiénto.  Péro iñepyrũmbýpe, ‘Ñandejára ojapo vaʼekue kuimbaʼe ha kuñáme.  Upévare pe kuimbaʼe ohejáta isy ha itúvape,  ha mokõivégui oiko vaʼerã peteĩntema’. Upéicha rupi haʼekuéra ndahaʼevéima mokõi síno peteĩntema.  Upévare, avave ndoipeʼái vaʼerã ojuehegui Ñandejára omoĩ vaʼekue oñondive peteĩ júgo guýpe”. 10  Oĩ jeývo hikuái pe ógape, idisipulokuéra* oporandu chupe upe heʼi vaʼekuére. 11  Jesús heʼi: “Oimeraẽ ojedivorsiáva hembirekógui ha upéi omenda jey ótrare, omoakãratĩ chupe. 12  Ha peteĩ kuña ojedivorsiáramo iménagui ha upéi omenda jey ótrore, oporomoakãratĩ hína”. 13  Upéi umi hénte ogueru Jesús rendápe umi mitãme, haʼe omoĩ hag̃ua ipo hiʼarikuéra. Péro idisipulokuéra oñemoĩ ojaʼo umi héntepe. 14  Ohechávo upéva, Jesús ipochy ha heʼi chupekuéra: “Pehejána umi mitã mimíme tou che rendápe, ha ani pejokosétei. Ñandejára Rréino ningo oñemeʼẽ koʼãichaguápe. 15  Añetehápe haʼe peẽme: Pe ndorresivíriva Ñandejára Rréino peteĩ mitãicha, ni mbaʼevéicharõ ndoikemoʼãi upépe”. 16  Ha ohupi ijyva ári umi mitãme, omoĩ ipo hiʼarikuéra, ha ojerure Ñandejárape tohovasa* chupekuéra. 17  Upe rire, Jesús osẽvo oho hag̃ua, peteĩ kuimbaʼe odipara ou oñesũ henondépe, ha oporandu chupe: “Mboʼehára Imbaʼeporãva, ¿mbaʼépa ajapo vaʼerã ahupyty hag̃ua jeikove opaveʼỹva?”. 18  Jesús heʼi chupe: “¿Mbaʼére piko ere chembaʼeporãha? Ñandejára añoite ningo pe imbaʼeporãva. 19  Nde reikuaa mbaʼépa heʼi umi mandamiénto: ‘Ani reporojuka; ani reporomoakãratĩ; ani remonda; ani remopuʼã japu nde rapicháre; ani reporombotavy; emombaʼe nde ru ha nde sýpe’”. 20  Pe kuimbaʼe heʼi chupe: “Mboʼehára, koʼãva ningo che akumplipaitéma chemitã guive”. 21  Jesús omaña pe kuimbaʼére ha ohayhúgui chupe heʼi: “Tekotevẽ gueteri rejapo peteĩ mbaʼe: Tereho evende nde kosakuéra ha emeʼẽ umi imboriahúvape, upéicharõ reguerekóta mbaʼerepy yvágape; ha eju chemoirũ”. 22  Ohendúvo upéva pe mitãkariaʼy ombyasy ha oñesenti ohóvo, oguerekógui hetaiterei mbaʼe. 23  Jesús ojere omaña umi héntere ha heʼi idisipulokuérape: “¡Hasyetéta umi ipláta hetávape oike hag̃ua Ñandejára Rréinope!”. 24  Idisipulokuéra katu nontendéi mbaʼérepa Jesús heʼi upéva. Upémaramo haʼe heʼi chupekuéra: “Añetehápe, ¡ijetuʼu hína ojeike hag̃ua Ñandejára Rréinope! 25  Peteĩ kaméllo jepe ikatúne ohasa peteĩ ju ikuahárupi, péro ijetuʼuvéta upévagui peteĩ ipláta hetáva oike hag̃ua Ñandejára Rréinope”. 26  Idisipulokuéra katu koʼýte ohecharamo upéva ha heʼi chupe: “¿Máva piko upéicharõ ikatu ojesalva?”. 27  Jesús omaña porã hesekuéra ha heʼi: “Yvyporakuérape g̃uarã ko mbaʼe ni mbaʼevéicharõ ndaikatumoʼãi oiko, péro Ñandejárape g̃uarã ndaipóri ikatuʼỹva”. 28  Upévo Pedro osẽ heʼi: “Ore ningo rohejapaite opa mbaʼe ha romoirũ”. 29  Jesús heʼi: “Añetehápe haʼe peẽme: Umi cherehehápe, ha pe marandu porã* rehehápe oheja vaʼekue hóga, iñermáno ha iñermanakuéra, isy ha itúva, itaʼyrakuérape térã ijyvy, 30  hekovia jeýta chupekuéra cien vése ko tiémpope: óga, ermáno, ermána, sy, taʼyrakuéra ha yvy, jehasa asy reheve; ha amo gotyove* katu ohupytýta jeikove opaveʼỹva. 31  Péro heta oĩva hína tenonde, opytáta tapykuépe, ha umi itapykuéva hína, opytáta tenonde”. 32  Upéi ojupi hikuái Jerusalén gotyo ha Jesús oñemotenonde idisipulokuérare. Haʼekuéra ohecharamo upéva, péro umi hénte ohóva hapykuéri okyhyjepa. Jesús ohenói jey umi doce idisipulokuérape haʼeñoháme ha oñepyrũ heʼi chupekuéra umi mbaʼe oikótava hese: 33  “¡Péina! Jaha hína Jerusalénpe, ha pe Yvypóra Raʼy* oñemeʼẽta umi saserdóte ruvichakuéra* ha mboʼehára leipegua* pópe. Haʼekuéra heʼíta omano vaʼerãha, ha omeʼẽta chupe umi tetã ambuegua poguýpe, 34  umíva oñembohorýta, ombyepotíta ha ondyvúta hese. Upéi ojukáta chupe, péro tres día haguépe haʼe opuʼã jeýta”. 35  Ha Santiago ha Juan, umi mokõi Zebedeo raʼy, oñemboja Jesús rendápe ha heʼi chupe: “Mboʼehára, roipota ningo rejapo oimeraẽ mbaʼe rojeruréva ndéve”. 36  Haʼe heʼi: “¿Mbaʼépa peipota ajapo?”. 37  Haʼekuéra heʼi: “Ág̃a regoverna vove ne Rréinope, roipota oremboguapy nde ykére, peteĩva nde deréchape ha pe ótro nde iskiérdape”. 38  Jesús katu heʼi chupekuéra: “Ndapeikuaái la pejeruréva. ¿Ikatútapa pemboyʼu chendive pe kópa che amboyʼútava hína? Térã, ¿ikatúta piko pejevautisa* che ajevautisaháicha?”. 39  Haʼekuéra heʼi: “Ikatu”. Upémarõ Jesús heʼi: “Pe kópa che hayʼúvagui peẽ peyʼúta avei, ha che ajevautisaháicha, pejevautisáta avei. 40  Péro che ndaikatúi haʼévo peẽme peguapytaha che deréchape térã che iskiérdape. Upéva Ñandejáramante odesidíta mávapepa omeʼẽta”. 41  Ohendúvo upéva, umi ótro diez idisípulo ipochy Santiago ha Juan rehe. 42  Jesús katu ohenói chupekuéra ha heʼi: “Peẽngo peikuaa mbaʼéichapa umi mburuvicha omanda hetãyguakuérare, ha umi poguasukuéra ojopy umi héntendi. 43  Peẽ katu ndaupéichai vaʼerã; pe tuichaséva pende apytépe, oiko vaʼerã pene rembijokuáirõ. 44  Ha oĩséva tenondete, oiko vaʼerã enterove rembiguáiramo. 45  Pe Yvypóra Raʼy jepe ndoúi oporojokuái hag̃ua, ou guei oiko tembiguáiramo ha omeʼẽ hekove*, opaga* ha oguenohẽ hag̃ua hetápe pekádo poguýgui”. 46  Ha oike hikuái Jericópe. Upéi Jesús, idisipulokuéra ha ótra hénte osẽ Jericógui. Pe tape kóstare oguapy ombaʼejerure peteĩ kuimbaʼe isiégova hérava Bartimeo, Timeo raʼy. 47  Ohendúvo Jesús Nazaretgua ohasaha upérupi, haʼe osapukái: “¡Jesús, David Raʼy, cheporiahuverekomína!”. 48  Upévo heta oĩ ojaʼóva chupe okirirĩ hag̃ua, péro haʼe hatãvéntema osapukái: “¡David Raʼy, cheporiahuverekomína!”. 49  Upémarõ Jesús opyta ha heʼi: “Pehenói chupe”. Ha oho ohenói hikuái pe siégope ha heʼi chupe: “Ani rekyhyje, epuʼã katu, haʼe nerenói hína”. 50  Upévo haʼe opo opuʼã, omombo ijao joʼaha ha oho Jesús rendápe. 51  Jesús heʼi chupe: “¿Mbaʼépa reipota ajapo nderehe?”. Pe kuimbaʼe heʼi: “Mboʼehára*, ahechase jey ningo”. 52  Jesús heʼi chupe: “Tereho katu, rejerovia rupi rekuera”. Upepete ohecha jey ha omoirũ chupe umi héntendi.

Nóta

Ehecha “Fariséo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “tovendesi”. Ehecha “Vendisión”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Térã: “pe múndo oútavape”. Ehecha “Múndo”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Griégope heʼi: “hiʼálma”. Ehecha “Álma”, Informasión Oĩvéva 7A-pe.
Térã: “orreskata”. Ehecha “Rreskáte”, diksionário oĩva ko Bíbliape.
Griégope heʼi: “Rabboni”.