Ehecha oĩva pype

Ehecha oĩva pype

Juan 9:1-41

9  Upe rire Jesús ohasa ohóvo ha ohecha peteĩ kuimbaʼe onase vaʼekue siégo.  Idisipulokuéra* oporandu chupe: “Mboʼehára*, ¿máva piko opeka raʼe: ko kuimbaʼe térã ituvakuéra, ajeve onaséma siégo?”.  Jesús ombohovái: “Ndahaʼéingo ko kuimbaʼe ni ituvakuéra opeka haguére haʼe onaséva siégo. Péicha ojehu chupe ojehecha hag̃ua mbaʼépa ikatu ojapo hese Ñandejára.  Arakuépe jajapo vaʼerã upe chembou vaʼekue rembiapo; cháke ág̃a pyhare vove, avavéma ndaikatúi ombaʼapo.  Aĩ aja ko múndope* che hína pe mbaʼerendy ohesapéva ko múndo”.  Heʼi rire koʼã mbaʼe, ondyvu yvýre, ojapo chugui tuju, omoĩ upéva pe kuimbaʼe resáre,  ha heʼi chupe: “Tereho ejovahéi pe y renda Siloámpe” (heʼiséva ‘y osyrývaʼ). Haʼe oho ojovahéi ha upe rire ohecháma oúvo.  Ivesinokuéra ha umi hénte ohecháva jepi chupe ombaʼejerure upérupi, oñepyrũ heʼijoa: “¿Ndahaʼéi piko kóva pe kuimbaʼe oguapýva jepi ombaʼejerure?”.  Oĩ heʼíva: “Hẽe, péva haʼe”. Ótro katu heʼi: “Ndahaʼeietépa, péro ojogua chupe”. Pe kuimbaʼe katu heʼi: “Che hína upéva”. 10  Upévo oñepyrũ heʼi chupe hikuái: “¿Mbaʼéichaiko koʼág̃a ikatúma rehecha?”. 11  Haʼe heʼi: “Pe kuimbaʼe hérava Jesús ojapo tuju, omona che resáre ha heʼi chéve: ‘Tereho ejovahéi Siloámpe’. Upémarõ aha, ajovahéi ha ahecha”. 12  Upévo haʼekuéra heʼi chupe: “¿Moõiko oime pe kuimbaʼe?”. Haʼe heʼi: “Ndaikuaái”. 13  Upémarõ ogueraha hikuái pe kuimbaʼe isiégo vaʼekuépe umi fariséo* rendápe. 14  Jesús ojapórõ guare tuju ha omonguera pe kuimbaʼe ohechaʼỹvape, sábado* kuri. 15  Umi fariséo oñepyrũ avei oporandu pe kuimbaʼépe mbaʼéichapa ohecha raʼe. Haʼe heʼi: “Omoĩ che resáre tuju, ajovahéi ha upéi ahecha”. 16  Upévo umi fariséo apytépe oĩ heʼíva: “Pe kuimbaʼe ndouichéne Ñandejáragui, upévare nomboaretéi pe sábado”. Ótro katu heʼi: “¿Mbaʼéicha piko peteĩ kuimbaʼe hembiapo vaíva ojapóta koʼãichagua milágro?”. Ha péicha oñepyrũ ojodiskutipa hikuái. 17  Upémarõ heʼi jey hikuái pe isiégo vaʼekuépe: “Haʼe nemonguera, ¿mbaʼépa nde ere hese?”. Pe kuimbaʼe heʼi: “Haʼe ningo peteĩ proféta*”. 18  Umi hudío katu ndogueroviái pe kuimbaʼe haʼe hague siégo, upévare ohenoika ituvakuérape, 19  ha oporandu chupekuéra: “¿Kóva piko pende raʼy, peẽ pejéva onase hague siégo? ¿Mbaʼéicha rupi piko koʼág̃a ohecha?”. 20  Upévo ituvakuéra ombohovái: “Roikuaa kóva haʼeha ore raʼy ha onase hague siégo. 21  Péro ndoroikuaái mbaʼéichapa koʼág̃a ohecha térã mávapa omonguera chupe. Peporandúna chupe, haʼéngo okakuaapáma ha haʼeñóma oñedefende vaʼerã”. 22  Ituvakuéra péicha ombohovái okyhyjégui umi hudíogui. Haʼekuéra ningo oñemoĩma peteĩ ñeʼẽme ha heʼi omosẽtaha sinagógagui* oimeraẽ heʼívape Jesús haʼeha pe Cristo*. 23  Upévare ituvakuéra heʼi: “Haʼéngo okakuaapáma, peporandúna chupe”. 24  Upémarõ umi fariséo ohenói jey pe kuimbaʼe isiégo vaʼekuépe ha heʼi chupe: “Ani ndejapu Ñandejára renondépe; ore roikuaa pe kuimbaʼe pekadorha”. 25  Haʼe ombohovái: “Che ndaikuaái oimépa pekadór; péro peteĩ mbaʼe aikuaa porã, yma ndahechái vaʼekue ha koʼág̃a katu ikatúma ahecha”. 26  Haʼekuéra oporandu jey chupe: “¿Mbaʼépa ojapo nderehe? ¿Mbaʼéichapa nemonguera?”. 27  Haʼe ombohovái: “Haʼémango peẽme ha napehendúi. ¿Mbaʼére piko peipota haʼe jey peẽme? ¿Térã piko peẽ peikose avei idisípuloramo?”. 28  Upévo ojaʼo vaipaite chupe hikuái ha heʼi: “Nde ningo pe kuimbaʼe disípulo, péro ore Moisés disípulo hína. 29  Ore roikuaa Ñandejára oñeʼẽ hague Moiséspe, péro pe kuimbaʼe ndoroikuaái moõguipa ou”. 30  Pe kuimbaʼe ombohovái: “Eʼa, peẽ ndapeikuaái moõguipa ou, ha hiʼarive haʼe chemonguera. 31  Jaikuaa Ñandejára nohenduiha umi pekadórpe, péro oĩramo okyhyjéva Ñandejáragui ha ojapóva hembipota, chupe ohendu. 32  Arakaʼeve noñehendúiva avave omonguera hague peteĩ onase guive isiégo vaʼekuépe. 33  Ko kuimbaʼe ndahaʼéirire Ñandejára remimbou, ndaikatúi vaʼerãmoʼã ojapo mbaʼevete”. 34  Haʼekuéra ombohovái chupe: “Nde nerenyhẽ pekádogui renase guive, ¿ha piko oremboʼéta?”. ¡Ha omosẽ chupe hikuái! 35  Jesús ohendu oñemosẽ hague pe kuimbaʼépe, ha otopávo hese heʼi chupe: “¿Nde piko rejerovia pe Yvypóra Raʼýre*?”. 36  Haʼe heʼi: “Karai, eréna chéve mávapa ajerovia hag̃ua hese”. 37  Jesús heʼi pe kuimbaʼépe: “Rehecháma ningo chupe, che hína upéva, pe oñeʼẽva nendive”. 38  Upévo haʼe heʼi: “Ajerovia hese Karai”. Ha omombaʼe* chupe. 39  Jesús heʼi: “Che aju ko múndope Ñandejára ohusga hag̃ua ko múndope, umi ohechaʼỹva ohecha hag̃ua ha umi ohecháva opyta hag̃ua siégo”. 40  Umi fariséo oĩva hendive, ohendúvo koʼã mbaʼe, heʼi chupe: “Oréngo ndahaʼéi siégo avei, ¿ajépa?”. 41  Jesús heʼi chupekuéra: “Peẽ siégorire ndaperekói vaʼerãmoʼã pekádo. Péro peje rupi: ‘Ore rohecha’, noñeperdonamoʼãi pende pekádo”.

Nóta

Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Térã: “Rabí”.
Ehecha “Múndo”, diksionário oĩva ko Bíbliape.
Ehecha “Fariséo”, diksionário oĩva ko Bíbliape.
Ehecha “Sábado”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Sinagóga”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Yvypóra Raʼy”, diksionário oĩva ko Bíbliape.
Térã: “oñesũ”. Yma péicha ojehechauka oñemombaʼeha peteĩ tapichápe.