Ehecha oĩva pype

Ehecha oĩva pype

Lucas 10:1-42

10  Upe rire, Jesús oiporavo jey seténtape ha omondo mokõi mokõime oho hag̃ua henonderã entéro siuda ha lugár haʼe ohotahápe.  Upémarõ heʼi chupekuéra: “Añetehápe hetaiterei oĩ pe kóga oñemonoʼõ vaʼerã, umi omonoʼõva katu saʼi. Upévare, pejerurékena pe kóga Járape tombou hetave omonoʼõ vaʼerã ikóga.  Tapeho. ¡Péina!, pomondo hína ovecharaʼy ohoramoguáicha lóvo apytépe.  Ani peraha pláta ryru, vosa ni sandália, ha ani pepyta tapére pesaluda hag̃ua avavépe.  Peg̃uahẽvo peteĩ ógape peje raẽ: ‘Toĩ pyʼaguapy pende rógape’.  Ha oĩramo upépe peteĩ ohayhúva pyʼaguapy, pende pyʼaguapy opytáta hendive. Péro ndaipóriramo, oho jeýta penendive.  Ha pepyta upe ógape pekaru ha pemboyʼu oñemeʼẽva guive peẽme. Pe ombaʼapóva ningo oreko derécho okovrávo. Ani peiko peva, ápe ha pépe.  ”Avei oimeraẽ siuda peg̃uahẽhápe, penderresivi porãramo hikuái, peʼu oñemeʼẽmíva peẽme,  pemonguera upépe umi hasývape ha peje meme chupekuéra: ‘Ñandejára Rréino hiʼag̃uimbaitéma’. 10  Péro oimeraẽ siuda napenderresivirihápe, pesẽ pe tape guasúre ha peje: 11  ‘Pe yvytimbo oja vaʼekue ore pýre jepe romopotĩ rohechauka hag̃ua peẽ pejavyha. Péro penemanduʼáke Ñandejára Rréino hiʼag̃uimbaitemaha’. 12  Che haʼe peẽme, upe árape upe siudápe hoʼa vaivéta Sodómagui. 13  ”¡Aichejáranga Corazín! ¡Aichejáranga Betsaida! Umi milágro ojejapo vaʼekue pende siudápe ojejapórire Tiro ha Sidónpe, haʼekuéra yma oñarrepenti* vaʼerãmoʼã, omonde ao chalái* ha oguapy tanimbúpe. 14  Upévare pe Huísio Árape*, peẽme hoʼa vaivéta Tiro ha Sidóngui. 15  Ha nde Capernaum, ¿reimoʼã piko rejehupitaha yvága peve? ¡Reñemboguejýta guei pe sepultúra* peve! 16  ”Peẽme penerendúva, chéve avei cherendu. Ha penderehe nopenáiva, nopenái cherehe. Avei pe nopenáiva cherehe, nopenái pe chembou vaʼekuére”. 17  Upéi, umi setenta vyʼapópe ou ha heʼi: “Ore Ruvicha, umi demónio* jepe opyta ore poguýpe roiporúvo nde réra”. 18  Upévo haʼe heʼi chupekuéra: “Ahecháma voi Satanás* hoʼamaha yvágagui aratirícha. 19  ¡Péina!, ameʼẽ peẽme autorida pepyrũ hag̃ua mbói ha alakrán rehe, ha pendepuʼaka hag̃ua pene enemígore, ha ndoikomoʼãi penderehe mbaʼeve ivaíva. 20  Upéicharamo jepe, ani pevyʼa umi demónio opyta haguére pende poguýpe, pevyʼa guei pende réra ojehai haguére yvágape”. 21  Upe órape Jesús ovyʼaiterei espíritu sánto* rupive ha heʼi: “Rombotuicha opavave rovake che Ru, yvága ha yvy Ruvicha, remokañy porã haguére koʼã mbaʼe umi iñarandu ha iñakãporãvagui ha reikuaauka umi mitãme. Nde reipotágui che Ru, upéicha oiko. 22  Che Ru ningo omoĩ che poguýpe opa mbaʼe. Pe Túva añoite oikuaa pe Taʼýrape ha pe Taʼýra añoite oikuaa pe Túvape. Ha pe Taʼýra omombeʼuséramo ótro tapichápe mávapa pe Túva, upéva oikuaáta avei chupe”. 23  Upe rire oho idisipulokuéra* rendápe ha heʼi chupekuéra haʼeñoháme: “Ovyʼa umi ohecháva koʼã mbaʼe peẽ pehecháva. 24  Che haʼe peẽme: Heta proféta* ha rréi ohechase vaʼekue umi mbaʼe peẽ pehecháva péro ndohechái. Avei ohenduse vaʼekue umi mbaʼe peẽ pehendúva péro nohendúi”. 25  Upéi peteĩ kuimbaʼe oikuaa porãva umi Léi* opuʼã ha otantea hag̃ua Jesúspe oporandu: “Mboʼehára, ¿mbaʼépa tekotevẽ ajapo ahupyty hag̃ua jeikove opaveʼỹva?”. 26  Haʼe heʼi chupe: “¿Mbaʼépa heʼi pe Léi? ¿Mbaʼépa nde rentende?”. 27  Haʼe ombohovái: “‘Rehayhu vaʼerã nde Jára Jehovápe* nde pyʼaite guive, ne álma* rugua guive ha opa ne arandu ha ne mbaretekue reheve’. Ha ‘rehayhu vaʼerã nde rapichápe nde rejehayhuháicha’”. 28  Jesús heʼi chupe: “Rembohovái porã, ‘akóintekena ejapo upéva ha rehupytýta jeikove opaveʼỹva’”. 29  Péro ohechaukaségui hekojojaha, pe kuimbaʼe heʼi Jesúspe: “¿Máva piko añetehápe che rapicha?”. 30  Jesús ombohovái chupe: “Peteĩ kuimbaʼe ovahea ohóvo Jerusaléngui, Jericó gotyo. Ha upeichahágui osẽ una partída mondaha, omoperõ chupe, oinupã ha oheja heʼongue lénto. 31  Upe javete peteĩ saserdóte* ovahea upe tapérupi, péro ohechávo chupe ohasa pe ótro ládo. 32  Peteĩ levíta avei ovahea ohóvo ha ohechávo chupe, ohasa pe ótro ládo. 33  Upéi peteĩ kuimbaʼe Samariagua oviaháva avei upe tapérupi, og̃uahẽ ijypýpe ha ohechávo pe kuimbaʼépe oiporiahuverekoiterei chupe. 34  Upémarõ oñemboja hendápe, omoĩ aséite ha víno upe oñenupã haguépe, ha ojokua. Upéi ohupi henda ári, ogueraha peteĩ posádape ha oñatende hese. 35  Koʼẽmba rire onohẽ mokõi denário*, omeʼẽ pe posáda járape ha heʼi: ‘Eñatendemína chéve hese ha ofaltavéramo apagáta ndéve ág̃a aju vove’. 36  Upéicharõ, ¿mávapa koʼã mbohapy apytépe ohechauka ohayhuha pe kuimbaʼe oñemondapa vaʼekuépe?”. 37  Haʼe heʼi: “Pe oiporiahuvereko vaʼekue chupe”. Upémaramo Jesús heʼi: “Tereho ejapo nde avei upéicha”. 38  Upe rire ohokuévo, Jesús oike peteĩ puévlope. Upépe orresivi chupe hógape peteĩ kuña hérava Marta. 39  Haʼe oguereko peteĩ iñermána hérava María, ha haʼe ou oguapy Jesús ypýpe ha ojapysaka hese. 40  Marta katu hembiapoiterei. Upévare oñemboja ha heʼi: “Che Ruvicha, ¿nderehechái piko che ermána ohejapaiteha che ári la tembiapo? Eréna chupe tachepytyvõmi”. 41  Jesús ombohovái chupe: “Marta, Marta, rejepyʼapyeterei hína heta mbaʼére. 42  Nañaikotevẽi ningo hetaiterei mbaʼe, síno peteĩnte. María katu oiporavo pe iporãvéva ha ndojepeʼamoʼãi chugui”.

Nóta

Ehecha “Arrepentimiénto”, diksionário oĩva ko Bíbliape.
Ao ohechaukáva ñembyasy ha vyʼaʼỹ.
Ehecha “Huísio Ára”, diksionário oĩva ko Bíbliape.
Griégope heʼi: “Hades”, ehecha Informasión Oĩvéva 8.
Ehecha “Demónio”, diksionário oĩva ko Bíbliape.
Ehecha “Satanás”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Ehecha “Profesía”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha Informasión Oĩvéva 1.
Ehecha “Álma”, Informasión Oĩvéva 7A-pe.
Ehecha “Saserdóte”, diksionário oĩva ko Bíbliape.
Ehecha “Denário”, diksionário oĩva ko Bíbliape.