Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 19:1-48

19  Upéi Jesús ohasa ohóvo Jericórupi.  Upépe oĩ peteĩ kuimbaʼe ipláta hetáva hérava Zaqueo, haʼe vaʼekue umi impuésto kovraha ruvicha.  Haʼe oñehaʼã ohecha Jesúspe, péro umi hénte káusare ndaikatúi ohecha chupe, haʼe ikarapetereígui.  Upémarõ odipara ha oho tenondeve, ojupi peteĩ ígo mátare haʼe ohasatahárupi, ohecha hag̃ua chupe.  Og̃uahẽvo upépe, Jesús omaña hese ha heʼi: “Zaqueo, pyaʼe eguejy upégui, koestedía apyta vaʼerã nde rógape”.  Upémarõ haʼe pyaʼe porã oguejy ha vyʼápe orresivi chupe hógape.  Péro ohechávo upéva, enterove oñepyrũ oñeʼẽ ñemijoa, heʼívo: “Oho opyta peteĩ pekadór rógape”.  Zaqueo katu oñemboʼy ha heʼi Jesúspe: “¡Péina!, che Ruvicha umi che kosakuéragui la mita ameʼẽ umi imboriahúvape, ha umi pláta aipeʼa vaʼekue pokarẽme che rapichágui, amyengovia cuatro vése”.  Upévo Jesús heʼi chupe: “Koestedía Ñandejára osalva ko kuimbaʼe ha ifamíliape, haʼe rupi Abrahán raʼy avei. 10  Pe Yvypóra Raʼy* ou voi oheka ha osalva hag̃ua umi ohóvape tape vaíre”. 11  Ohendu aja hikuái koʼã mbaʼe, Jesús omombeʼu chupekuéra ótro ehémplo, haʼekuéra opensa rupi og̃uahẽvo Jerusalénpe ojehechatamaha Ñandejára Rréino. 12  Upémarõ heʼi: “Peteĩ kuimbaʼe* osẽ oho mombyry tetã ambuépe oiko hag̃ua chugui rréi, ha upéi ou jey hag̃ua. 13  Oho mboyve ohenói diez hembiguáipe, omeʼẽ chupekuéra heta porã pláta* ha heʼi: ‘Pemombaʼapo ñandéve koʼãva aju jey peve’. 14  Péro umi ivalleguakuéra ndaijaʼéi hese ha upévare omondo hapykuéri hembijokuáipe heʼi hag̃ua: ‘Ndoroipotái chupe ore rreirã’. 15  ”Upéi haʼe ou jey oiko rire chugui rréi, ha ohenoika umi hembiguáipe oikuaa hag̃ua mboýpa ogana hikuái omombaʼapóvo pe pláta oheja vaʼekue chupekuéra. 16  Upévo ou pe tenondegua ha heʼi: ‘Karai, nde pláta oñembohetave diez vése’. 17  Upémarõ heʼi chupe: ‘¡Ajépa ndeguápo che rembiguái! Rejapo porã haguére pe tembiapo michĩmi aheja vaʼekue nde kárgope, koʼág̃a amoĩta nde poguýpe diez siuda’. 18  Upéi ou pe segundo ha heʼi: ‘Karai, nde pláta oñembohetave cinco vése’. 19  Heʼi avei chupe: ‘Amoĩta nde poguýpe cinco siuda’. 20  Upéi ou ótro, ha heʼi: ‘Karai, koʼápe oĩ nde pláta añongatu vaʼekue peteĩ páñope. 21  Nde ningo ndearhél, regana pláta ótro sakrifisiokuére, ha remonoʼõ nereñemitỹi haguépe, upévare akyhyje ndehegui’. 22  Haʼe heʼi chupe: ‘Nde jurúrupi reʼa nde tembiguái aña. ¿Reikuaa piko añete chearhelha, aganaha pláta ótro sakrifisiokuére, ha amonoʼõha nañemitỹi haguépe? 23  ¿Mbaʼégui piko upéicharõ ndereguerahái raʼe che pláta vánkope? Upéicharire ag̃uahẽvo hetave akovra vaʼerãmoʼã’. 24  ”Upévo heʼi umi oñemboʼývape upépe: ‘Peipeʼa chugui pe pláta ha pemeʼẽ pe ombohetave vaʼekuépe che pláta diez vése’. 25  Upémarõ heʼi hikuái: ‘¡Karai, haʼe ningo oguerekóma hetaiterei pláta!’... 26  Haʼe heʼi: ‘Pe oguerekóvape oñemeʼẽvéta, péro pe oguerekoʼỹvagui katu, pe oguerekomíva jepe ojepeʼáta chugui. 27  Ha pegueru chéve ápe umi che enemígo ndoipotái vaʼekue ajupi rréiramo, ani pepondera hesekuéra ha pejukapaite che renondépe’”. 28  Heʼipa rire koʼã mbaʼe Jesús osegi iviáhe ha ojupi Jerusalén gotyo. 29  Og̃uahẽmbotávo Betfagué ha Betániape, pe sérro Olivotýpe, omondo mokõi idisípulope* 30  ha heʼi: “Tapeho amoite puévlope oĩva pene renondépe, ha peike rire petopáta peteĩ vurroraʼy oñeñapytĩva, neʼĩrava gueteri avave ojupi hiʼári; pejora ha pegueru chéve. 31  Oĩrõ oporandúva peẽme: ‘¿Maʼerãiko pejora hína?’, peje vaʼerã chupe: ‘Ore Ruvicha oikotevẽ’”. 32  Upéi umi mokõi disípulo omondo vaʼekue osẽ oho, ha otopa haʼe heʼi hagueichaite. 33  Péro ojorávo hikuái pe vurroraʼy, umi ijára heʼi chupekuéra: “¿Maʼerãiko pejora hína pe vurroraʼy?”. 34  Haʼekuéra heʼi: “Ore Ruvicha oikotevẽ”. 35  Ha ogueraha hikuái pe vurroraʼy Jesús rendápe. Ha omoĩ rire hiʼári umi ijao joʼaha, Jesús ojupi hiʼári. 36  Haʼe oho aja, haʼekuéra oipyso ijao joʼaha pe tapére. 37  Oñembojávo pe tapére oguejýva sérro Olivotýgui, entéro idisipulokuéra oñepyrũ ovyʼa, ha ombotuicha Ñandejárape hetaite milágro ohecha haguére hikuái. 38  Ha heʼi: “¡Tojehovasa* pe Rréi oúva Jehová* rérape! ¡Toĩ pyʼaguapy yvágape, ha toñembotuicha Ñandejárape umi lugár ijyvatevévape!”. 39  Péro umi fariséo* oĩva pe hénte apytépe heʼi chupe: “Mboʼehára, ejaʼo nde disipulokuérape”. 40  Péro haʼe ombohovái chupekuéra: “Koʼãva okirirĩramo, umi ita jepe osapukáine”. 41  Ha og̃uahẽmbotávo Jerusalénpe, omaña pe siudáre ha hasẽ hese 42  heʼívo: “Nde rehechakuaa vaʼerãmoʼã koestedía umi mbaʼe oguerútava ndéve pyʼaguapy..., péro koʼág̃a oñemokañy nde resa renondégui. 43  Og̃uahẽta ára umi ne enemigokuéra omoĩtaha nde jerére umi yvyra akua, nemongoráta ha ndejopýta opáguio, 44  haʼekuéra ndepetéta yvýre, ndéve ha ne membykuérape oĩva ndepype, ndohejamoʼãi ni peteĩ ita ojoʼári. Ñandejára ou rupi ndehusga hag̃ua ha nde katu nderehechakuaái upéva”. 45  Upéi Jesús oike pe témplope, ha oñepyrũ omosẽ umi ombaʼevendévape, 46  ha heʼi chupekuéra: “Ñandejára Ñeʼẽme ojehai: ‘Che róga ningo peteĩ lugár oñeñemboʼe hag̃ua’, ha peẽ katu pejapo chugui mondaha raity”. 47  Káda día Jesús omboʼe pe témplope. Péro umi saserdóte ruvicha*, mboʼehára leipegua* ha umi poguasukuéra oñehaʼãmbaite ojuka chupe. 48  Péro ndoikuaái mbaʼéichapa ojapóta upéva, enterove umi hénte oĩgui Jesús jerére ha ojapysakajoa hese.

Nóta

Ehecha “Yvypóra Raʼy”, diksionário oĩva ko Bíbliape.
Haʼéva umi rréi hentekuéra.
Griégope heʼi: “diez mína”. Peteĩ kuimbaʼe ombaʼapo vaʼerã tres méserupi ogana hag̃ua peteĩ mína.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “Toñevendesi”. Ehecha “Vendisión”, diksionário oĩva ko Bíbliape.
Ehecha Informasión Oĩvéva 1.
Ehecha “Fariséo”, diksionário oĩva ko Bíbliape.
Ehecha “Saserdóte Ruvichakuéra”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.