Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 8:1-56

8  Upe riremínte Jesús oho entéro umi siuda ha puevlokuérarupi opredika ha oikuaauka umi marandu porã* oñeʼẽva Ñandejára Rréinore. Ha omoirũ chupe umi doce apóstol*.  Oho avei hendivekuéra umi kuña Jesús omonguera ha oipeʼa vaʼekue demónio* poguýgui. Koʼãva hína María oñehenóiva Magdalena, chugui osẽ vaʼekue siete demónio,  Juana haʼéva hína Cuza rembireko, ko kuimbaʼe oñangareko Herodes rógare, Susana ha hetave kuña oiporúva imbaʼerepy oñatende hag̃ua hesekuéra.  Entéro siudágui ou umi omoirũva jepi Jesúspe, ha hetave hénte oñembyaty hendivekuéra. Upémarõ, haʼe oñeʼẽ chupekuéra peteĩ ehémplo rupive:  “Peteĩ chokokue osẽ oñemitỹ hag̃ua, ha oñotỹnguévo oĩ semílla hoʼáva tapére, upépe oñepyrũmba hese ha umi guyra ovevéva yvágare ou hoʼupa.  Ótra semílla katu hoʼa ita ári, péro heñói rire pyaʼe ipiru ndorekóigui y.  Oĩ avei hoʼáva ñuatĩ apytépe ha heñói, upéi okakuaávo umi ñuatĩndi, koʼãva ojahoʼipa chupekuéra.  Ótra semílla katu hoʼa yvy porãme, heñói ha hiʼa cien peve peteĩ semíllagui”. Heʼi rire koʼã mbaʼe heʼi hatã chupekuéra: “Pe ikatúva ohendu, tojapysaka porã”.  Idisipulokuéra* katu oporandu chupe mbaʼépa heʼise pe ehémplo. 10  Haʼe ombohovái: “Ñandejára penepytyvõ pentende hag̃ua umi sekréto marangatu* Irreinopegua. Péro umi ótrope amboʼe ehémplo rupive, péicha omañavéramo jepe hikuái ndohechamoʼãi mbaʼeve, ha ohendúramo jepe ndopillamoʼãi mbaʼeve. 11  Amombeʼúta peẽme mbaʼépa heʼise pe ehémplo: Pe semílla ningo Ñandejára ñeʼẽ. 12  Umi hoʼáva tapére haʼe hína umi ohendúva Ñandejára ñeʼẽ, péro upéi ou pe Aña* ha oipeʼa ipyʼapyguikuéra ani hag̃ua oguerovia ha ojesalva. 13  Umi hoʼáva ita ári katu haʼe hína umi ohendúva Ñandejára ñeʼẽ ha oguerovia vyʼapópe, péro koʼãva ndahapói. Upévare oguerovia sapyʼami, ha upéi ombohováivo peteĩ mbaʼe ijetuʼúva ohejaite jey. 14  Umi hoʼa vaʼekue ñuatĩ apytépe katu haʼe hína umi ohendúva Ñandejára ñeʼẽ, péro upéi ojepyʼapyeterei hemikotevẽre, ha oiko pláta ha vyʼarã rapykuéri. Koʼã mbaʼe ojahoʼipa chupekuéra ha upévare hiʼáramo jepe, ndahiʼajúi. 15  Umi hoʼáva yvy porãme katu haʼe umi ipyʼaporãva, ohendúva Ñandejára ñeʼẽ, oguerovia ipyʼaite guive ha hiʼa, oaguantáramo jepe heta mbaʼe ijetuʼúva. 16  ”Avave nomyendýi peteĩ lámpara ha upéi omoĩ hiʼári peteĩ kanásto térã omoinge tupa guýpe. Upéva rangue ohupi yvate ohesape hag̃ua umi oikévape. 17  Ndaipóri hína mbaʼeve oñeñomíva ikatuʼỹ vaʼerã upéi ojehecha, térã oñemokañy porãva ikatuʼỹ vaʼerã upe rire ojekuaa térã osẽ hesakãháme. 18  Upévare pejapysaka porã vaʼerã; cháke pe oguerekóvape, hetave oñemeʼẽta, pe oguerekoʼỹvagui katu, pe haʼe oimoʼãva orekoha jepe ojepeʼáta chugui”. 19  Upéi ou Jesús rendápe isy ha iñermanokuéra, péro ndaikatúi oike hendápe hetaitereígui umi hénte. 20  Upévo ojeʼe chupe: “Oime nde sy ha ne ermanokuéra oñemboʼy okápe ha nderechase hikuái”. 21  Haʼe ombohovái chupekuéra: “Che sy ha che ermanokuéra ningo koʼã ohendúva Ñandejára Ñeʼẽ ha ojapóva”. 22  Ótro día Jesús ojupi idisipulokuérandi peteĩ kanóape, ha haʼe heʼi chupekuéra: “Jahasána ko lágo rovái pe ótro ládo”. Upémarõ ohasa hikuái. 23  Péro ohasa aja hikuái, Jesús opyta oke. Upéi pe lágope oiko peteĩ torménta ndevaíva ha oipeju peteĩ yvytu hatãitereíva, oikepa chupekuéra y ha tesaparápe ojecha hikuái. 24  Ipahápe haʼekuéra oho omombáy chupe ha heʼi: “¡Mboʼehára, Mboʼehára, ñamanombátamako!”. Haʼe opuʼãvo ojaʼo pe yvytu ha y pochýpe, ha umíva opyta ha ohasaite pe torménta. 25  Upéi heʼi chupekuéra: “¿Moõiko oĩ la pende jerovia?”. Haʼekuéra katu oñemondyijoa, ijurujái opytávo ha heʼi ojupe: “¿Máva piko añetehápe ko kuimbaʼe? Yvytu ha y jepe iñeʼẽrendu chupe”. 26  Upéi og̃uahẽ hikuái umi Gerasagua retãme oĩva Galilea rovái, pe ótro ládo. 27  Péro haʼe oguejývo yvýpe, ohug̃uaitĩ chupe peteĩ kuimbaʼe upe siudapegua orekóva heta demónio. Ko kuimbaʼe aréma oiko opívo ha ndopytái hógape, síno oiko sementériope. 28  Ohechávo Jesúspe osapukái, oñesũ henondépe ha hatã heʼi: “Nde Jesús, Ñandejára Ijojahaʼỹva Raʼy, ¿maʼerã guaʼu piko reju? Ajeruremínte ndéve ani hag̃ua chekastiga”. 29  (Haʼe ningo omanda kuri pe demóniope osẽ hag̃ua pe kuimbaʼégui. Aretereíma oreko chupe ipoguýpe ha heta vésema ojejagarra pe kuimbaʼépe ha oñemoĩ kadéna ipo ha ipýre, ha oĩ guárdia oñangarekóva hese. Péro haʼe omondohopa umi kadéna ha pe demónio oraha chupe umi lugár ndaiporihápe mbaʼeve.) 30  Jesús oporandu chupe: “¿Mbaʼéicha piko nde réra?”. Haʼe heʼi: “Che cheréra Lehión*”, hetaiterei demónio oĩgui pe kuimbaʼépe. 31  Haʼekuéra ojerure asy chupe ani hag̃ua omondo chupekuéra pe yvykua pypukúpe*. 32  Upérõ pe sérrope oĩ una partída kure okarujoáva hína. Upémarõ umi demónio ojerure asy Jesúspe oheja hag̃ua chupekuéra oike umi kure retepýpe. Ha Jesús oheja oho hikuái. 33  Upémaramo umi demónio osẽ pe kuimbaʼégui ha oho oikepa umi kure retepýpe. Ha umi kure atýra oĩ haguéicha ojepoi yvatégui pe lágope ha ojahogapaite. 34  Ohechávo upe oikóva, umi kurére oñangarekóva odiparapaite ha oho omombeʼu pe siuda ha umi kampañaháre la oiko vaʼekue. 35  Upémaramo umi hénte osẽmba ohecha hag̃ua la oikóva. Ou hikuái Jesús rendápe, otopa pe endemoniadokue oguapy hína hendive, oñemondéma ha ihuísio porãma; ha okyhyjepa hikuái. 36  Umi ohecháva pe oiko vaʼekue omombeʼu chupekuéra mbaʼéichapa pe endemoniádo okuera. 37  Upévo enterove umi hénte oikóva Gerasa jerére okyhyjeterei ha ojerure Jesúspe oho hag̃ua upégui. Upévare haʼe ojupi pe kanóape ha oho. 38  Pe endemoniadokue katu ojerure asy Jesúspe oho hag̃ua hendive. Péro haʼe ndohejái chupe ha heʼi: 39  “Terehóntena nde rógape ha akóinte emombeʼu umi mbaʼe Ñandejára ojapo vaʼekue nderehe”. Ha pe kuimbaʼe oho omombeʼu opárupi pe siudáre umi mbaʼe Jesús ojapo vaʼekue hese. 40  Upéi, Jesús ou jeývo, umi hénte torypápe orresivi chupe, opavavénte ohaʼarõgui chupe. 41  Upérõ ou hendápe peteĩ kuimbaʼe hérava Jairo, haʼe ningo peteĩ mburuvicha sinagogapegua*. Haʼe ou oñesũ Jesús renondépe ha ojerure asy chupe oho hag̃ua hendive hógape. 42  Itajýra peteĩmi orekóva doce áñorupi, omanombotaitéma. Jesús ohokuévo, umi henteita ojopypa chupe. 43  Ha oĩ avei peteĩ kuña doce áñorema oikóva huguyháre, ha ndotopái avave omonguera vaʼerã chupe. 44  Haʼe oñemboja Jesús rehe hapykuéguio ha opoko ijao ruguáire. Upepete pe huguy opytaite. 45  Upémarõ Jesús heʼi: “¿Máva piko opoko cherehe?”. Ha enterovénte umi hénte onegajoa. Upévo Pedro osẽ heʼi: “Mboʼehára, umi hénte ningo ojerepa nderehe ha ndejopypa”. 46  Jesús katu heʼi: “Oĩ voínte la opokóva cherehe, añandu osẽha chehegui podér”. 47  Ohechámarõ ojepilla hague pe kuña oryrýi osũsũ ha ou oñesũ henondépe, ha omombeʼu enterove rovake mbaʼérepa opoko hese ha mbaʼéichapa okuera upepete. 48  Jesús heʼi chupe: “Che rajy, rejerovia rupi ningo rekuera. Tereho katu pyʼaguapýpe”. 49  Haʼe oñeʼẽ aja gueteri og̃uahẽ peteĩ kuimbaʼe oúva Jairo rógagui ha heʼi chupe: “Nde rajy ningo omanóma, anivéntema remolesta pe Mboʼehárape”. 50  Ohendúvo upéva Jesús ombohovái chupe: “Ani rekyhyje, ejeroviánte ha haʼe ojesalváta”. 51  Og̃uahẽvo hikuái pe ógape Jesús oheja oike hendive Pedro, Juan, Santiago ha pe mitãkuña sy ha itúva añoite. 52  Enterove umi hénte katu ojaheʼo ha ombyasyjoa* chupe. Upévare Jesús heʼi chupekuéra: “Anivéna penerasẽ, haʼe nomanói, okénte hína”. 53  Upévo haʼekuéra oñepyrũ opukapa ha oñembohory hese, oikuaágui pe mitãkuña omanomaha. 54  Jesús katu ojagarra chupe ipógui ha heʼi hatã: “Mitãkuña, ¡epuʼã!”. 55  Upepete voi haʼe oikove jey* ha opuʼã. Ha Jesús heʼi oñemongaru hag̃ua pe mitãkuñáme. 56  Itúva ha isy katu ijurujái opytávo; péro Jesús heʼi porã chupekuéra ani hag̃ua omombeʼu avavépe upe oiko vaʼekue.

Nóta

Ehecha “Marandu Porã”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Sekréto Marangatu”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Yma Roma ehérsitope, peteĩ lehiónpe oĩ vaʼekue cuatro mil térã seis mil soldádorupi.
Ehecha “Yvykua Pypuku”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Térã: “ojepytiʼanupã ñembyasýgui”.
Térã: “ijespíritu (pe fuérsa oporomoingovéva) ou jey pype”.