Ehecha oĩva pype

Ehecha oĩva pype

Lucas 2:1-52

2  Upe tiémpope, César* Augusto ojapouka peteĩ sénso* ha heʼi opavave oñanota vaʼerãha  (ko sénso tenondegua ojejapo Quirinio haʼérõ guare governadór Síriape).  Upémarõ enterove oviaha ivállepe oñanota hag̃ua.  José ningo David familiare ha upévare oho Belénpe, David vállepe. Upearã oviaha Nazarétgui oĩva Galiléape, Judea peve.  Oho oñanota hag̃ua María ndive, upérõ haʼekuéra omendáma ha María hyeguasuete.  Oĩ aja hikuái upépe, og̃uahẽ pe tiémpo imemby hag̃ua  ha oguereko peteĩ mitãkuimbaʼe, haʼe hína pe ijypykue. Ndaipóri rupi peteĩ koty opyta hag̃ua hikuái, María olia imemby peteĩ télape ha omoñeno pesévrepe*.  Namombyrýi upe lugárgui oĩ umi ovecharerekua oikóva ñúre ha opytáva pyhare pukukue oñatende hymbakuérare.  Upeichaháguinte Jehová* ánhel oñemboʼy ijypypekuéra ha Jehová rekomimbipa ohesapepa ijerére, upévo tuichaiterei oñemondýi hikuái. 10  Pe ánhel katu heʼi chupekuéra: “Ani pekyhyje, che aju amombeʼu hag̃ua peẽme marandu porã* ombovyʼaitereítava opavave umi héntepe. 11  Koestedía David vállepe onase upe pendesalvátava, upéva hína Cristo* ñande Ruvicha. 12  Ha kóicha pepilláta mávapa: petopáta peteĩ mitãʼi ojeliáva télape ha oñenóva peteĩ pesévrepe”. 13  Ha peichahágui ou pe ánhel rendápe hetaitereive ánhel* ha omombaʼe Ñandejárape heʼívo: 14  “Toñembotuicha Ñandejárape yvágape, ha ko yvy ape ári taipyʼaguapy umi hénte Ñandejára oguerohorýva”. 15  Upéi umi ánhel oheja chupekuéra ha oho jey yvágape. Upévo umi ovecharerekua heʼi ojupe: “Jaháke koʼag̃aite Belénpe jahecha hag̃ua ko mbaʼe oikóva ha Jehová oikuaaukáva ñandéve”. 16  Pyaʼe porã oho hikuái ha otopa María, José ha pe mitãraʼy oñenóva hína pesévrepe. 17  Ha ohechávo chupe oñepyrũ omombeʼu hikuái pe ojeʼe vaʼekue chupekuéra pe mitãʼíre. 18  Entéro ohendúvante umi mbaʼe heʼíva umi ovecharerekua, ijurujaipa opytávo. 19  María katu imanduʼa meme koʼã mbaʼére ha ojepyʼamongeta mbaʼépa heʼise umíva. 20  Ha umi ovecharerekua oho jeývo upégui, ombotuicha ha omombaʼe Ñandejárape opaite umi mbaʼe ohecha ha ohendu vaʼekuére, ojeʼe hagueichaite chupekuéra. 21  Ocho día haguépe og̃uahẽ pe día oñesirkunsida hag̃ua pe mitãʼípe. Ha pe ánhel heʼi haguéicha Maríape hyeguasu mboyve, oñembohéra chupe Jesús. 22  Upéi og̃uahẽvo pe día oñemopotĩ hag̃ua hikuái, Moisés Léi* heʼiháicha, ogueraha pe mitãme Jerusalénpe ohechauka hag̃ua Jehovápe. 23  Péicha ojehai Jehová Léipe: “Entéro taʼýra ypykue oñemeʼẽ* vaʼerã Jehovápe”. 24  Ha omeʼẽ ojesakrifika hag̃ua Jehová Léi heʼiháicha: “Mokõi tortóla térã mokõi palomaraʼy”. 25  Upérõ Jerusalénpe oĩ peteĩ kuimbaʼe hérava Simeón henyhẽva espíritu sántogui*, haʼe hekojoja ha okyhyje Ñandejáragui. Ha ohaʼarõ Ñandejára oipytyvõ Israélpe. 26  Ñandejára oikuaauka vaʼekue voi chupe espíritu sánto rupive nomanomoʼãiha ohecha mboyve Crístope, Jehová remimbou. 27  Pe espíritu sánto ogueraha Simeónpe témplo ryepýpe. Upe jave José ha María ogueru avei Jesúspe, ojejapo hag̃ua hese pe Léi heʼíva. 28  Upévo Simeón ohupi ijyva ári pe mitãme ha ombotuicha Ñandejárape heʼívo: 29  “Mburuvicha Guasu Ijojahaʼỹva, koʼág̃a ne rembiguái ikatúma omano pyʼaguapýpe nde ere haguéicha; 30  ahecháma rupi upe reiporútava reporosalva hag̃ua, 31  reprepara vaʼekue opavave umi hénte renondépe. 32  Haʼe hína peteĩ mbaʼerendy oipeʼátava pe pytũmby ojahoʼíva tetãnguérape, ha omimbítava umi Israelgua renondépe”. 33  Pe mitã túva ha isy oponderaiterei ohendúvo koʼã mbaʼe ojeʼéva hese. 34  Upéi Simeón ojerure Ñandejárape ohovasami* hag̃ua chupekuéra, ha heʼi Maríape, pe mitã sýpe: “Oĩta heta Israelgua hoʼáva ikáusare ha oĩta opuʼãva, avei oĩta heta oñeʼẽ vaíva hese, jepe Ñandejára ohechauka oĩha hendive; 35  ha péicha ojekuaáta mbaʼépa opensa umi hénte ipyʼapýpe (nde katu reñandúta peteĩ espáda puku ndekuturamoguáicha*)”. 36  Upérõ oĩ avei peteĩ kuñakarai oprofetisáva* hérava Ana. Haʼe ningo Fanuel rajy, Aser trivugua (ko kuñakarai ig̃uaig̃uíma ha oiko vaʼekue iménandi siete áño, 37  upéi opyta viúda ha upérõ orekóma ochenta y cuatro áño) ha arakaʼeve ndofaltáiva pe témplope. Upépe omombaʼeguasu Ñandejárape ára ha pyhare, oajuna ha oñemboʼe ipyʼaite guive. 38  Upe órape haʼe oñemboja hendapekuéra ha oñepyrũ oagradese Ñandejárape. Avei oñeʼẽ pe mitãre, entéro umi hénte ohaʼarõvape oñemosãso Jerusalén. 39  Ojapopa rire opa mbaʼe Jehová Léi heʼiháicha, haʼekuéra oho jey Galiléape, iválle Nazarétpe. 40  Pe mitã katu okakuaa, imbarete ha iñaranduve ohóvo, ha Ñandejára akóinte oguerohory chupe. 41  Ituvakuéra katu ojepokuaa oho káda áño Jerusalénpe Páskua* areterã. 42  Ha Jesús orekórõ guare doce áño, jepiveguáicha ojupi hikuái Jerusalénpe pe areterã. 43  Haʼekuéra opyta upépe opa peve pe arete. Upéi oho jeývo hógape, Jesús opyta Jerusalénpe ha ituvakuéra ndopillái upéva. 44  Oimoʼãgui ouha umi ótro héntendi, un día oguata rire ae oñepyrũ oheka chupe hikuái ihénte ha ikonosidokuéra apytépe. 45  Péro ndojuhúimaramo, haʼekuéra ojevy Jerusalénpe ha oheka porã chupe oparupiete. 46  Upéi tres día haguépe otopa chupe hikuái pe témplope, oguapy hína umi mboʼeharakuéra apytépe, haʼe ombaʼeporandu ha ojapysaka hesekuéra. 47  Ha opavave ohendúva chupe ohecharamo mbaʼeichaitépa ombohovaikuaa ha ontende heta mbaʼe. 48  Ituvakuéra oñemondýi ohechávo chupe, ha isy heʼi: “Che memby, ¿mbaʼére piko péicha rejapo orerehe? Nde túva ha che ningo oretarovaite rohekávo”. 49  Haʼe katu heʼi chupekuéra: “¿Maʼerã piko pechereka raʼe? ¿Ndapeikuaái piko aime vaʼerãha che Túva rógape?”. 50  Haʼekuéra katu nontendéi mbaʼépa heʼise upéva. 51  Upéi haʼe oguejy hendivekuéra, oho jey Nazarétpe ha osegi iñeʼẽrendu chupekuéra. Isy katu oñongatu porã ipyʼapýpe opa koʼã mbaʼe. 52  Ha Jesús okakuaa ha iñaranduve ohóvo, ha Ñandejára ha umi hénte oguerohory chupe.

Nóta

Péicha oñehenói vaʼekue umi mburuvicha guasúpe Rómape.
Upéva ojejapo ojepaga hag̃ua impuésto, ojerrekluta hag̃ua soldádo ha ojekuaa hag̃ua mboy héntepa oĩ.
Upéva hína umi mymba okaruha.
Ehecha Informasión Oĩvéva 1.
Ehecha “Marandu Porã”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “atyraite oúva pe ehérsito yvagapeguágui”.
Ehecha “Léi”, diksionário oĩva ko Bíbliape.
Griégope heʼi: “imarangatu”.
Ehecha “Espíritu Sánto”, diksionário oĩva ko Bíbliape.
Térã: “ovendesimi”. Ehecha “Vendisión”, diksionário oĩva ko Bíbliape.
Griégope heʼi: “oikuturamoguáicha ne álma”. Ehecha “Álma”, Informasión Oĩvéva 7A-pe.
Ehecha “Profesía”, diksionário oĩva ko Bíbliape.
Ehecha “Páskua”, diksionário oĩva ko Bíbliape.