Ehecha oĩva pype

Ehecha oĩva pype

Lucas 16:1-31

16  Upe rire Jesús heʼi idisipulokuérape*: “Oĩ peteĩ kuimbaʼe ipláta hetáva ha oguereko peteĩ tembiguái*. Upéi oñemboja pe tembiguáire oiporu vaiha oikóvo umi mbaʼerepy.  Upémarõ ohenói chupe ha heʼi: ‘¿Mbaʼe piko la ojeʼéva nderehe? Emoĩ chéve kuatiáre mbaʼéichapa reiporu raʼe che pláta, cháke ndereguerekomoʼãvéima che róga nde poguýpe’.  Upémarõ pe tembiguái heʼi ipyʼapýpe: ‘Mbaʼéiko la ajapomítava, che patrón ningo chemosẽtama. Chéko chekangýma akaʼapi hag̃ua, ha atĩete aiko hag̃ua ambaʼejerure pérupi.  ¡Hẽe!, aikuaáma mbaʼépa ajapóta ikatu hag̃uáicha oĩ cherresivíva hógape, ág̃a añemosẽ vove che traváhogui’.  Upémarõ ohenoika peteĩteĩme umi odevéva ipatrónpe. Ha oporandu pe tenondeguápe: ‘¿Mboy piko nde redeve che patrónpe?’.  Heʼi chupe: ‘Adeve dos mil doscientos lítro aséite de olíva’. Haʼe katu heʼi chupe: ‘Ejagarra nde pagare, eguapy ha pyaʼe porã emoĩ mil cien’.  Upéi heʼi ótrope: ‘¿Ha ndépa mboy redeve?’. Haʼe heʼi: ‘Adeve cien vólsa* de trígo’. Haʼe heʼi chupe: ‘Ejagarra nde pagare ha emoĩ ochenta’.  Ohechávo mbaʼéichapa iletrádo, pe patrón oguerohory hembiguáipe, jepe haʼe ndahekojojái. Péicha haʼe peẽme umi hénte ko mundopegua* iletradove rupi Ñandejára siervokuéragui* otratea jave hapichakuérandi*.  ”Che haʼe avei peẽme: Peiporu umi mbaʼerepy oĩva ko múndope pekonsegi hag̃ua pene amigorã. Upéicharõ, opa vove umi mbaʼerepy, pene amigokuéra penderresivíta umi óga arakaʼeve noñehundimoʼãivape. 10  Pe tapicha ojapóva hekoitépe umi mbaʼe michĩvéva, ojapo hekoitépe avei umi mbaʼe tuichavéva. Ha pe tapicha ipokarẽva umi mbaʼe michĩvévape, ipokarẽ avei umi mbaʼe tuichavévape. 11  Upévare, peẽ ndapehechaukáiramo ikatuha ojejerovia penderehe peiporúvo umi mbaʼerepy ko mundopegua, ¿máva piko ohejáta pende kárgope umi mbaʼerepy teetéva? 12  Ha peẽ ndapehechaukáiramo ikatuha ojejerovia penderehe peiporúvo mbaʼe ahéno, ¿máva piko omeʼẽta peẽme umi penembaʼerãva? 13  Peteĩ tembiguái ndaikatúi ombaʼapo mokõi patrónpe g̃uarã. Peteĩme ohayhúta ha pe ótrore ndaijaʼemoʼãi, peteĩre ojepokuaavéta ha pe ótrope omboykéta. Upéicha avei peẽ ndaikatúi peiko Ñandejára rembiguáirõ ha peiko avei pláta rapykuéri”. 14  Umi fariséo* iplatarayhueterei, upévare ohendúvo opa koʼã mbaʼe, oñembohory hese. 15  Upémarõ haʼe heʼi chupekuéra: “Peẽ peiko peje pendejehe penderekojojaha kuimbaʼekuéra renondépe. Péro Ñandejára oikuaa pende pyʼapy. Umi kuimbaʼekuéra apytépe oñembotuicháva, umíva Ñandejárape ombojeguaru. 16  ”Pe Léi* ha umi Profetakuéra* ojekuaauka Juan peve. Upe guive oñemombeʼu umi marandu porã* oñeʼẽva Ñandejára Rréinore, ha opaichagua tapicha oñehaʼãmbaite ohupyty hag̃ua upéva. 17  Añetehápe, pe yvága ha yvy ikatu ohasa, péro ndopytareimoʼãi oñekumpliʼỹre ni pe párte michĩvéva oĩva pe Léipe. 18  ”Entéro ojedivorsiáva hembirekógui ha omenda jey ótrare, oporomoakãratĩ hína. Ha pe omendáva peteĩ kuña ojedivorsia vaʼekuére, oporomoakãratĩ avei hína. 19  ”Oĩ vaʼekue peteĩ karai ipláta hetáva, omondéva ao pytãhũ ha líno, ha koʼẽ koʼẽre ovyʼa umi mbaʼe porãita apytépe. 20  Pe hóga rokẽme katu oñemoĩva jepi peteĩ karai mboriahumi*, ikurupáva, hérava Lázaro. 21  Haʼe anga hoʼuse asy umi tembiʼu hoʼáva pe karai ipláta hetáva meságui. Ha umi jagua jepe ou oheréi chugui pe ikuruha. 22  Upéi omano pe karai mboriahumi, ha umi ánhel ogueraha chupe oguapy hag̃ua Abrahán ykére*. ”Ha omano avei pe karai ipláta hetáva ha oñeñotỹ. 23  Ha umi omanóva oĩháme* ohasa asyeterei jave, omaña yvate gotyo ha ohecha mombyry guive Abrahánpe, ha Lázaro oguapyha ijykére. 24  Upévo oñemoĩ osapukái ha heʼi: ‘Che ru Abrahán cheporiahuverekomína, ha emondo Lázarope tomyakỹ pe ikuã púnta ýpe, ha tomoheʼõmi chéve che kũ, chepiroʼymi hag̃ua. Ahasa asyeterei ningo ko tatarendýpe’. 25  Péro Abrahán heʼi chupe: ‘Che raʼy, nemanduʼákena nerenyhẽ hague mbaʼe porãgui reikove aja, Lázaro katu heta ohasa asy vaʼekue. Koʼág̃a haʼe ovyʼa koʼápe, ha ndehaitéma rehasa asy. 26  Ha hiʼarive oĩ peteĩ yvykua ipypukuetereíva ñane paʼũme, ha upéicha rupi umi ohasaséva koʼáguio upépe, térã upéguio koʼápe ndaikatúi’. 27  Upévo heʼi: ‘Upéicharõ che Ru, emondomína chupe che túva rógape, 28  oavisa hag̃ua umi cinco che ermánope, ani ou koʼápe ohasa asy avei hikuái’. 29  Abrahán katu heʼi chupe: ‘Haʼekuéra oreko Moisés ha umi Proféta ohai vaʼekue, tohendúna umívape’. 30  Upémarõ haʼe heʼi: ‘Nahániri katu che ru Abrahán, péro ohóramo hendapekuéra peteĩ opuʼã jey vaʼekue omanóva apytégui, oñarrepentíta* hikuái’. 31  Haʼe katu heʼi chupe: ‘Nohendúiramo hikuái Moisés ni umi Profétape, ndogueroviamoʼãi ni oĩrõ opuʼã jeýva omano vaʼekue apytégui’”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “majordómo”, ehecha diksionário oĩva ko Bíbliape.
Peteĩ vólsa oreko ciento setenta kílo.
Ehecha “Múndo”, diksionário oĩva ko Bíbliape.
Griégope heʼi: “umi mbaʼerendy raʼykuéragui”.
Griégope heʼi: “generación”. Ehecha “Umi Hénte Oikóva ko Tiémpope”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ko kuimbaʼe ombaʼejerure umi héntepe.
Griégope heʼi: “Abrahán pytiʼa ykére”. Upéva heʼise oĩ porãha hendive.
Griégope heʼi: “Hades”, ehecha Informasión Oĩvéva 8.
Ehecha “Arrepentimiénto”, diksionário oĩva ko Bíbliape.