Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 12:1-59

12  Upérõ hetaitereivéntema umi hénte ijaty, ha opyrũmba ojuehe. Jesús katu oñepyrũ heʼi idisipulokuérape*: “Peñeñangarekóke umi fariséo* levadúragui, upéva hína tovamokõi.  Ndaipóri hína mbaʼeve oñeñomi porãva ikatuʼỹ vaʼerã upe rire ojehecha, térã oñemokañýva ikatuʼỹ vaʼerã upe rire ojekuaa.  Upévare, umi mbaʼe pejéva pytũmbýpe, oñehendúta hesakãháme. Ha pejéva mbeguemi koty ñembotypýpe, oñemombeʼúta terrása guive.  Haʼéta avei peẽme che amigokuéra: Ani pekyhyje umi ikatúvagui pendejuka, ha upéi ndaikatuvéima ojapo mbaʼeve.  Che ahechaukáta peẽme mávaguipa pekyhyje vaʼerã: Pekyhyje upe orekóvagui autorida penemombo hag̃ua Gehénape* pendejuka rire. Che haʼe peẽme, Upévagui la pekyhyje vaʼerã.  Oñevende ningo cinco gorrión mokõi monéda saʼieterei ovalévare, ¿ajépa? Upéicharamo jepe Ñandejára ndahesaráiri ni peteĩvagui.  Péro pene akãrague jepe haʼe oipapapaite. Ani pekyhyje, peẽ pevaleve hína heta gorrióngui.  ”Haʼéta avei peẽme: Enterove omombeʼúva kuimbaʼekuéra renondépe haʼeha che disípulo, che avei amombeʼúta Ñandejára anhelkuéra renondépe upe kuimbaʼe haʼeha che disípulo.  Péro pe onegáva chekuaaha kuimbaʼekuéra renondépe, che avei anegáta chupe Ñandejára anhelkuéra renondépe. 10  Ha oĩro oñeʼẽ vaíva pe Yvypóra Raʼy* rehe, oñeperdonáta chupe, pe otakýva* espíritu sántore* katu noñeperdonamoʼãi. 11  Péro pendegueraha jave hikuái umi aty guasu renondépe, térã umi mburuvicha ha autorida renondépe, ani pejepyʼapy ndapeikuaáirõ g̃uarã mbaʼépa pejéta peñedefende hag̃ua térã mbaʼéichapa peñeʼẽta. 12  Upe jave, pe espíritu sánto penemboʼéta umi mbaʼe peje vaʼerã”. 13  Upéi pe hénte apytégui peteĩ osẽ heʼi chupe: “Mboʼehára, eremína che ermánope tombojaʼo chéve umi mbaʼe oheja vaʼekue oréve ore ru”. 14  Haʼe heʼi chupe: “¿Máva piko chemoĩ huésramo pende apytépe? ¿Mbaʼére piko che ambojaʼóta peẽme?”. 15  Upémarõ heʼi chupekuéra: “Peñatende porãke ha ani pendetaryrýi mbaʼevére. Peguerekóramo jepe heta mbaʼe, pende rekove nodependéi hína umi mbaʼe peguerekóva rehe”. 16  Upéi omombeʼu chupekuéra peteĩ ehémplo: “Peteĩ karai ipláta hetávape osẽ porãiterei ikosécha. 17  Upémarõ oñepyrũ heʼi ipyʼapýpe: ‘¿Mbaʼéiko la ajapomítava? Ndarekói moõpa ambyatypáta che kóga’. 18  Upéi heʼi: ‘Aikuaáma mbaʼépa ajapóta, aitypáta koʼã che galponkuéra* ha amopuʼãta tuichavéva, ha upépe ambyatypáta che trígo ha opa mbaʼe porã arekóva. 19  Upe rire haʼéta chejupe*: “Koʼág̃a aguerekóma* heta mbaʼe porã iñongatupy, aiporu hag̃ua heta áñore. Ikatúma pyʼaguapýpe akaru, amboyʼu ha avyʼa”’. 20  Ñandejára katu heʼi chupe: ‘Aje piko ndevyroite, ko pyharépe ojepeʼáta ndehegui nde rekove*. ¿Mávapepa opytapáta upéicharõ umi mbaʼeta rembyaty vaʼekue?’. 21  Péicha oiko umi ombyatývare mbaʼerepy ijupe g̃uarã, péro imboriahúva Ñandejára renondépe”. 22  Upéi Jesús heʼi idisipulokuérape: “Upévare haʼe peẽme: Anive pejepyʼapyeterei pendejehe*, peikuaaségui mbaʼépa pekarúta, térã mbaʼépa pemondéta. 23  Pende rekove* ningo ovaleve tembiʼúgui ha pende rete ovaleve aógui. 24  Pemañamíntena umi yryvu rehe, haʼekuéra noñemitỹi ha nomonoʼõi. Ndoguerekói galpón ni sílo, péro Ñandejára omongaru chupekuéra. ¡Peẽngo koʼýte pevaleve hína umi guyrágui! 25  ¿Máva piko pende apytépe ojepyʼapyeterei rupi ikatúta ombopukumieve hekove? 26  Ha ndaikatúiramo ni upéva jepe pejapo, ¿maʼerã piko upéicharõ pejepyʼapýta umi ótra kósare? 27  Pemañamíntena umi líriore, mbaʼéichapa okakuaa, haʼekuéra nombaʼapói ni ndojapói ijaorã. Péro che haʼe peẽme: ni Salomón haʼéramo guare pe mburuvicha iplatavéva, noñemondéi vaʼekue haʼekuéraicha. 28  Ñandejára péicha omondéramo umi ñana okakuaáva ñúre, koestedía oĩva koʼápe ha koʼẽrõ ojepoíva tatakuápe, ¿mbaʼéicha piko pejeroviaʼiete ha ndapehechakuaái koʼytevéntema haʼe omeʼẽtaha peẽme pende aorã? 29  Upévare, anive pendepyʼatarova ha peheka mbaʼépa peʼúta, térã pemboyʼúta, ha anive pejepyʼapyeterei. 30  Koʼã mbaʼe rapykuéri ningo oiko tarovaite umi hénte oĩva ko múndope*. Péro pende Ru oikuaa voi peẽ peikotevẽha koʼã mbaʼe. 31  Pemotenonde meme katu Irréino, ha koʼã mbaʼe oñemeʼẽta avei peẽme. 32  ”Ani pekyhyje, peẽ che ovechakuéra mbovymi, pende Ru odesidíma omeʼẽtaha peẽme pe Rréino. 33  Pevende pende kosakuéra ha peipytyvõ umi imboriahúvape peiporiahuverekógui chupekuéra. Pejapo vosa ikatuʼỹva osoro pláta ryrurã, kóva hína mbaʼerepy yvágape ndopamoʼãiva arakaʼeve. Upépe ningo ndaikatúi oike mondaha ni ndoʼumoʼãi pendehegui vícho. 34  Cháke pene mbaʼerepy oĩháme, upépe avei oĩta pene korasõ. 35  ”Peñemonde, pejeprepara ha pemyendy pene lámpara. 36  Peime vaʼerã oĩháicha umi kuimbaʼe ohaʼarõva ipatrónpe og̃uahẽ kasamientohágui. Ikatu hag̃uáicha haʼe ombotávo pe okẽ, pyaʼeterei oavri chupe hikuái. 37  ¡Ovyʼa vaʼerã umi tembiguái, og̃uahẽrõ ipatrón ha otopa hesekuéra oñatendeha hína! Añetehápe haʼe peẽme: Haʼe omoĩta idelantál, omboguapýta mesápe umi tembiguáipe ha oservíta chupekuéra. 38  Ha og̃uahẽrõ tárdema pyhare, térã las doce riréma, ha otopa chupekuéra péicha, ¡ovyʼa vaʼerã hikuái! 39  Haʼemíta peẽme: Pe ogajára oikuaárire mbaʼe oraitépa oúta pe mondaha, ndokéi vaʼerãmoʼã ha ndohejái vaʼerãmoʼã pe mondaha oike hógape. 40  Peẽ avei, akóinteke pejeprepara, cháke peteĩ óra peimoʼãʼỹve jave oúta pe Yvypóra Raʼy”. 41  Upévo Pedro heʼi chupe: “Che Ruvicha, ¿oréve g̃uarãnte piko remoĩ ko ehémplo, térãpa enterovépe g̃uarã?”. 42  Jesús katu heʼi chupe: “¿Mávapa hína pe tembiguái* jeroviaha ha iñarandúva, pe Ijára omoĩtava oñangareko hag̃ua hogayguakuérare, omeʼẽ hag̃ua chupekuéra hembiʼurã hiʼoraitépe? 43  ¡Ovyʼaite upe tembiguái, og̃uahẽrõ pe Ijára ha otopa hese ojapoha hína upéicha! 44  Añetehápe haʼe peẽme: Opa mbaʼe orekóva omoĩta ipoguýpe. 45  Péro pe tembiguái oñepyrũramo heʼi ipyʼapýpe: ‘Che jára ndoumoʼãi gueteri’, ha oñepyrũramo ombyepoti umi ótro tembiguáipe, kuimbaʼe ha kuñáva, avei okaru, omboyʼu ha okaʼu, 46  upéi peteĩ día ha peteĩ óra haʼe oimoʼãʼỹve jave oúta Ijára, okastiga pohýita upe tembiguáipe ha omombóta chupe umi ojeroviaʼỹva oĩháme. 47  Upéicharõ, pe tembiguái oikuaa porãva ijára rembipota, péro ndojepreparái ni ndojapói pe haʼe heʼi vaʼekue chupe, hetaiterei oipoʼóta. 48  Péro pe nontendéi vaʼekue ojeʼéva chupe, ha upévaguinte ojapo ojapoʼỹ vaʼerã, saʼive oñenupãta. Pe oñemeʼẽ hetávape, heta avei ojejeruréta. Ha pe oñemoĩva ipoguýpe heta mbaʼe, pévandi ojejopyvéta. 49  ”Che aju amyendy hag̃ua tata ko yvy ape ári. Ha hendýma ningo, ¿mbaʼe piko aipotave upévagui? 50  Añetehápe, ahasa vaʼerã gueteri peteĩ vautísmo* rehe, ha ajepyʼapyeterei og̃uahẽ meve huʼãme. 51  ¿Peẽ piko peimoʼã aju hague amoĩ hag̃ua pyʼaguapy ko yvy ape ári? Ndaupeichaiete hína, agueru guei joavy. 52  Koʼág̃a guive, peteĩ ógape oĩrõ cinco, mbohapy oiko vaíta mokõi ndive ha mokõi oiko vaíta mbohapy ndive. 53  Túva oiko vaíta taʼýrandi, ha taʼýra itúva ndive. Sy oiko vaíta imembykuña ndive, ha imembykuña isy ndive. Suégra oiko vaíta inuérandi, ha nuéra isuégra ndive”. 54  Upéi Jesús heʼi avei umi héntepe: “Peẽ pehecha jave opuʼã pe arai poniénteguio, pejéma: ‘Ou hína peteĩ torménta’, ha upeichaite oiko. 55  Ha pehechávo oipeju viénto sur* katu peje: ‘Hakuetereíta hína’, ha upéicha oiko. 56  Peẽ tekove rovamokõi, pemañávo pe ára rehe, peikuaáma tiémpo vaítapa, térãpa tiémpo porãta. Upéicharõ, ¿mbaʼéicha piko ndapehechakuaái mbaʼépa heʼise umi mbaʼe oikóva koʼág̃a? 57  ¿Mbaʼére piko pendejehegui voi ndapedesidíri mbaʼépa oĩ porã? 58  Por ehémplo, reho jave peteĩ nedemandávandi mburuvicha rendápe, eñehaʼã eiko porã jey hendive tapére. Ani hag̃ua arakaʼeve nemeʼẽ huéspe, ha pe hués nemeʼẽ pe guárdiape, ha pe guárdia ndegueraha kárselpe. 59  Che haʼe ndéve, ni mbaʼevéicharõ neresẽichéne upégui, repagapa peve pe pláta* redevéva”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Fariséo”, diksionário oĩva ko Bíbliape.
Ehecha “Gehena”, Informasión Oĩvéva 9-pe.
Ehecha “Yvypóra Raʼy”, diksionário oĩva ko Bíbliape.
Ehecha “Blasfemia”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “sílo”.
Griégope heʼi: “che álmape”. Ehecha “Álma”, Informasión Oĩvéva 7A-pe.
Griégope heʼi: “che álma oguerekóma”.
Griégope heʼi: “ne álma”.
Griégope heʼi: “pene álma rehe”.
Griégope heʼi: “Pene álma”.
Ehecha “Múndo”, diksionário oĩva ko Bíbliape.
Térã: “majordómo”, ehecha diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Israélpe viénto sur jave haku.
Griégope heʼi: “peteĩ kuadránte”. Péva haʼe vaʼekue peteĩ monéda saʼieterei ovaléva.