Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 6:1-49

6  Peteĩ sábado* Jesús ohasakuévo peteĩ trigotýrupi, idisipulokuéra* ojagarra pe trígo, ojykýi ha hoʼu.  Upévo umi fariséo* apytépe oĩ heʼíva: “¿Mbaʼére piko pejapo sabadokue ndovaléiva jajapo?”.  Jesús ombohovái chupekuéra: “¿Ha peẽ piko ndapeleéi mbaʼépa ojapo vaʼekue David, haʼe ha iñirũnguéra iñembyahýirõ guare?  Oike Ñandejára rógape ha oñemeʼẽ chupe umi pan oñemoĩ vaʼekue Ñandejára renondépe. Umíva ningo umi saserdóte* añoite ikatu hoʼu, upéicharõ jepe David ha iñirũnguéra hoʼu”.  Ha heʼive avei: “Yvypóra Raʼy* haʼe hína sábado Ruvicha”.  Ótro sábado katu oike pe sinagógape* ha oñepyrũ oporomboʼe. Upépe oĩ peteĩ kuimbaʼe ipo derécha ijypíva.  Upérõ umi mboʼehára leipegua* ha fariseokuéra omaña porã Jesús rehe jahecha omonguerátapa chupe sábadope, ikatu hag̃uáicha oakusa chupe.  Jesús oikuaa mbaʼépa opensa hikuái, upéicharamo jepe heʼi pe kuimbaʼe ipo ypívape: “Epuʼã ha eñemboʼy mbytépe”. Ha pe kuimbaʼe opuʼã oñemboʼy.  Upévo Jesús heʼi: “Pejemi chéve: ¿Mbaʼépa iporãve jajapo sabadokue, iporãva térãpa ivaíva? ¿Iporãvépa jasalva ñande rapichápe* térã ñahundi?”. 10  Ha omaña rire enterovére heʼi pe kuimbaʼépe: “Eipyso nde po”, ha ojapóvo upéva ipo opyta porã jey. 11  Péro haʼekuéra orrenegaiterei ha oñemongeta ohecha hag̃ua mbaʼépa ikatu ojapo Jesús rehe. 12  Umíva umi árape Jesús osẽ oho peteĩ sérrope oñemboʼe hag̃ua, ha upépe opyta oñemboʼe Ñandejárape peteĩ pyhare pukukue. 13  Koʼẽmba rire ohenói idisipulokuérape ha oiporavo ijapyteguikuéra doce, umívape ohenói apóstol*. 14  Koʼãva hína: Simón, chupe ombohéra avei Pedro ha iñermáno Andrés; Santiago, Juan, Felipe, Bartolomé, 15  Mateo, Tomás, Santiago haʼéva Alfeo raʼy, Simón ojeheróva “ikyreʼỹva”, 16  Judas haʼéva Santiago raʼy, ha Judas Iscariote, upéi otraisiona vaʼekue chupe. 17  Upe rire, oguejy hendivekuéra ha opyta peteĩ lugár ojoja porãhápe. Upépe oĩ heta idisipulokuéra ha umi henteita oúva Judea, Jerusalén, Tiro ha Sidóngui (koʼãva oĩ mar rembeʼýpe). Ou hikuái ohendu hag̃ua Jesúspe ha okuera hag̃ua imbaʼasýgui. 18  Ha umi ohasa asýva demónio* poguýpe jepe okuera. 19  Jesúsgui ningo osẽ podér ha omonguera opavavépe, upévare enterove umi hénte oñehaʼã opoko hese. 20  Upéi Jesús omaʼẽ idisipulokuérare ha heʼi: “Pevyʼa peẽ imboriahúva, penembaʼe hína Ñandejára Rréino. 21  ”Pevyʼa peẽ peneñembyahýiva hína koʼág̃a, peẽ upéi peneryg̃uatãta. ”Pevyʼa peẽ penerasẽva koʼág̃a, peẽ upéi pepukáta. 22  ”Pevyʼa umi hénte ndaijaʼéiramo penderehe, penemboykéramo, otakýramo penderehe, ha penemoherakuã vaíramo che káusare*. 23  Pendepyʼarory ha pevyʼaitereíkena péicha jave, peikuaágui yvágape oĩha peteĩ rregálo tuichaitereíva peẽme g̃uarã. Umi pendepersegíva ypykue péicha ojapo vaʼekue avei yma umi profétare*. 24  ”Aichejáranga peẽ pendepláta hetáva, peẽme oñemeʼẽma hína opa mbaʼe porã ikatúva pehupyty. 25  ”Aichejáranga peẽ koʼág̃a peneryg̃uatãva, upéi peẽ peneñembyahýita. ”Aichejáranga peẽ pepukáva, upéi peẽ peñembyasy ha penerasẽta. 26  ”Aichejáranga peẽ enterovéva oñeʼẽ porãramo penderehe. Cháke péicha ojapo vaʼekue avei yma umi ijypykuéra umi proféta japúre. 27  ”Upévare haʼe peẽ cherendúvape: Akóintekena pehayhu pene enemigokuérape ha pejapo iporãva umi penderayhuʼỹvare. 28  Pejerure Ñandejárape taimbaʼeporã umi penemaldesíva ndive ha peñemboʼe umi pendejaʼóvare. 29  Oĩramo nderovapetéva un ládo, emoĩ chupe pe ótro ládo. Ha oĩrõ oipeʼáva ndehegui peteĩ nde ao, ani reñemoĩ hese ha eheja togueraha avei nde ao joʼaha. 30  Entéro ombaʼejerurévape ndéve, emeʼẽ chupe, ha pe oguerahávape ndehegui nde kosakuéra, ani rejerure ogueru jey hag̃ua. 31  ”Upéicha avei, pejapo pende rapicháre peipotáva haʼekuéra ojapo penderehe. 32  ”Pehayhúramo umi penderayhúvapente, ¿mbaʼére guaʼu pejeguerohory vaʼerã? Umi pekadór jepe ojapo upéicha. 33  Ha penembaʼeporãramo umi imbaʼeporãvandi penendive, ¿mbaʼére guaʼu pejeguerohory vaʼerã? Umi pekadór jepe ojapo upéicha. 34  Ha peiporukáramo umi ikatútavape omyengovia jey peẽme, ¿mbaʼére guaʼu pejeguerohory vaʼerã? Umi pekadór oiporukánte avei ótro pekadórpe ha ohaʼarõ oñemyengovia jey chupekuéra. 35  Upéva rangue, akóinteke pehayhu pene enemigokuérape, pejapo iporãva ha peiporuka pehaʼarõʼỹre oñemyengovia jey peẽme. Upéicharõ oñemeʼẽta peẽme peteĩ rregálo tuichaitereíva ha oikóta pendehegui Ñandejára Ijojahaʼỹva raʼy, haʼe imbaʼeporã rupi umi imalagradesído ha iñañávandi. 36  Akóintekena peiporiahuvereko pende rapichápe, pende Ru yvagapegua ojapoháicha. 37  ”Anive pehusga pende rapichápe, ha Ñandejára napendehusgamoʼãi avei. Anive pekondena pende rapichápe ani hag̃ua Ñandejára penekondena. Peperdona meméke pende rapichápe ha Ñandejára peneperdonáta. 38  Pendepojera memékena pende rapichándi ha oñemyengoviáta peẽme, ojehykuavóta pende ao ruguáipe hetaiterei mbaʼe, ha ijave hag̃ua ojejopy ha oñemonguʼéta, ikatu hag̃uáicha henyhẽ chovi. Cháke pe medída peiporúva pende rapicháre ojeporúta penderehe avei”. 39  Upéi omoĩ chupekuéra peteĩ ehémplo: “Peteĩ siégo ndaikatúi oisãmbyhy ótro siégope, mokõivéva ningo hoʼáta yvykuápe, ¿ajépa? 40  Peteĩ alúmno ndaikatúi tuichave imboʼeháragui, péro entéro oñehekomboʼe porãva ojoguáta imboʼehárape. 41  ¿Maʼerãpa upéicharõ repena pe kapiʼi oĩvare ne ermáno resápe, péro nderehechái pe víga oĩva nde resápe? 42  ¿Mbaʼéicha piko eréta ne ermánope: ‘Che ermáno, anohẽmíta ndéve pe kapiʼi oĩva nde resápe’, ha nde voi nderehechái pe víga oĩva nde resápe? ¡Tekove rovamokõi! Enohẽ raẽna pe víga nde reságui ha upépe ae rehecha porãta mbaʼéichapa renohẽta pe kapiʼi oĩva ne ermáno resápe. 43  ”Ndaikatúi peteĩ yvyramáta iporãva hiʼa vai, térã peteĩ yvyramáta hasýva hiʼa porã. 44  Pe yvyramáta hiʼáre ojekuaa mbaʼeichaguápa. Por ehémplo, ndaikatúi ñamonoʼõ ígo ñuatĩgui ni parrál sársa mátagui. 45  Pe kuimbaʼe imbaʼeporãva oguenohẽ iporãva ikorasõgui, pe kuimbaʼe iñañáva katu oguenohẽ ivaíva. Upéicharõ, umi mbaʼe omyenyhẽva ikorasõ osẽ hína ijurúrupi. 46  ”¿Mbaʼére piko peje chéve, ‘¡che Ruvicha!, ¡che Ruvicha!’, péro ndapejapói umi mbaʼe haʼéva peẽme? 47  Ahechaukáta peẽme mávapepa ojogua entéro oúva che rendápe, ohendúva che ñeʼẽ ha ojapóva: 48  Ojogua peteĩ kuimbaʼépe ojoʼo pypuku porãva ojogapo hag̃ua, ha omoĩ pe óga simiénto ita ári. Upévare oúvo peteĩ kresiénte, pe rrío ojejapete pe ógare, péro ni ndokuʼéi oñemopuʼã porã rupi. 49  Upe ohendúva che ñeʼẽ ha ndojapóiva katu ojogua peteĩ kuimbaʼe ojogapóvape yvy reípente simientoʼỹre. Upéi pe rrío ou ojejapete pe ógare, ha pyaʼe hoʼapa ha oñehundiete”.

Nóta

Ehecha “Sábado”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Fariséo”, diksionário oĩva ko Bíbliape.
Ehecha “Saserdóte”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Griégope heʼi: “peteĩ álma”. Ehecha “Álma”, Informasión Oĩvéva 7A-pe.
Ehecha “Apóstol”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Griégope heʼi: “Yvypóra Raʼy káusare”.
Ehecha “Profesía”, diksionário oĩva ko Bíbliape.