Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Judas 1:1-25

 Che, Judas, Jesucristo rembiguái ha Santiago ermáno, ahai peẽme, pejeporavo vaʼekue pegoverna hag̃ua. Ñande Ru Ñandejára penderayhu ha oñangareko penderehe peime hag̃ua Jesucristo ndive:  Ñandejára poriahuvereko, pyʼaguapy ha mborayhu taheta hetave peẽme g̃uarã.  Che ermanokuéra pohayhuetéva, jepe añehaʼãmbaite kuri ahai peẽme peteĩ kárta omombeʼúva mbaʼéichapa Ñandejára ñandesalváta, ahecha tekotevẽha pomokyreʼỹ peñorairõ mbarete hag̃ua pende jeroviáre. Ko jerovia oñemeʼẽ vaʼekue peteĩ jey ha opa ára g̃uarã umi ojeporavo vaʼekuépe.  Adesidi ahai peẽme oĩgui kuimbaʼe kirirĩhaitépe oikéva pende apytépe, Ñandejára Ñeʼẽme oĩma voi ojehusgataha chupekuéra. Umíva hína kuimbaʼe aña, notĩriva* hembiapo vai hag̃ua ha heʼíva ikatuha ojapo upéicha Ñandejára imbaʼeporãiterei* rupi. Koʼã kuimbaʼe ohechauka omboykeha ñande Ruvicha peteĩetéva Jesucrístope.  Peẽ peikuaa voi opa koʼã mbaʼe, péro pomomanduʼase jeýnte, Jehová* oguenohẽramo jepe ipuévlope Egíptogui, upéi ohundi hague umi ndojeroviái vaʼekuépe.  Ha umi ánhel omboyke vaʼekue hembiapo yvágape ha oheja rei ilugár, umívape Ñandejára oñapytĩ kadénape opa árare ha oheja chupekuéra pytũmbyetépe og̃uahẽ meve pe ára guasu ojehusga hag̃ua.  Upéicha avei Sodoma ha Gomorra ha umi siuda oĩva ijerére, oñemeʼẽ opaichagua tekokyʼa ivaietereívape, iñakãraku vaipa ojuehe ha oiko hembipota vai rapykuéri. Chupekuéra ojekastiga ohasa asy hag̃ua tatarendy ogueʼỹvape arakaʼeve*, ha hesekuéra oiko vaʼekue opyta ñandéve ehemplorã.  Upéicharõ jepe, koʼã kuimbaʼe oiko ojapo umi mbaʼe oúva chupekuéra iñakãmente, oñemongyʼa ijupe voi ha ótrope, nomombaʼéi umi omoakãvape ha oiko otaky umi Ñandejára oguerohorývare.  Arkánhel* Miguel katu oiko vaírõ guare pe Aña* ndive Moisés retekuére, nokondenái ni noñepyrũi ojaʼo vaipa chupe, ojejoko guei ha heʼi: “Jehová tanemongavaju”. 10  Upéicharamo jepe, koʼã kuimbaʼe oiko otaky opa umi mbaʼe oikuaaʼỹvare. Ha umi mbaʼe ijehegui voínte oikuaáva umi mymba oikuaaháicha avei, umíva rapykuéri jepe oñehundi hikuái. 11  Hoʼa vaietéta chupekuéra, oiko rupi Caín pyporére, ha iplatapotágui pyaʼe voi oho hikuái Balaam rape vaikuére. Ha oñehundi oñeʼẽ vai rupi umi omoakãvare, Coré ojapo haguéicha. 12  Koʼãva hína ita okañýva y guýpe, oĩva penendive pejapo jave pende karu guasu*, ovecharerekua ndokyhyjéiva Ñandejáragui ha hyg̃uatãma guive ndojepyʼapyvéimava avavére; arai ndoguerúiva ama, ohóva ápe ha pépe yvytu oipejuha gotyo. Yvyramáta ndahiʼáiva itiémpope, ipirupaitéva ha ojehapoʼóva. 13  Koʼã kuimbaʼe ojogua umi oláda pochy marpeguápe, opoíva y rembeʼýpe umi mbaʼe kyʼa omotĩ vaʼerã chupekuéra; estrellakuéra osẽva hapégui, ha oĩtava pytũmbyetépe opa ára g̃uarã. 14  Enoc haʼéva hína pe ñemoñare sieteha Adán guive, heʼi vaʼekue voi hesekuéra oprofetisárõ* guare: “¡Péina! Jehová ou hetaiterei ánhel imarangatúva reheve, 15  ohusgávo opavavépe, ha okastiga hag̃ua entéro iñañávape hembiapo vai haguére. Ñandejára ojapóta upéicha hembiapo vai haguére hikuái. Haʼekuéra ningo pekadór nomombaʼéiva chupe ha oiko okopi hese”. 16  Koʼã kuimbaʼe okopi opa mbaʼére ha ojeplagea noñekontentáigui umi mbaʼe ohupytývare, oñemeʼẽ umi mbaʼe vai ojaposévape ha oiko oñembovaleterei. Avei ombojuruheʼẽ hapichakuérape okonveni rupi chupekuéra. 17  Péro peẽ che ermanokuéra ahayhuetéva, penemanduʼákena ñande Ruvicha Jesucristo apostolkuéra* heʼi vaʼekuére peẽme ymave. 18  Haʼekuéra heʼími peẽme: “Pe ára pahápe oĩta oñembohorýva penderehe, ha oñemeʼẽva umi mbaʼe vai ojaposévape”. 19  Koʼãva hína umi oporomoingo vaíva, kuimbaʼe ojoguáva mymbápe, ndoguerekóiva Ñandejára espíritu. 20  Péro peẽ che ermanokuéra ahayhuetéva, peñemombaretéke pende jerovia marangatu rupive, ha peñemboʼe espíritu sánto* poguýpe. 21  Pejapo upéva peiko hag̃ua Ñandejára mborayhúpe, pehaʼarõ aja ñande Ruvicha Jesucristo poriahuvereko ñandegueraháva jeikove opaveʼỹvape. 22  Avei peiporiahuvereko meme umi ipyʼamokõivape, 23  ha pyaʼe porã peguenohẽ tatágui pesalva hag̃ua chupekuéra. Ha peiporiahuvereko meme umi ótrope, péro kyhyjepópe penembojeguarúgui pe ao haʼekuéra omongyʼa vaʼekue hembiapo vai rupi. 24  Ñandejára ikatu oñangareko penderehe ani hag̃ua peñepysanga, péicha ikatúta penepotĩ ha peime vyʼapópe hekomimbipa renondépe. 25  Chupe toñemeʼẽ tekomimbipa, puʼaka ha autorida ha togoverna, ymaite guive, koʼág̃a ha opa ára g̃uarã. Haʼe hína Ñandejára peteĩete ñandesalváva Jesucristo rupive. Taupéicha*.

Nóta

Ehecha “Conducta Desvergonzada”, diksionário oĩva ko Bíbliape.
Térã: “ohechauka rupi mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha Informasión Oĩvéva 1.
La Bíbliape ojeporu jepi pe ñeʼẽ tata ohechauka hag̃ua ñehundi opa ára g̃uarã. Ehecha Apc 19:20. Ehecha avei “Gehena”, Informasión Oĩvéva 9-pe.
Ehecha “Arkánhel”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Ojejapóva ojevyʼa hag̃ua oñondivepa.
Ehecha “Profesía”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “Amén”.