Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 13:1-35

13  Upérõ umi oĩva upépe omombeʼu Jesúspe Pilato ojuka hague umi galiléope, oikuaveʼẽrõ guare hikuái sakrifísio Ñandejárape.  Haʼe ombohovái chupekuéra: “¿Peẽ piko peimoʼã oikoha hesekuéra upéva iñañave haguére entéro umi ótro galiléogui?  Nahániri. Añetehápe haʼe peẽme, napeñarrepentíriramo* enterove peẽ upéicha avei peñehundíta.  ¿Térãpa peimoʼã avei umi dieciocho omano vaʼekue, hoʼárõ guare hiʼarikuéra pe tórre oĩva Siloámpe, hetaveha ipekádo* entéro umi Jerusalénpe oikóvagui?  Nahániri. Añetehápe haʼe peẽme, napeñarrepentíriramo, enterove peẽ upéicha avei peñehundíta”.  Upéi Jesús omoĩ peteĩ ehémplo: “Peteĩ kuimbaʼe oguereko iparraltýpe peteĩ ígo máta, upéi ou ohecha hiʼámapa, péro ndotopái mbaʼeve.  Upémarõ heʼi pe parraltýpe ombaʼapóvape: ‘Tres añoháma aju ahecha hiʼámapa ko ígo, ha ndatopái mbaʼevete hese. ¡Eikytĩ ñandéve! Maʼerã piko ahejáta ombyai rei ko yvy’.  Haʼe ombohovái chupe: ‘Che patrón, ehejamína avei ko áñope, tajoʼo pe imáta jerére ha tamoĩ chupe avóno.  Ha upe rire hiʼáramo, oĩ porã, péro ndahiʼái jeýramo reikytĩta’”. 10  Upe rire peteĩ sábadope* Jesús oporomboʼe hína peteĩ sinagógape*. 11  Ha oĩ upépe peteĩ kuña dieciocho áñorema hasýva, peteĩ demónio* káusare. Haʼe oiko ikarapãhápe ha ni mbaʼevéicharõ ndaikatuvéi oñemboʼy porã. 12  Ohechávo pe kuñáme, Jesús heʼi chupe: “Koʼág̃a repytuʼúma ne mbaʼasýgui”. 13  Ha haʼe omoĩ ipo hiʼári, ha upepete pe kuña oñemboʼy porã, ha oñepyrũ ombotuicha Ñandejárape. 14  Upévo pe mburuvicha sinagogapegua ipochyeterei, Jesús omonguera haguére pe kuñáme sábadope. Ha oñepyrũ heʼi umi héntepe: “Jaguereko ningo seis día ñambaʼapo hag̃ua, umi díape peju vaʼerã pekuera hag̃ua, péro ani peju sabadokue”. 15  Upémarõ Jesús heʼi: “Peẽ tekove rovamokõi. ¿Peẽ piko ndapejorái pene rymba tóro ha pene rymba vúrro, ha pegueraha pemboyʼu sabadokue? 16  Ko kuña ningo Abrahán familiare ha Satanás* oguereko chupe dieciocho áñorema ñapytĩháme. ¿Mbaʼégui piko upéicharõ ndovalemoʼãi ñamosãso chupe sábadope?”. 17  Heʼipa rire Jesús koʼã mbaʼe, umi oñemoĩva hese otĩeterei opytávo. Péro enterove umi hénte ovyʼaiterei umi mbaʼe porãita haʼe ojapóvare. 18  Upévo haʼe heʼive chupekuéra: “¿Mbaʼépepa ojogua Ñandejára Rréino, ha mbaʼérehepa ambojojáta? 19  Ojogua ningo peteĩ mostása raʼỹime, peteĩ kuimbaʼe ojagarráva oñotỹ ihardínpe. Upéi okakuaa, oiko chugui peteĩ yvyramáta ha umi guyra yvagapegua ojaitypo hakãre”. 20  Upéi heʼi jey: “¿Mbaʼérehepa ikatu ambojoja Ñandejára Rréino? 21  Ojogua pe levadúrape, peteĩ kuña ombojeheʼáva* diez kílo arínare pe mása kompletoite ovu peve”. 22  Ohokuévo Jerusalén gotyo, Jesús ohasa entéro umi siuda ha puévlorupi, ha omboʼe umi héntepe. 23  Upérõ peteĩ kuimbaʼe heʼi chupe: “Che Ruvicha, ¿añetehápe piko saʼi oĩta la ojesalváva?”. Haʼe heʼi chupekuéra: 24  “Peñehaʼãmbaitéke peike pe okẽ poʼírupi, cháke che haʼe peẽme, heta oĩta upéi oikeséva péro ndaikatumoʼãi oike. 25  Pe ogajára opuʼã vove ha otranka hokẽ, peẽ pepytáta peñemboʼy okápe ha peñepyrũta pembota pe okẽ, ha peje: ‘Karai, eavrimína oréve’. Péro haʼe ombohováita peẽme: ‘Ndaikuaái moõguápa peẽ’. 26  Peẽ katu peñepyrũta peje chupe: ‘Ore rokaru ha romboyʼu kuri ne renondépe, ha nde reporomboʼe kuri umi tape guasu oĩvare ore siudápe’. 27  Péro haʼe oñeʼẽta ha heʼíta peẽme: ‘Che ndaikuaái moõguápa peẽ. ¡Tapeho koʼágui, peẽ mbaʼe vai apoha!’. 28  Upérõ penerasẽ soro ha penepyahẽta ñembyasýgui pehechávo Abrahán, Isaac, Jacob ha entéro umi profétape* Ñandejára Rréinope. Ha peẽ katu pepytáta okápe. 29  Oúta avei heta hénte kuarahyresẽ ha kuarahyreikéguio, nórte ha súrguio, oguapy hag̃ua mesápe Ñandejára Rréinope. 30  Ha oĩ umi itapykuéva opytátava tenonde, ha oĩ umi tenonde oĩva opytátava tapykuépe”. 31  Upérõ ou hendápe umi fariséo* ha heʼi chupe: “Esẽ tereho koʼágui, cháke Herodes ndejukase”. 32  Jesús heʼi chupekuéra: “Herodes ningo iletradove aguaraʼígui. Tapehóna peje chupe: ‘Amosẽ umi demónio, amonguera hasývape, ajapo koʼã mbaʼe koestedía, ajapóta koʼẽrõ, ha tres día haguépe ajapopáta che rembiapo’. 33  Péro asegi vaʼerã che rape, koestedía, koʼẽrõ ha koʼẽambuérõ, ndovaléi ningo peteĩ proféta ojejuka Jerusalén okárape. 34  Jerusalén, Jerusalén, rejukáva umi proféta ha rejapíva itápe umi Ñandejára remimboúpe..., ¡hetaite ningo añehaʼã ambyaty ne membykuéra, pe ryguasu ombyatyháicha imembykuéra ipepo guýpe! Péro peẽ ndapeipotái. 35  ¡Péina! Pende róga ojeheja reíma peẽme. Ha peẽ ni mbaʼevéicharõ ndacherechamoʼãvéima peje peve: ‘¡Tojehovasa* pe oúva Jehová* rérape!’”.

Nóta

Ehecha “Arrepentimiénto”, diksionário oĩva ko Bíbliape.
Griégope heʼi: “odeve hetaveha”.
Ehecha “Sábado”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Griégope heʼi: “omokañýva”.
Ehecha “Profesía”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Térã: “Toñevendesi”. Ehecha “Vendisión”, diksionário oĩva ko Bíbliape.
Ehecha Informasión Oĩvéva 1.