Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 5:1-39

5  Peteĩ jey, Jesús oporomboʼe Ñandejára Ñeʼẽ lágo Genesaret rembeʼýpe, ha heta hénte ou ojoʼapa upépe ohendu hag̃ua chupe.  Peichahágui ohecha mokõi kanóa oĩva pe lágo rembeʼýpe, péro umi peskadorkuéra oguejy raʼe ojohéi irréd.  Peteĩ kanóa ningo Simón mbaʼe, Jesús ojupi pype ha heʼi chupe ohomie hag̃ua pe y rembeʼýgui. Upéi oguapy upépe ha pe kanóa guive omboʼe umi héntepe.  Oñeʼẽmba rire heʼi Simónpe: “Errema hypyveha peve ha peity upépe pende rred pepeska hag̃ua”.  Simón ombohovái chupe: “Mboʼehára, pyhare pukukue ningo roñehaʼã ha noronohéi mbaʼevete. Péro nde ere rupínte aitýta umi rred”.  Ojapóvo upéva ojagarra hikuái hetaiterei pira ha umi rred oñepyrũ osoro.  Upémarõ oseñea isosiokuérape oĩva pe ótro kanóape ou hag̃ua oipytyvõ chupekuéra. Haʼekuéra ou ha mokõive kanóa henyhẽ chovi ha haimetemete oñapymi.  Ohechávo upéva Simón Pedro oñesũ Jesús renondépe ha heʼi: “Ejeíntena che ypýgui che Ruvicha, chéngo pekadór”.  Onohẽ rire umi piraita, Simón ha entéro umi oĩva hendive tuicha oñemondýi; 10  upéicha avei isosiokuéra, Santiago ha Juan, Zebedeo raʼy. Jesús katu heʼi Simónpe: “Ani rekyhyje, koʼág̃a guive romboʼéta rejagarra hag̃ua hénte, rejagarraháicha pira”. 11  Upémaramo haʼekuéra ogueru jey umi kanóa y rembeʼýpe, ha oheja opa mbaʼe ha omoirũ Jesúspe. 12  Ótro día katu, haʼe oĩ aja peteĩ siudápe, og̃uahẽ sapyʼa peteĩ kuimbaʼe henyhẽva lépragui. Ohechávo Jesúspe pe kuimbaʼe oñesũ ha oñakãity, ha ojerure asy chupe: “Karai, nde reipotáramo ningo ikatu chemonguera”. 13  Upémaramo Jesús opoko hese ha heʼi: “Si, romonguerase”. Ha upepete pe lépra opa chugui. 14  Upéi heʼi pe kuimbaʼépe ani hag̃ua ni mbaʼevéicharõ omombeʼu avavépe. Heʼi avei chupe: “Tereho ejechauka pe saserdótepe* ha, Moisés Léi* heʼiháicha, eikuaveʼẽ peteĩ jopói rekuera haguére. Péicha rehechaukáta chupekuéra rekuera hague”. 15  Upéicharamo jepe oparupiete ojekuaa Jesúspe, ha heta hénte ou hendápe ohendu hag̃ua chupe ha okuera hag̃ua imbaʼasýgui. 16  Haʼe katu oho ndaiporihápe avave ha oñemboʼe. 17  Peteĩ díape Jesús oporomboʼe hína, ha Jehová* omeʼẽ chupe podér omonguera hag̃ua umi héntepe. Upe jave oguapy avei upépe umi fariséo* ha mboʼehára leipegua*, oúva Galilea, Judea ha Jerusaléngui. 18  Ha og̃uahẽ kuimbaʼekuéra oguerúva peteĩ paralítiko hupáreve. Ha oñehaʼãmbaite hikuái omoinge hendápe. 19  Péro ndaikatúi oike hetaitereígui umi hénte, upémarõ ombokua hikuái pe técho, ha upérupi omboguejy pe hasýva hupa reheve Jesús oĩháme. 20  Haʼe ohechávo mbaʼéichapa ojerovia hikuái, heʼi: “Chamígo, nde pekádo oñeperdonáma ndéve”. 21  Upévare umi fariséo ha mboʼehára leipegua oñepyrũ okalkula ha heʼi ojupe: “¿Máva piko kóva otaky* hag̃ua Ñandejárare? Ñandejára añoite ningo ikatu operdona umi pekádo”. 22  Péro Jesús ohechakuaa mbaʼépa opensa hikuái ha ombohovái chupekuéra: “¿Mbaʼére piko pepensa péicha pende pyʼapýpe? 23  ¿Mbaʼépa ndahasyive jaʼe? ¿‘Nde pekádo oñeperdonáma’, térã, ‘Epuʼã eguata’?. 24  Péro peikuaa hag̃ua Yvypóra Raʼy* orekoha autorida operdona hag̃ua pekádo ko yvy ape ári...”, heʼi pe paralítikope: “Epuʼã, ejagarra nde rupa ha tereho nde rógape”. 25  Upepete haʼe opuʼã, ojagarra hupa ha ombotuicha Ñandejárape ohóvo hógape. 26  Ha opavave ohecharamoiterei upe oikóva ha ombotuicha Ñandejárape. Ha kyhyjepópe heʼi hikuái: “¡Arakaʼeve ndorohecháiva koʼã mbaʼe oikoha!”. 27  Upe rire Jesús osẽ ha ohecha peteĩ impuésto kovraha hérava Leví oguapyha hína pe impuésto ojekovrahápe, ha heʼi chupe: “Eju chemoirũ”. 28  Upévo haʼe opuʼã, oheja opaite mbaʼe ha omoirũ chupe. 29  Upéi Leví ojapo Jesúspe peteĩ karu guasu hógape ha hetaiterei impuésto kovraha ha ótro tapichakuéra oguapy hendivekuéra mesápe. 30  Ohechávo upéva umi fariséo ha umi mboʼehára leipegua omoirũva chupekuéra, oñepyrũ ojeplagea ha heʼi Jesús disipulokuérape*: “¿Mbaʼére piko pekaru ha pemboyʼu umi impuésto kovraha ha mbaʼe vai apohándi?”. 31  Jesús heʼi chupekuéra: “Hesãiva noikotevẽi doktór, péro umi hasýva oikotevẽ. 32  Che ndajúi ahenói umi hekojojávape, aju guei ahenói umi mbaʼe vai apohápe oñarrepenti* hag̃ua”. 33  Haʼekuéra heʼi: “Juan disipulokuéra pyʼỹi oajuna ha oñemboʼe ipyʼaite guive, umi fariséo disípulo upéichante avei. Péro nde disipulokuéra katu okaru ha omboyʼu”. 34  Jesús heʼi chupekuéra: “Pe nóvio oĩ aja peẽ ndaikatúi peje iñamigokuérape oajuna hag̃ua, ¿ajépa? 35  Péro og̃uahẽta pe tiémpo pe nóvio ojepeʼataha chuguikuéra ha upe tiémpope oajunáta hikuái”. 36  Ha omoĩ peteĩ ehémplo: “Avave noikytĩri peteĩ ao pyahu orremenda hag̃ua peteĩ ao tuja. Péro ojapóramo, pe rremiéndo pyahu oitira pe ao tuja, ha avei pe rremiéndo pyahu ndopytaporãi pe ao tujáre. 37  Upéicha avei avave nomoĩmoʼãi víno ojejapo ramóva mbaʼyru* tujápe. Omoĩramo katu, pe mbaʼyru okapúta ha oñehundíta, ha pe víno oñehẽmbaitéta. 38  Pe víno ojejapo ramóva oñemoĩ vaʼerã mbaʼyru pyahúpe. 39  Umi hoʼúva víno oñeñongatupyréva, ndoʼusevéima pe ojejapo ramóva. Ojeʼeháicha jepi: ‘Víno oñeñongatupyréva, hetereive’”.

Nóta

Ehecha “Saserdóte”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha Informasión Oĩvéva 1.
Ehecha “Fariséo”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Blasfemia”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Arrepentimiénto”, diksionário oĩva ko Bíbliape.
Mbaʼyru ojejapóva mymba pirégui.