Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 17:1-37

17  Upérõ Jesús heʼi idisipulokuérape*: “Oĩtamante voi umi mbaʼe oporomoñepysangáva. ¡Péro tuicha hoʼa vaíta upe ojapóvape upéicha!  Iporãve vaʼerã voi oñeñapytĩramo ijajúrare peteĩ ita guasu* ha upéi ojepoi márpe, omoñepysanga rangue peteĩva koʼã michĩvévape.  Peñatendékena pendejehe. Ha ne ermáno opekáramo, emongavaju chupe. Ha oñarrepentíramo eperdona chupe.  Ofalláramo jepe nendive siete vése un díape, ha ou siete vése heʼi ndéve: ‘Añarrepenti’, reperdona vaʼerã chupe”.  Upéi umi apóstol* heʼi Jesúspe: “Orepytyvõna rojeroviave hag̃ua”.  Upévo Jesús heʼi: “Pende jerovia tuicháramo peteĩ mostása raʼỹicha, pejéta ko móra mátape: ‘¡Ejehapoʼo ha tereho eñeñotỹ pe márpe!’, ha ojapóta.  ”¿Mávapa pende apytépe oguerekóva peteĩ tembiguái oaráva hína térã oñangarekóva ijovechakuérare, heʼítava chupe ou rire ñúgui: ‘Ejúntema eguapy mesápe’?  Nahániri, ¿ajépa?, heʼíta guei chupe: ‘Ejapo chéve che senag̃ua, emoĩ ne delantál ha eñatende cherehe asenamba peve. Upe rire ág̃a nde resenáta’.  Haʼe ndoagradesemoʼãi hembiguáipe ojapo haguére hembiapo, ¿ajépa? 10  Peẽ avei upéicha, ág̃a pejapopa vove umi tembiapo oñemeʼẽ vaʼekue peẽme, peje vaʼerã: ‘Ore ningo tembiguái ndorovaléiva mbaʼeverã. Pe rojapo vaʼekue rojapónte vaʼerã voi kuri’”. 11  Haʼe oho aja Jerusalénpe, ohasa Samaria ha Galilea mbytérupi. 12  Oikévo peteĩ puévlope, ohug̃uaitĩ chupe diez lepróso, péro haʼekuéra opytánte oñemboʼy mombyrymi chugui, 13  ha osapukái: “¡Jesús, Mboʼehára, oreporiahuverekomína!”. 14  Haʼe ohechávo chupekuéra heʼi: “Tapeho pejechauka umi saserdótepe*”. Ha ohokuévo, okueráma hikuái. 15  Ohechakuaávo okueramaha, peteĩva ojevy ha sapukaihápe ombotuicha Ñandejárape. 16  Haʼe ou oñesũ ha oñakãity Jesús renondépe, ha oagradese chupe. Hiʼarive upe kuimbaʼe samaritáno. 17  Jesús katu ombohovái: “¿Noñemonguerái piko raʼe diez kuimbaʼépe? ¿Moõ piko upéicharõ oime umi nueve? 18  ¿Ko kuimbaʼe tetã ambuegua añoite piko ojevy ombotuicha hag̃ua Ñandejárape?”. 19  Upéi heʼi chupe: “Epuʼã katu ha tereho, rejerovia rupi rekuera”. 20  Peteĩ jey umi fariséo* oporandu chupe arakaʼépa oúta Ñandejára Rréino. Haʼe ombohovái chupekuéra: “Ñandejára Rréino ou vove, ndahaʼemoʼãi enterove ohechakuaátava. 21  Ndaiporimoʼãi heʼíva: ‘¡Pemañami, koʼápe oĩ!’, térã: ‘¡Pemañami, namoite hína!’. Ñandejára Rréino oĩ hína pende apytépe”. 22  Upéi heʼi idisipulokuérape: “Og̃uahẽta umi ára peẽ pehechasetaha peteĩ jepe pe Yvypóra Raʼy* ára, péro ndapehechamoʼãi. 23  Ha umi hénte heʼíta peẽme: ‘¡Pemañami, namoite hína!’, térã: ‘¡Pemañami, koʼápe oĩ!’. Aníke pesẽ ni peho hapykuerikuéra. 24  Pe aratiri ohesapeháicha pe yvága, peteĩ púnta guive ótro púnta peve, upéichata avei pe Yvypóra Raʼy. 25  Péro tenonderã haʼe heta ohasa asy vaʼerã ha umi hénte oikóva ko tiémpope* omboykéta chupe. 26  Oiko haguéicha Noé tiémpope, upéichata avei pe Yvypóra Raʼy tiémpope. 27  Upérõ umi hénte okaru ha omboyʼu; kuimbaʼe ha kuñanguéra omendajoa, Noé oike peve pe árkape*, ha upéi ou pe ama guasu ha ohundipaite chupekuéra. 28  Upéicha avei, oiko haguéicha Lot tiémpope, upérõ umi hénte okaru, omboyʼu, ojogua, ovende, oñemitỹ ha ojogapo. 29  Péro Lot osẽrõ guare Sodómagui, hoʼa yvágagui tatarendy asúfre reheve, ha ohundipaite chupekuéra. 30  Upéichata avei pe ára Yvypóra Raʼy ojechauka vove umi héntepe. 31  ”Upe árape, pe oĩva hína terrásape aníkena oguejy ombyaty ikosakuéra oĩva kotýpe. Upéicha avei pe oĩva hína ñúme ani ojevy ikosakuéra piári. 32  Penemanduʼákena Lot rembirekóre. 33  Oimeraẽ hakateʼỹva hekovére* omanóta, ha pe omeʼẽva hekove* katu oikovéta. 34  Che haʼe peẽme, upe pyharépe oĩta mokõi oñenóva peteĩ tupápe; peteĩva ojegueraháta ha pe ótro ojeheja reíta. 35  Oĩta avei mokõi kuña omolináva hína oñondive peteĩ molínope; peteĩva ojegueraháta ha pe ótra ojeheja reíta”. 36 * —— 37  Upémarõ oporandu chupe hikuái: “¿Moõ piko ore Ruvicha?”. Haʼe heʼi chupekuéra: “Pe teʼongue oĩháme, upépe avei ijatýta umi ágila”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Yma ojeporu ita guasu oñemolina hag̃ua trígo, ha peteĩ vúrro ombojere umichagua molíno.
Ehecha “Apóstol”, diksionário oĩva ko Bíbliape.
Ehecha “Saserdóte”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Ehecha “Umi Hénte Oikóva ko Tiémpope”, diksionário oĩva ko Bíbliape.
Térã: “káha”. Kóva haʼe vaʼekue peteĩ várko guasu ojoguáva káhape.
Griégope heʼi: “hiʼálmare”. Ehecha “Álma”, Informasión Oĩvéva 7A-pe.
Griégope heʼi: “hiʼálma”.
Oĩ traduksión omoĩva ko versíkulo, péro heta manuskríto griégo yma guare iñimportánteva nomoĩri.