Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Lucas 11:1-54

11  Peteĩ jey, Jesús oñemboʼe hína peteĩ lugárpe, ha oñemboʼepávo peteĩ idisípulo* heʼi chupe: “Che Ruvicha, oremboʼemína mbaʼéichapa roñemboʼe vaʼerã, Juan omboʼe haguéicha avei idisipulokuérape”.  Upémarõ, haʼe heʼi chupekuéra: “Peñemboʼe jave, peje vaʼerã: ‘Ore Ru, toñemomarangatu nde réra. Tou ne Rréino.  Emeʼẽna oréve ore rembiʼurãmi* roikotevẽva koestediarã.  Eperdonamína oréve ore pekádo, ore roperdonaháicha avei umi odevévape oréve. Ha ani reheja roʼa mbaʼe vaípe’”.  Avei heʼi chupekuéra: “Ñamoĩ chupe peteĩva peẽ perekoha pene amígo ha peho hendápe pyharepyte ha peje chupe: ‘Chamígo, emeʼẽmína chéve mbohapy pan,  angete ningo og̃uahẽ peteĩ che amígo oúva mombyrýgui ha ndarekói mbaʼevete ameʼẽ vaʼerã chupe’.  Péro haʼe ombohovái ikoty guive: ‘Anivéna chemolesta, atrankapáma che rokẽ ha mitãnguéra okepáma chendive tupápe. Ndaikatumoʼãi apuʼã ameʼẽ ndéve mbaʼeve’.  Che haʼe peẽme: Nopuʼãiramo jepe omeʼẽ chupe iñamígo haguére, añetehápe ohechávo mbaʼéichapa ojerure jey jey tovaʼatãme, opuʼãta omeʼẽ chupe umi mbaʼe oikotevẽva.  Upévare haʼe peẽme: Pejerure jey jeýkena, ha oñemeʼẽta peẽme; peheka meme, ha petopáta; pesegi pembota pe okẽ, ha ojavríta peẽme. 10  Entéro ojerurévape oñemeʼẽ, entéro ohekáva ojuhu, ha entéro ombotávape ojavríta. 11  Añetehápe, ¿oĩne piko túva, itaʼýra ojeruréramo pira, omeʼẽtava chupe mbói, pira rangue? 12  Térã ojerurérõ peteĩ ryguasu rupiʼa, ¿omeʼẽtapa chupe alakrán? 13  Upéicharõ, peẽ peneñañáramo jepe pemeʼẽ rregálo iporãva pende raʼykuérape, ¡koʼytevéntema pende Ru yvagapegua omeʼẽta espíritu sánto* umi ojerurévape chupe!”. 14  Upéi haʼe omosẽ peteĩ demónio* omoñeʼẽngúva peteĩ kuimbaʼépe, ha upe rire pe iñeʼẽngu vaʼekue oñepyrũ oñeʼẽ. Umi hénte katu oponderajoa upéva. 15  Péro ijapytepekuéra oĩ heʼíva: “Haʼe ningo omosẽ umi demóniope oipytyvõgui chupe Beelzebub*, umi demónio ruvicha”. 16  Ótro katu, otantea hag̃ua Jesúspe ojerure chupe ojapo hag̃ua peteĩ milágro Ñandejára rérape. 17  Haʼe katu oikuaágui mbaʼépa opensa hikuái, heʼi: “Peteĩ goviérno hoʼáta umi hénte oiko vaipáramo oñondive. Ha umi hénte oĩva peteĩ ógape, ndohopukumoʼãi opuʼãmbárõ oñoakãre. 18  Upéicha avei, Satanás* opuʼãramo ijehe voi, ¿mbaʼéicha piko upéicharõ igoviérno oho pukúta? Peẽngo peje Beelzebub rupive che amosẽha umi demónio. 19  Ha oiméramo añete la Beelzebub rupive amosẽ umi demónio, ¿máva rupive piko upéicharõ pende disipulokuéra omosẽ umi demóniope? Upévare pende disipulokuéra ohechaukáta peẽ pejavyha. 20  Péro che amosẽramo umi demóniope Ñandejára po* rupive, upéicharõ katu añetehápe Ñandejára Rréino penderupytýma. 21  Peteĩ kuimbaʼe imbaretéva ha orekóva heta árma oñangarekóramo hógare, avave nomondamoʼãi chugui ikosakuéra. 22  Péro oúramo peteĩ imbaretevéva upe kuimbaʼégui, ipuʼaka hese, ha oipeʼa chugui hiʼárma haʼe ojeroviaha, ogueraháta chugui ikosakuéra ha upéi omeʼẽmbáta ótrope. 23  Pe noĩriva chendive, opuʼã cherehe, ha pe nombyatýiva chendive, omosarambi. 24  ”Peteĩ demónio osẽvo peteĩ kuimbaʼégui, ohasa desiértore ohekávo opytuʼu hag̃ua. Ha ndojuhúimaramo, heʼi: ‘Aha jeýta che rogakuépe’. 25  Og̃uahẽ jeývo pe ógape, otopa ojetypei ha oñemoporãmbaite hague. 26  Upémaramo oho jey hapére ha ogueru hendive siete demónio iñañave jeýva chugui, ha oike rire, opyta oiko hikuái upépe. Ha ipahápe pe kuimbaʼe opyta vaive yma guarégui”. 27  Jesús oñeʼẽ aja hína, pe hénte apytégui osẽ peteĩ kuña ha hatã heʼi: “¡Ajépa ovyʼaiténe pe kuña ndereko vaʼekue hetepýpe ha nemokambu vaʼekue!”. 28  Haʼe katu heʼi: “Nahániri, ovyʼa guei umi ohendúva Ñandejára Ñeʼẽ ha ojapóva”. 29  Umi hénte ojoʼapávo hendápe, haʼe oñepyrũ heʼi: “Koʼã hénte oikóva ko tiémpope* iñaña, ha milágronte ohechase. Péro ndojehechaukamoʼãi chupekuéra mbaʼeve, síno pe milágro oiko vaʼekue Jonás rehe añoite ohecháta hikuái. 30  Umi Ninivegua ohecha haguéicha Jonás rehe oiko vaʼekue, upéicha avei umi hénte oikóva ko tiémpope ohecháta pe Yvypóra Raʼy* rehe oikótava. 31  Umi hénte oikóva ko tiémpope ha pe rréina Sebagua* opuʼã jeýta pe Huísio Árape*, ha haʼe okondenáta chupekuéra. Haʼe ningo ou vaʼekue mombyry asyetégui ohendu hag̃ua Salomón ñeʼẽ arandu. Péro koʼápe oĩ hína peteĩ tuichavéva Salomóngui. 32  Umi hénte oikóva ko tiémpope ha umi Ninivegua opuʼã jeýta pe Huísio Árape, ha umi Ninivegua okondenáta chupekuéra. Haʼekuéra ningo oñarrepenti* vaʼekue Jonás opredikárõ guare chupekuéra. Péro koʼápe oĩ hína peteĩ tuichavéva Jonásgui. 33  Ñamyendy rire peteĩ lámpara nañamokañýi ni nañamoingéi kanásto guýpe. Upéva rangue jahupi yvate ohesape hag̃ua umi oikévape. 34  Nde resa ningo peteĩ lámpara ohesapéva nde rete. Upévare, nde resa ojesarekóramo peteĩ mbaʼérente, nde rete avei omimbipáta. Nde resa iñañáramo katu, nde rete avei oĩta pytũmbýpe. 35  Eñatendékena upéicharõ, ani remoypytũ rehesape rangue. 36  Nde rete omimbipárõ ha ndaipóriramo ni michĩmi iñypytũha, upéicharõ opa mbaʼe omimbíta peteĩ lámpara nderesaperamoguáicha”. 37  Haʼe oñeʼẽmba rire, peteĩ fariséo* oinvita chupe oho hag̃ua okaru hendive. Upémaramo haʼe oho hógape ha oike oguapy pe mesápe. 38  Jesús ndojepohéiri okaru hag̃ua, ha pe fariséo ohecharamo upéva. 39  Péro Jesús heʼi chupe: “Peẽ fariséo pemopotĩ pe kópa ha pláto ijapéguionte; pende pyʼapy katu henyhẽ taryrýi ha tekoañágui. 40  ¡Ajépa pendevýro! Pe ijape apohare ojapo avei pe hyepy, ¿ajépa? 41  Upévare, peipytyvõ jave oikotevẽvape, pejapo vaʼerã pende pyʼaite guive, upéicharõ penepotĩta opa mbaʼépe. 42  Aichejáranga peẽ fariséo, peẽ ningo pemeʼẽ pe diésmo jervavuéna, rrúda ha entéro umi ótro plántagui. Péro pemboyke pe hustísia ha Ñandejára mborayhu. Tekotevẽ añete pemeʼẽ diésmo, péro ndahaʼéi upe haguére pemboyke vaʼerã koʼã mbaʼe. 43  Aichejáranga peẽ fariséo, peẽ ningo peguapyseterei tenondete umi sinagógape* ha peipota enterove pendesaluda umi plasahárupi*. 44  Aichejáranga peẽ, haʼete umi sepultúra ndaikatúiva ojehecha, ha umi hénte ohasajoa hiʼári oikuaaʼỹre”. 45  Ohendúvo upéva, peteĩ kuimbaʼe oikuaa porãva pe Léi*, heʼi chupe: “Mboʼehára, erévo koʼã mbaʼe ningo rekopi avei orerehe”. 46  Upévo heʼi: “Aichejáranga avei peẽ peikuaa porãva pe Léi, pemoĩ rupi pende rapicha ári kárga ijetuʼúva ojegueraha hag̃ua, péro peẽ ni peteĩ pene kuã napembojái umi kárga rehe. 47  ”Aichejáranga peẽ pemopuʼãva umi profetakuéra* panteón, péro umi pende rukuéra ypykue voi ojuka vaʼekue chupekuéra. 48  Añetehápe, peẽ peikuaa porã umi pende rukuéra ypykue ojapo vaʼekue, ha upéicharamo jepe peguerohory chupekuéra. Haʼekuéra ojuka umi profétape ha peẽ katu pejapo chupekuéra ipanteonrã. 49  Ñandejára iñarandúgui heʼíma voi koʼã mbaʼe: ‘Che amondóta hendapekuéra umi proféta ha umi apóstol*, ha umíva apytégui oĩta ojepersegíva ha ojejukáva. 50  Ha umi proféta ruguy oñehẽ vaʼekue ko múndo* ñepyrũmby guive, umíva rehe opagáta umi hénte oikóva ko tiémpope. 51  Abel ruguy guive Zacarías ruguy peve, chupe ojejuka vaʼekue pe altár* ha pe témplo paʼũme’. Che haʼe peẽme: umi hénte oikóva ko tiémpope opagáta upévare. 52  ”Aichejáranga peẽ peikuaa porãva pe Léi, peẽ peipeʼa pe lláve oavríva pe okẽ ojekuaa hag̃ua Ñandejárape. Peẽ voi ndapeikéi, ha umi oikeséva katu ndaikatúi oike pendehegui”. 53  Jesús osẽvo upégui, umi mboʼehára leipegua* ha fariseokuéra ojopy vaipaite chupe ha oñepyrũ oporandu joʼa joʼa chupe heta mbaʼe. 54  Opeska hese hikuái jahechápa naiñeʼẽʼavýi, ha péicha oity hag̃ua chupe ñuhãme.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “pan”.
Ehecha “Espíritu Sánto”, diksionário oĩva ko Bíbliape.
Ehecha “Demónio”, diksionário oĩva ko Bíbliape.
Ehecha “Beelzebub”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Griégope heʼi: “Ñandejára kuã”.
Ehecha “Umi Hénte Oikóva ko Tiémpope”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Térã: “rréina del sur”.
Ehecha “Huísio Ára”, diksionário oĩva ko Bíbliape.
Ehecha “Arrepentimiénto”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Térã: “merkádorupi”.
Ehecha “Léi”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Ehecha “Altár”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.