Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 21:1-38

21  Upérõ Jesús omaʼẽ ha ohecha mbaʼéichapa umi ipláta hetáva omoĩjoa ipláta umi káha de kontrivusiónpe.  Upéi ohecha avei peteĩ viúda mboriahumi omoĩrõ mokõi monedaʼi saʼieterei ovaléva,  ha heʼi: “Añetehápe haʼe peẽme, ko viúda, imboriahúramo jepe omeʼẽ hetave opa umi ótrogui.  Haʼekuéra omeʼẽ rregáloramo umi hembývante chupekuéra, pe viúda katu oikotevẽramo jepe omeʼẽmbaite orekomíva”.  Upe rire, umi hénte oñeʼẽ aja hína pe témplore, mbaʼeichaitépa iporã umi ita oĩva hese ha umi mbaʼe oñemeʼẽ vaʼekue Ñandejárape,  Jesús heʼi: “Koʼã mbaʼe peẽ pehecha hína, péro og̃uahẽta umi ára ojeitypaitetaha umi ita, koʼápe ndopytamoʼãi ni peteĩva ojoʼári”.  Upémarõ oporandu chupe hikuái: “Mboʼehára, ¿arakaʼépa oikóta añetehápe koʼã mbaʼe? ¿Ha mbaʼépa oikóta ropilla hag̃ua oikotamaha koʼã mbaʼe?”.  Haʼe heʼi: “Peñatendéke ani avave penembotavy; cháke oĩta heta oiporútava che réra heʼívo: ‘Che hína pe Cristo*’, ha: ‘Hiʼag̃uimbaitéma upe tiémpo’. Aníkena peho hapykuerikuéra.  Avei pehendu vove oikoha umi gérra ha sarambi, ani peñemondýi. Koʼã mbaʼe oiko raẽ vaʼerã, péro pe ára pahaite ndoumoʼãi upepete”. 10  Upéi heʼi chupekuéra: “Peteĩ tetã opuʼãta ótro tetãre, ha umi goviérno opuʼãta ojuehe. 11  Oikóta umi yvyryrýi tuicháva, ápe ha pépe isarambíta mbaʼasy ha ñembyahýi. Umi hénte ohecháta heta mbaʼe oporomongyhyjéva, ha ohecháta avei techapyrã oúva yvágagui. 12  ”Péro oiko mboyve opa koʼã mbaʼe, pendejagarra ha pendepersegíta hikuái, pendegueraháta umi sinagogahárupi, kárselpe ha umi rréi ha governadór renondépe che réra káusare. 13  Ha péicha ikatúta pemombeʼu chupekuéra umi mbaʼe pegueroviáva. 14  Upévare natekotevẽi pekalkula raẽ mbaʼéichapa peñedefendéta. 15  Che ameʼẽta peẽme arandu ha poipytyvõta peñeʼẽkuaa hag̃ua, ha pene enemigokuéra ndaikatumoʼãi heʼi mbaʼeve penembohovái hag̃ua. 16  Avei pende tuvakuéra, pene ermáno, pene hénte, ha pene amigokuéra jepe pendegueraháta trivunálpe, ha pende apytépe oĩta ojejukáva. 17  Ha avave ndaijaʼemoʼãi penderehe che réra káusare. 18  Upéicharamo jepe ni peteĩ pene akãrague noñehundimoʼãi pendehegui. 19  Peaguantáramo, pesalváta pende rekove*. 20  ”Avei ág̃a pehecha vove umi ehérsito omongora Jerusalén, peikuaáta oñehundipotaitemaha. 21  Upévo umi oĩva Judéape odipara vaʼerã okañy umi sérrore; umi oĩva Jerusalénpe osẽ vaʼerã upégui, ha umi oĩva okáre animoʼãke oike upépe. 22  Umíva haʼe hína ára Ñandejára okastiga hag̃ua umi héntepe, ikatu hag̃uáicha oñekumplipa Ñandejára Ñeʼẽme ojehai vaʼekue. 23  ¡Aichejáranga umi kuña hyeguasúva ha umi imemby kambúva umi árape! Tuicha jehasa asy oúta ko yvy apére, ha koʼã héntepe ojekastigáta, 24  ojejukáta espádape, ha oĩta ojegueraháva tembiguáirõ opa umi tetãrupi. Jerusalén rehe opyrũta umi tetãnguéra, oñekumpli peve pe tiémpo oñemeʼẽva umi tetãme. 25  ”Ojehecháta avei techapyrã pe kuarahýre, jasýre ha umi estrellakuérare. Ha yvy ape ári katu ipyʼatarovapáta umi tetãnguéra, ndoikuaáigui mbaʼépa ojapóta ohendúvo mbaʼeichaitépa hyapu pe mar pochy. 26  Umi kuimbaʼe katu odesmajáta kyhyjégui ohaʼarõ rupi umi mbaʼe oúva hína ko yvy ape ári; ha opa mbaʼe oĩva yvágape oñembokachapaitéta. 27  Upévo ohecháta hikuái Yvypóra Raʼýpe* ouha umi arai ári, tekomimbipa ha podér reheve. 28  Péro oñepyrũvo oiko koʼã mbaʼe, peñemboʼy ha peñakãrapuʼã, Ñandejára pendesalvapotaitéma rupi”. 29  Upévo haʼe omoĩ chupekuéra peteĩ ehémplo: “Pemañamínte pe ígo ha umi ótro yvyramátare: 30  Pehecha vove hokyha hína, peikuaáma og̃uahẽtamaha arahaku. 31  Upéicha avei peẽ, pehecha vove oikoha koʼã mbaʼe, peikuaáke hiʼag̃uimaha Ñandejára Rréino. 32  Añetehápe haʼe peẽme: Umi hénte oikóva ko tiémpope* ni mbaʼevéicharõ ndohasamoʼãi oikopa mboyve opa koʼã mbaʼe. 33  Yvága ha yvy ohasáta, péro che ñeʼẽ ni mbaʼevéicharõ ndohasamoʼãi. 34  ”Peñatendéke ani hag̃ua arakaʼeve peñekevranta peikógui pekarurasa, pemokõrasa térã pejepyʼapyetereígui pene remikotevẽre ha peichahágui upe ára ou pende ári peimoʼãʼỹve jave 35  peteĩ lásoicha. Ko ára oúta rupi opavave yvypóra oĩvare ko yvy ári. 36  Peñatende porãke peikóvo, ha opa árape pejerure asy Ñandejárape tapenepytyvõ pekañy hag̃ua opa koʼã mbaʼe ojeʼe vaʼekuégui oikotaha, ikatu hag̃uáicha peñemboʼy pe Yvypóra Raʼy renondépe”. 37  Ha arakuépe Jesús oporomboʼe pe témplope, pyharekue katu osẽ upégui ha oho opyta pe sérro Olivotýpe. 38  Ha pyharevete umi hénte oúma hendápe pe témplope ohendu hag̃ua chupe.

Nóta

Ehecha “Cristo”, diksionário oĩva ko Bíbliape.
Griégope heʼi: “pene álma”. Ehecha “Álma”, Informasión Oĩvéva 7A-pe.
Ehecha “Yvypóra Raʼy”, diksionário oĩva ko Bíbliape.
Ehecha “Umi Hénte Oikóva ko Tiémpope”, diksionário oĩva ko Bíbliape.