Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 18:1-43

18  Upéi haʼe omombeʼu chupekuéra peteĩ ehémplo ohechaukáva mbaʼérepa tekotevẽ oñemboʼe meme hikuái ha ani ikaneʼõ.  Heʼi: “Peteĩ siudápe oĩ vaʼekue peteĩ hués ndokyhyjéiva Ñandejáragui ha ndorrespetáiva hapichápe.  Upe siudápe oĩ avei peteĩ viúda, ha haʼe manterei oho pe hués rendápe ha heʼi: ‘Ehechamína tojejapo chéve hustísia, ani hag̃ua pe chepleiteáva ipuʼaka cherehe’.  Heta tiémpore haʼe noipytyvõséi chupe, péro upéi heʼi ipyʼapýpe: ‘Ndakyhyjéiramo jepe Ñandejáragui ha ndarrespetái che rapichápe,  ko viúda chemolestaiterei rupi ahecháta tojejapo chupe hustísia. Upéichamante ndoumoʼãvéima manterei ojerure chéve hustísia chemonguerái peve’”.  Upévo Jesús heʼi: “¡Pehendu piko mbaʼépa heʼi ko hués, ndahekojojáiramo jepe!  ¿Ha piko Ñandejára koʼýte ndohechamoʼãi tojejapo hustísia umi haʼe oiporavo vaʼekuépe, ojerure asýva chupe ára ha pyhare? Hiʼarive haʼe ipasiénsia hesekuéra.  Che haʼe peẽme: Haʼe pyaʼeterei ohecháta tojejapo chupekuéra hustísia. Péro og̃uahẽ vove pe Yvypóra Raʼy*, ¿añetehápepa otopáta koichagua jerovia ko yvy ape ári?”.  Péro omombeʼu avei ko ehémplo umi ojeroviávape ijehe oimoʼãgui hekojojaha, ha oapoʼíva hapichakuérape: 10  “Mokõi kuimbaʼe ojupi pe témplope oñemboʼe hag̃ua, peteĩva fariséo* ha pe ótro katu impuésto kovraha. 11  Pe fariséo oñemboʼy, ha oñemboʼévo heʼi ipyʼapýpe: ‘Aagradesete ningo ndéve Ñandejára, ndajoguái haguére umi ótro kuimbaʼépe, haʼekuéra imonda, ndahekojojái, ha oporomoakãratĩ, ha ndajoguái avei pe impuésto kovrahápe. 12  Aajuna dos vése káda semána, ha ameʼẽ pe diésmo opa mbaʼe arekóvagui’. 13  Péro pe impuésto kovraha katu oñemboʼy mombyrymínte voi, ha noñanimái omaña yvágare, upéva rangue ojepytiʼanupã ha heʼi: ‘Cheporiahuverekomína Ñandejára, che ningo ajapo heta mbaʼe ivaíva’. 14  Che haʼe peẽme: Oho rire hógape, ko kuimbaʼe hekojojave Ñandejára renondépe pe fariséogui. Upévare pe oñembotuichávape, ojeapoʼíta, ha pe oñemomirĩvape katu oñembotuicháta”. 15  Upéi umi hénte ogueru umi mitãraʼy Jesús rendápe, haʼe omoĩ hag̃ua ipo hiʼarikuéra. Péro ohechávo upéva idisipulokuéra* oñemoĩ ojaʼo chupekuéra. 16  Jesús katu heʼi ojegueru hag̃ua umi mitãraʼýpe ha heʼi: “Pehejána umi mitã mimíme tou che rendápe, ha ani pejokosétei. Ñandejára Rréino ningo oñemeʼẽ koʼãichaguápe. 17  Añetehápe haʼe peẽme: Pe ndorresivíriva Ñandejára Rréino peteĩ mitãicha, ni mbaʼevéicharõ ndoikemoʼãi upépe”. 18  Upéi peteĩ mburuvicha oporandu chupe: “Mboʼehára Imbaʼeporãva, ¿mbaʼépa ajapo vaʼerã ahupyty hag̃ua jeikove opaveʼỹva?”. 19  Jesús heʼi chupe: “¿Mbaʼére piko ere chembaʼeporãha? Ñandejára añoite ningo pe imbaʼeporãva. 20  Nde reikuaa umi mandamiénto: ‘Ani reporomoakãratĩ, ani reporojuka, ani remonda, ani remopuʼã japu nde rapicháre, emombaʼe nde ru ha nde sýpe’”. 21  Upémarõ haʼe heʼi: “Koʼãva ningo che akumplipaitéma chemitã guive”. 22  Ohendúvo upéva Jesús heʼi chupe: “Tekotevẽ gueteri rejapo peteĩ mbaʼe: Evendepa nde kosakuéra ha emeʼẽ umi imboriahúvape. Upéicha reguerekóta mbaʼerepy yvágape; ha eju chemoirũ”. 23  Ohendúvo upéva haʼe oñesenti ha ombyasy, ipláta hetágui. 24  Jesús omaña hese ha heʼi: “¡Hasyetéta umi ipláta hetáva oike hag̃ua Ñandejára Rréinope! 25  Añetehápe, peteĩ kaméllo jepe ikatúne ohasa peteĩ ju ikuahárupi, péro ijetuʼuvéta upévagui peteĩ ipláta hetáva oike hag̃ua Ñandejára Rréinope”. 26  Umi ohendúva upéva heʼi: “¿Máva piko upéicharõ ikatúne ojesalva?”. 27  Jesús heʼi: “Yvyporakuéra ndaikatúiva ojapo, Ñandejára ikatu ojapo”. 28  Péro Pedro heʼi: “Ore ningo rohejapaite rorekomíva ha romoirũ”. 29  Haʼe heʼi chupekuéra: “Añetehápe haʼe peẽme: Ñandejára Rréino rehehápe oheja vaʼekue hóga, hembireko, iñermanokuéra, isy ha itúva, térã itaʼyrakuérape, 30  ko tiémpope voi chupekuéra oñemeʼẽta hetaitereive upe oheja vaʼekuégui. Ha amo gotyove* katu ohupytýta jeikove opaveʼỹva”. 31  Upéi Jesús omohaʼeño umi doce idisípulope, ha heʼi chupekuéra: “Jajupi hína Jerusalénpe, ha oñekumplipaitéta opa mbaʼe umi proféta* ohai vaʼekue pe Yvypóra Raʼy rehe. 32  Por ehémplo, oñemeʼẽta chupe umi tetã ambue poguýpe, oñembohorýta hese hikuái, otrata vaíta chupe ha ondyvúta hese. 33  Ha ombyepoti rire, ojukáta chupe, péro tres día haguépe haʼe opuʼã jeýta”. 34  Haʼekuéra katu ndopillái mbaʼépa heʼise ni peteĩ koʼã mbaʼe, oñemokañýgui chuguikuéra koʼã ñeʼẽ; ha nontendéi hikuái umi mbaʼe ojeʼe vaʼekue. 35  Upe rire, Jesús og̃uahẽmbotávo ohóvo Jericópe, oĩ peteĩ siégo oguapýva pe tape kóstare ha ombaʼejeruréva hína. 36  Haʼe ohendu umi hénte ohasaha ohóvo, ha oporandu mbaʼépa la oikóva. 37  Heʼi chupe hikuái: “¡Jesús Nazaretgua ningo ohasa ohóvo!”. 38  Upémarõ haʼe osapukái ha heʼi: “¡Jesús, David Raʼy, cheporiahuverekomína!”. 39  Ha umi ohóva tenonde ojaʼo chupe okirirĩ hag̃ua, péro haʼe hatãvéntema osapukái: “¡David Raʼy, cheporiahuverekomína!”. 40  Upémarõ Jesús opyta, ha heʼi ojegueru hag̃ua hendápe upe kuimbaʼépe. Ou rire, Jesús oporandu chupe: 41  “¿Mbaʼépa reipota ajapo nderehe?”. Haʼe heʼi: “Karai, ahechase jey ningo”. 42  Jesús heʼi chupe: “Ehecha jey katu; rejerovia rupi rekuera”. 43  Upepete ohecha jey ha oñepyrũ omoirũ chupe, ha ombotuicha Ñandejárape. Ohechávo upéva, enterove umi hénte ombotuicha avei Ñandejárape.

Nóta

Ehecha “Yvypóra Raʼy”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “pe múndo oútavape”. Ehecha “Múndo”, diksionário oĩva ko Bíbliape.
Ehecha “Profesía”, diksionário oĩva ko Bíbliape.