Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 20:1-47

20  Peteĩ jey Jesús omboʼe aja umi héntepe pe témplope ha opredika jave marandu porã*, oñemboja hendápe umi saserdóte ruvichakuéra, mboʼehára leipegua ha umi karai guasukuéra.  Ha heʼi chupe: “Eréna oréve, ¿nde piko ereko permíso rejapo hag̃ua koʼã mbaʼe? ¿Máva piko heʼi ndéve ikatuha rejapo?”.  Haʼe ombohovái chupekuéra: “Che aporandúta avei peẽme peteĩ mbaʼe ha pejemi chéve:  Pe vautísmo* Juan ojapo vaʼekue, ¿oúpa Ñandejáragui*, térãpa yvyporakuéragui?”.  Haʼekuéra okalkula ha heʼi ojupe: “Jaʼéramo ‘Ñandejáragui’, heʼíta ñandéve: ‘¿Mbaʼéreiko upéicharõ ndapegueroviái chupe?’.  Péro jaʼérõ: ‘Yvyporakuéragui’, enterovete koʼã hénte ñandejapíta itápe, haʼekuéra ogueroviágui Juan haʼe hague peteĩ proféta*”.  Upémaramo heʼi hikuái ndoikuaaiha mávaguipa ou.  Jesús heʼi chupekuéra: “Upéicharõ che namombeʼumoʼãi avei peẽme mávapa omeʼẽ chéve permíso ajapo hag̃ua koʼã mbaʼe”.  Upéi haʼe oñepyrũ heʼi umi héntepe ko ehémplo: “Peteĩ kuimbaʼe oñotỹ vaʼekue parrál ha oalkila umi chokokuépe. Upéi haʼe osẽ oho ótro tetãme ha are opyta upépe. 10  Og̃uahẽvo pe kosécha tiémpo, omondo peteĩ hembiguái umi chokokue rendápe, omeʼẽ hag̃ua hikuái pe tembiguáipe pe parrál otokáva chupe. Umi chokokue katu ombyepoti vaipaite chupe, ha omondo po nandi. 11  Upémarõ omondo jey ótro hembiguái. Pévape avei heta oinupã hikuái, oñembohory hese, ha omondo chupe po nandi. 12  Upe rire omondo jey hendapekuéra tres veseha ótro hembiguái; pévape ombyepoti vaipaite avei hikuái ha omosẽ chupe. 13  Upévo pe parralty jára heʼi: ‘¿Mbaʼéiko la ajapótava? Amondóta che raʼy ahayhuetévape, chupe orrespetáta hikuái’. 14  Péro ohechávo chupe umi chokokue, oñepyrũ okalkula ha heʼi ojupe: ‘Pévape opytáta hína ko kokue; ¡jajukámandi voi chupe ha topytapa ñandéve!’. 15  Upévo tyryryhápe oguenohẽ chupe hikuái pe parraltýgui ha ojuka. Upéicharõ, ¿mbaʼépa ojapóta hesekuéra pe parralty jára? 16  Oúta ojukapaite umi chokokuépe ha omeʼẽta pe iparralty ótrope”. Ohendúvo upéva, haʼekuéra heʼi: “¡Aníkena arakaʼeve oiko upéva!”. 17  Péro haʼe omaña hesekuéra ha heʼi: “Upéicharõ, ¿mbaʼépa heʼise ko ojehaíva Ñandejára Ñeʼẽme: ‘Pe ita omboyke vaʼekue umi óga apoha, upéva haʼe hína pe ita iñimportantevéva oĩva pe eskínape’? 18  Ha entéro hoʼáva ko itáre ijakuʼíta. Ha pe ita hoʼárõ hiʼári katu ombochipepaitéta chupe”. 19  Umi mboʼehára leipegua ha saserdóte ruvichakuéra ohechakuaa Jesús oñeʼẽha hesekuéra omombeʼúvo ko ehémplo. Upévare ojagarrase chupe hikuái, péro okyhyje umi héntegui. 20  Ojesareko rire hese, haʼekuéra opaga una partída kuimbaʼépe ha omondo hendápe oñembohekojoja guaʼu hag̃ua hikuái, ikatu hag̃uáicha oity Jesúspe ñuhãme iñeʼẽ rupive. Péicha ikatúta ontrega chupe umi poguasukuéra goviernopegua poguýpe. 21  Ha oporandu chupe hikuái: “Mboʼehára, roikuaa reñeʼẽ ha remboʼeha hendaitépe, ha neremboykéi avavépe, remboʼe guei Ñandejára rape hekopete. 22  ¿Ovale piko japaga pe impuésto Césarpe*, térãpa nahániri?”. 23  Haʼe katu opilla la ojaposéva hikuái, upévare heʼi chupekuéra: 24  “Pehechauka chéve peteĩ denário*. ¿Máva raʼanga ha máva rérapa oĩ hese?”. Haʼekuéra heʼi: “César”. 25  Jesús heʼi: “Upéicharõ katuete pemeʼẽ vaʼerã Césarpe imbaʼéva, péro pemeʼẽ vaʼerã Ñandejárape imbaʼéva”. 26  Haʼekuéra ndaikatúi oity chupe ñuhãme iñeʼẽ rupive umi hénte renondépe, péro opyta ijurujái hikuái la ombohovái lájare ha okirirĩmante. 27  Upéi ou umi saduséo*, haʼekuéra heʼi ndaiporiha ñemoingove jey, oñemboja Jesús rendápe ha oporandu chupe: 28  “Mboʼehára, Moisés ningo ohai vaʼekue: ‘Oĩramo peteĩ kuimbaʼe omanóva hembireko imembyʼỹre chugui, upéicharõ iñermáno omenda vaʼerã pe viúdare omeʼẽ hag̃ua iñermánope ñemoñare’. 29  Oĩ vaʼekue siete ermáno, upéi pe ijypykuéva omenda, péro omano hembireko imembyʼỹre chugui. 30  Upéicha avei pe mokõiha omenda pe kuñáre, ha omano avei, 31  ha upéicha avei oiko pe mbohapyháre. Ha umi siete omenda hese ha omanomba ifamiliaʼỹre. 32  Ha amo ipahápe omano avei pe kuña. 33  Upéicharõ, oiko vove pe ñemoingove jey, ¿máva rembirekótapa upe kuña? Umi siete ningo omenda vaʼekue hese”. 34  Jesús heʼi chupekuéra: “Umi hénte ko mundopegua* omendajoa, 35  péro umi kuña ha kuimbaʼe omereséva oiko pe múndo oútavape ha omereséva oikove jey omanóva apytégui, umíva nomendamoʼãvéima. 36  Añetehápe, ndaikatumoʼãvéima omano, haʼekuéra oikóta umi ánhel oikoháicha, ha oñemoingove jey rupi chupekuéra, oikóta chuguikuéra Ñandejára raʼy. 37  Oñeʼẽrõ guare pe sársa máta rehe, Moisés voi ohechauka umi omano vaʼekue oikove jeytaha heʼívo Jehová* haʼeha ‘Abrahán, Isaac, ha Jacob Jára’. 38  Haʼe ningo Ñandejára umi oikovévape g̃uarã, ndahaʼéi umi omano vaʼekuépe g̃uarã. Chupe g̃uarã enterove haʼekuéra oikove gueteri”. 39  Umi mboʼeharakuéra leipegua apytégui oĩ ombohováiva chupe: “Mboʼehára, añete upe eréva”. 40  Ha noñanimavéima hikuái oporandu chupe mbaʼevete. 41  Haʼe katu heʼi chupekuéra: “¿Mbaʼéicha rupi piko ojeʼe pe Cristo* haʼeha David raʼy? 42  David voi ningo heʼi Salmokuéra kuatiañeʼẽme: ‘Jehová heʼi che Ruvichápe: “Eguapy che deréchape 43  amoĩmba peve nde py guýpe ne enemigokuérape”’. 44  David voi heʼíramo chupe ‘che Ruvicha’, ¿mbaʼéicha piko upéicharõ pe Cristo haʼéta itaʼýra?”. 45  Upéi, entéro umi hénte ohendu aja haʼe heʼi idisipulokuérape*: 46  “Peñeñangarekóke umi mboʼehára leipeguágui. Haʼekuéra oikose okorre opárupi ao puku reheve, oipota ojesaluda chupekuéra umi plasahárupi*, oguapyse tenondetépe umi sinagógape* ha umi karu guasuhárupi oguapyse umi lugár iñimportantevévape. 47  Haʼekuéra oipeʼapa umi viúdagui orekóva guive. Ha oiko oñemboʼe puku guaʼu ojechauka hag̃ua. Koʼãvape ojekastiga vaivéta hína”.

Nóta

Ehecha “Marandu Porã”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Griégope heʼi: “yvágagui”.
Ehecha “Profesía”, diksionário oĩva ko Bíbliape.
Péicha oñehenói vaʼekue umi mburuvicha guasúpe Rómape.
Ehecha “Denário”, diksionário oĩva ko Bíbliape.
Ehecha “Saduséo”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha Informasión Oĩvéva 1.
Ehecha “Cristo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “merkádorupi”.
Ehecha “Sinagóga”, diksionário oĩva ko Bíbliape.