Ehecha oĩva pype

Ehecha oĩva pype

Lucas 22:1-71

22  Upérõ og̃uahẽmbota pe Pan Ilevaduraʼỹva Arete*, oñehenóiva avei Páskua*.  Umi saserdóte ruvichakuéra* ha mboʼehára leipegua* okalkula arakaʼépa opyta porãvéta chupekuéra ojuka hag̃ua Jesúspe, okyhyjégui hikuái umi héntegui.  Péro Satanás* oike Judas Iscariote korasõme, upe oĩ vaʼekue umi doce apóstol* apytépe.  Haʼe oho oñemongeta umi saserdóte ruvichakuérandi ha umi kapitán templopeguándi, ohecha hag̃ua mbaʼéichapa ikatúta ontrega* chupekuéra Jesúspe.  Haʼekuéra ovyʼaiterei ha heʼi omeʼẽtaha chupe monéda de pláta.  Upémarõ Judas oñemoĩ hendivekuéra peteĩ ñeʼẽme, ha oñepyrũ okalkula arakaʼépa opyta porãvéta chupe otraisiona Jesúspe, umi hénte ndaipóri jave.  Upéi og̃uahẽ pe Pan Ilevaduraʼỹva Arete, upérõ ojejuka vaʼerã pe mymba Páskuape g̃uarã.  Jesús omondo Pedro ha Juánpe ha heʼi: “Tapeho peprepara ñandéve jaʼu hag̃ua pe séna Páskuape g̃uarã”.  Haʼekuéra heʼi: “¿Moõpa reipota roprepara?”. 10  Haʼe heʼi chupekuéra: “Peikévo pe siudápe petopáta peteĩ kuimbaʼe ogueraháva hína y peteĩ kambuchípe. Pesegi chupe oike peve pe ógape. 11  Ha peje vaʼerã pe ogajárape: ‘Ore Mboʼehára heʼi: “¿Moõ piko oĩ pe koty aiporútava asena hag̃ua ko Páskuape che disipulokuérandi*?”’. 12  Haʼe ohechaukáta peẽme peteĩ koty guasu, oĩva yvate, upépe oĩmbaite umi mbaʼe jaiporútava, peprepara ñandéve upépe”. 13  Upémarõ haʼekuéra osẽ oho, ha otopa haʼe heʼi hagueichaite, ha oprepara hikuái pe Páskua. 14  Upéi, og̃uahẽvo pe óra, haʼe oguapy ijapostolkuérandi pe mesápe, 15  ha heʼi chupekuéra: “Hetaitéma ahaʼarõ og̃uahẽ ko Páskua, asena hag̃ua penendive ahasa asy mboyve. 16  Añetehápe haʼe peẽme: Che ndaʼumoʼãvéima ko séna, oñekumpli peve Ñandejára Rréinope”. 17  Upéi ojagarra peteĩ kópa, oagradese Ñandejárape, ha heʼi: “Pejagarra kóva ha pembohasa ojupe; 18  che haʼe peẽme: Koʼág̃a guive ndaʼumoʼãvéima víno og̃uahẽ meve Ñandejára Rréino”. 19  Avei ojagarra peteĩ pan, oagradese Ñandejárape, ombojaʼo ha ombohasa chupekuéra, heʼívo: “Kóva orrepresenta che rete, oñemeʼẽtava penderehehápe. Pesegíkena pejapo kóva penemanduʼávo cherehe”. 20  Upéi osenamba rire ojagarra avei pe kópa, ha heʼi: “Ko kópa orrepresenta pe kompromíso* pyahu ojejapóva che ruguy rupive, oñeñohẽtava penderehehápe. 21  ”¡Péina!, pe chetraisionáva oĩ chendive ko mesápe. 22  Pe Yvypóra Raʼy* omanóta ojehai haguéicha Ñandejára Ñeʼẽme, ¡péro aichejáranga upe otraisionáva chupe!”. 23  Upémarõ haʼekuéra oñepyrũ ojodiskuti jahecha mávapa ijapyteguikuéra ojapóta pe mbaʼe vaiete. 24  Péro oñepyrũ avei ojodiskuti vaipa hikuái, jahecha mávapa hína pe tuichavéva ijapytepekuéra. 25  Jesús katu heʼi chupekuéra: “Peẽngo peikuaa mbaʼéichapa umi rréi omanda hetãyguakuérare, ha umi poguasukuérape oñembotuicha*. 26  Peẽ katu ndaupéichai vaʼerã. Pe tuichavéva pende apytépe, oiko vaʼerã pe imitãvévaramo, ha pe omoakãva katu oiko vaʼerã pene rembijokuáiramo. 27  Mávapa tuichave: ¿Pe oguapýva mesápe, térãpa pe oservíva chupe? ¿Ndahaʼéi piko pe oguapýva hína mesápe? Che katu aime pende apytépe pene rembijokuáiramo. 28  ”Péro peẽ akóinte peime che ykére pe ijetuʼuve jave. 29  Ha che ajapo penendive peteĩ kompromíso pegoverna hag̃ua, che Túva ojapo haguéicha chendive peteĩ kompromíso agoverna hag̃ua Irréinope. 30  Ikatu hag̃uáicha peguapy che mesápe pekaru ha pemboyʼu che Rréinope, ha peguapy hag̃ua umi trónope pehusga umi doce trívu oĩva Israélpe. 31  ”Simón, Simón, Satanás ojeruréma penderehe pendetyvyro hag̃ua pe trígo ojetyvyroháicha. 32  Péro che ajeruréma nderehe ani hag̃ua ikangy nde jerovia, ha upéi reju jey vove, emombarete ne ermanokuérape”. 33  Pedro heʼi chupe: “Che Ruvicha, aime aha hag̃uáicha nendive kárselpe ha amano hag̃ua avei nendive”. 34  Péro haʼe heʼi: “Che haʼe ndéve Pedro, koestedía, pe gállo osapukái mboyve, nde renegáta chekuaaha tres vése”. 35  Upéi heʼi avei chupekuéra: “Che pomondórõ guare vosa, pláta ryru ha sandaliaʼỹre, ndofaltái kuri peẽme mbaʼeve, ¿ajépa?”. Haʼekuéra heʼi: “Nahániri, ndofaltái”. 36  Upémarõ heʼi chupekuéra: “Koʼág̃a katu pe oguerekóva vosa, togueraha upéva ha avei pe pláta ryru, ha pe ndoguerekóiva espáda tovende ijao joʼaha ha tojogua peteĩ. 37  Che haʼe peẽme, pe ojehaíva Ñandejára Ñeʼẽme oñekumpli vaʼerã cherehe, upépe heʼi: ‘Ojereko chupe mbaʼe vai apoháramo*’. Pe ojehai vaʼekue cherehe oñekumplipaite ohóvo”. 38  Upévo heʼi hikuái: “Ore Ruvicha, ápe oĩ mokõi espáda”. Haʼe heʼi chupekuéra: “Ovalémante”. 39  Upe rire, jepiveguáicha, osẽ oho pe sérro Olivotýpe ha idisipulokuéra oho hendive. 40  Og̃uahẽ rire heʼi chupekuéra: “Peñemboʼe meméke ani hag̃ua peʼa mbaʼe vaípe”. 41  Haʼe katu ohomie chuguikuéra, oñesũ oñemboʼe, 42  ha heʼi: “Che Ru, eipeʼamína chehegui ko kópa*. Péro ani oiko che aipotáva, síno nde reipotáva”. 43  Upévo ou hendápe peteĩ ánhel yvágagui ha omombarete chupe. 44  Péro haʼe oñekevrantaiterei ha osegi oñemboʼe ipyʼaite guive; ha pe hyʼái haʼete voi tuguy otykýva pe yvýpe. 45  Oñemboʼepa rire opuʼã oho idisipulokuéra rendápe ha otopa haʼekuéra okejoa hína, pe mbaʼembyasy omokangýgui chupekuéra. 46  Jesús heʼi: “¿Mbaʼére piko peke? Pepuʼã ha peñemboʼe meme, ani hag̃ua peʼa mbaʼe vaípe”. 47  Heʼipa mboyve upéva, og̃uahẽ heta hénte, ha Judas omoakã chupekuéra, pe oĩ vaʼekue umi doce apóstol apytépe. Haʼe oñemboja ohetũ hag̃ua Jesúspe. 48  Jesús heʼi chupe: “Judas, ¿péicha cheretũvo piko retraisiona Yvypóra Raʼýpe?”. 49  Umi oĩva ijerére ohechávo mbaʼépa la oikótava, oporandu: “Ore Ruvicha, ¿roiporútapa ore espáda?”. 50  Peteĩva katu ohaʼã ijespádape pe saserdóte guasu* rembiguáipe, ha oipeʼaite voi chugui inambi iderechapegua. 51  Péro Jesús ombohovái: “Ovalémante”, ha opoko pe tembiguái nambíre ha okueraite. 52  Upéi Jesús heʼi umi saserdóte ruvichakuérape, umi kapitán templopeguápe ha umi karai guasukuérape ou vaʼekue ipiári: “¿Peju piko espáda ha garróte reheve pejagarratarõguáicha peteĩ mondahápe? 53  Káda día ningo aiméva penendive pe témplope ha ndachejagarrái. Péro koʼág̃a og̃uahẽma pe tiémpo pytũmby ogoverna hag̃ua”. 54  Upévo ojagarra chupe hikuái, ha ogueraha omoinge pe saserdóte guasu rógape. Pedro katu osegi chupe ohóvo mombyrymi guive. 55  Upéi ojatapy hikuái pe korapýpe ha oguapyjoa upépe, ha Pedro oguapy avei hendivekuéra. 56  Ha peteĩ sirviénta ohecha chupe oguapyha hína pe tatarendy ypýpe, omaña porã hese ha heʼi: “Ko kuimbaʼe oĩ avei kuri hendive”. 57  Pedro katu onega ha heʼi: “Che ndaikuaái chupe”. 58  Upe riremínte oĩ ótro ohecháva chupe ha heʼi: “Nde haʼe avei heseguakuéra”. Haʼe heʼi: “Nahániri”. 59  Upéi ohasa rire una órarupi, ótro kuimbaʼe heʼi jey jey chupe: “Añetehápe haʼe peẽme, ko kuimbaʼe oĩ kuri hendive, haʼéngo galiléo”. 60  Pedro osẽ jey heʼi: “Ndaikuaái mbaʼépa la ereséva”. Ha upepete, heʼipa mboyve upéva osapukái peteĩ gállo. 61  Upépe Jesús ojere omaña Pédrore, ha Pedro imanduʼa haʼe heʼi hague chupe: “Pe gállo osapukái mboyve koestedía, nde chenegáta tres vése”. 62  Ha osẽ okápe hasẽ soro. 63  Upe rire umi kuimbaʼe orekóva préso Jesúspe, oñepyrũ oñembohory hese ha ombyepoti chupe; 64  ohesa jokua ha heʼi hikuái: “Oimérõ nde peteĩ proféta*, emombeʼúna oréve mávapa nenupã”. 65  Ha péicha osegi hikuái heta otaky* hese. 66  Upéi koʼẽmba rire, oñembyaty umi karai guasukuéra, umi saserdóte ruvicha ha umi mboʼehára leipegua, ogueraha Jesúspe Sanedrínpe* ha heʼi hikuái: 67  “Ndéramo pe Cristo*, ere porãntema oréve”. Péro haʼe heʼi chupekuéra: “Haʼéramo jepe peẽme, ni mbaʼevéicharõ ndapegueroviamoʼãi. 68  Ha che aporandúramo peẽme, ni mbaʼevéicharõ ndapejemoʼãi chéve mbaʼeve. 69  Koʼág̃a guive katu pe Yvypóra Raʼy oguapýta Ñandejára ipuʼakapáva deréchape”. 70  Upévo, enterovete heʼi: “¿Nde piko hína upéicharõ Ñandejára Raʼy?”. Haʼe heʼi: “Peẽ voi ningo peje che haʼeha”. 71  Upémarõ heʼi hikuái: “¡Ijurúrupi hoʼa! Ha ñande voi ñahendúma, nañaikotevẽvéima testígore”.

Nóta

Ehecha “Pan Ilevaduraʼỹva Arete”, diksionário oĩva ko Bíbliape.
Ehecha “Páskua”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Térã: “otraisiona”.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “pákto ỹrõ kontráto”.
Ehecha “Yvypóra Raʼy”, diksionário oĩva ko Bíbliape.
Griégope heʼi: “oñehenói Mbaʼe Porã Apoha”. Péicha oñehenói vaʼekue umi hénte ipojerávape oipytyvõ rupi ótrope, omeʼẽ haguére pláta ha umícha.
Térã: “umi oñemoĩva pe Léi rehe apytépe”.
Kópa heʼise Ñandejára ohejataha ojejuka Jesúspe ojeʼégui hese otakyha Ñandejárare.
Ehecha “Saserdóte Guasu”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Blasfemia”, diksionário oĩva ko Bíbliape.
Ehecha “Sanedrín”, diksionário oĩva ko Bíbliape.
Ehecha “Cristo”, diksionário oĩva ko Bíbliape.